PAOCHA 28 - KHYINGEI PU'TLOU Bible (BSI)

Malta'ra Leiwurkhou

¹ Kane yuiruira koukhatkhi shuikngam makne yui haithutkur heirouri, ram heiyei minri Malta toubi ungme touri kane muwurla.

² Heitoubi ram heirou louklei thimi rapri beimakne nungwaikna. Kane bi heirou leikhouwei kaalnung nung royouwurbi beimakne reikur, heitounei yane meibom khat lukpopbine ka nammaya lou'unglhakpikur.

³ Heirou Paul'ne heenghar thacha baimanpungbi meiwaira chaaplhakbi hongei kaalnung, meithlanne heishanei ngamrou raba hangrei frultu khat loutulthutbi Paullei hutbangra chikmanthuibi leikur.

⁴ Heirou ram heiyei thimi rapne Paullei hutbangra frultu khat kanthuibi klei heiya mulhakurnarouri yane khatle khat yunrilkur, “Napawa heiri thimihat napawa louhoilhengrou, heiya ane samadru heirouwei kartleiwurbikhi aiyei klal lhoutou heiwane aya ringyermakrou.”

⁵ Heiya Paul'neri frul heiri meihangra thinglhakkur, heirou anungeiri koukhi khru kamak.

⁶ Yaneri a heiri khruyoubi katporrouwa nimanung tallengne kanellhakbi hirouwame toubi heithibi klei. Heiya kheen beimak tlane heithibikhi anungeiri koukhatkhi touduimakurnei ngamrou, yai ukningra hollurbi yane kyun, “Thimi awari thraileisame!”

⁷ Mei lumna bi heirouwei kalnekhi tlatrilmakne Tuymakpung pu Krung-Publiusyei phailou khat klei. Bi heirou ane kaya unglhakbi lhangaine louropikur heirou kane tlaini khyumnibil aiyei mal khoine leiwurkhou.

⁸ Heirou Publiusyei pawari kanchun knale heirou hee aebi khumdoura ipbi louklei. Heirou Paul'ne aiyei ipna bomthora wachangbi, heirou aidoura hut khaangbi shunchapibi aya kna raiyerpikur.

⁹ Ane heisi toupikur heirouri, tuymakpung heirou klei kna thimirap nammane anung wabi kna raiyerpi phakur.

¹⁰ Heirou yane kanungei hutthul chungwane malanpikur heitoubi kane mali tungbi shaalrou waiyouweinung yane kaiyei changbom thuk putchei namma malidoura marshikbaangbi pithungkur.

Malta'rouweine Rome'ranung Chakur

¹¹ Kane tuymakpung heirou tangla tlun-khyum leikhoubi, heitoubi kane phalbilumlhun leikhouna Alexandria'rei “Thrai kanfir” toubi ung mali khatra loutungthungkur.

¹² Heitoubi kane Syracuse khukarthilla wa'tlungkur, heitoubi bi heirou kane khyumni phaiwurkhou.

¹³ Bi heirouweine kane mali tunglouheibi chakur, heitoubi Rhegium khukarthilla ka'tlungkur. Heirou thangei tlainirouri marthee heiri khate lhangrei katthiyoukur, heirou tlaini enini tlungkur heirouri kane Puteoli khukarthilla ka'tlungkur.

¹⁴ Bi heirou kane uklum thimirap tha murilbi, heirou yane kaya hapta khat leimalnananung loushunchakur. Heisitoubi kane Rome'ra ka'tlungkur.

¹⁵ Heirou Rome'rei klei uklum thimi rapne kaingamrou mayekbine heirou yane Appius toubi ung keithil heirou ‘Thimi tlungna Cheemtang khyum’ toubi ungna bi heisibil phane kaya louropinanungei wathukbi louklei. Heirou Paul'ne yaya loumubi Dunpuya mathangkur, heirou ukningrakhi beimakne malungamkur.

Rome'ra Ka'tlung

¹⁶ Kane Rome'ra ka'tlungkur heirouri, Paul'yari aitamtomne aya kngaak raallui khatle kansangne leiyerkur.

¹⁷ Tlaini khyumniyei hillouri Paul'ne khukarthil heiyei Jehudia lhou'urpu upa rapya murilnanungei ungmartilkur. Heitoubi yane wakartilkur heirouri Paul'ne yanungei shun, “Keipalui Israelrap, keine keiyei thimi rapnung nimanung kai nutar-patar rapbei phabi klei youkna heiya karhane koukhi klallei lhouya toukhoumanungkhi, keiyari Jerusalem'ra kulrilla chalphopburbi, heirou Romia rapbei hutra malanlhakkur.

¹⁸ Heitoubi keiya tlou ngai-mallukkur hillouri Rome thimi rapne keiyari malhetnikur, ngamri yane keirouwei khi kyayei klal lhou koukhatkhi phakhoumak.

¹⁹ Heiya Jehudia rapneri heinaksi yapimaknei ngamrou keine keiyei thimi rapnung klal dayernimanungkhi, Krungnungei keine tlou makatrou dakur.

²⁰ Heitounei ngamrou keine neiya murilbi nangle kalhonne tlou kallangrilnanungei buchakur. Heitoubi chimmei tlouya thuknanungei toubine, Israel thimirapne malungambi klei Pu heiwanung'tlim keiyari thirruini matphopbi khoupiwurla.”

²¹ Heirou yane anung loushun, “Kari neingamrou Judearouwei kouchethi khatkhi phamakme, heitoubi heilhangrei klei kaiyei thimi rapne koupaokhi yenbi hungmak, heirou neingamrou koukhi lhangaimak paokhi mayekmak.

²² Heiya kane neiyei kning kousi leileiyo toubi beicha ningnilei, ngamri thimi rapne bi kantangrou neiyei thimi rapbei ngamrou yanimakne tlou yunrilbi klei heiya kane mayeklei.”

²³ Heisitoubi yane Paul'le kalhonne yarilbi tlaini danrilkur, heitoubi thimi chungne, danrilbi kartinkur tlainirou Paullei leina bira wakartilkur. Heitoubi heiyei tlainirou Paul'ne yanungei Dunpuei Krungrammei ngamrou lhangai Pao-laaya ningshun waiyoubine rawai phane yunkarshangpikur. Heirou ane yanung Moses'yei Tloulamrei'le Thimkhui rapbei mayekhounarei thibine, Jesuei ngamrou khminni yunpiwurbi yaya manelnanungei toukur.

²⁴ Heitoubi thimirap thayari aiyei tloune manelkur, heiya ya thaneri uklumpimakur.

²⁵ Heitounei yane Paullei kyun tloubom khatdei ngamrou yakantlangmakne shaalkarkhaikur. Ane asitoubi yunpikur: “Nai nutar-patar rapnung Lhawai Khyingne Thimkhui Isaiahya shunthutyerkur!

²⁶ Ngamri ane yunthutkhou, ‘Chabine thimi rapnung shunthutpilak: Nane ningri ninglhakrou, heiya muidane mayekmakrou; nane thiri thipharou, heiya mumakrou,

²⁷ ngamri thimi rapbei ludok heiri karsukmaklei, heirou yane yai khnarap heiri tipkhalwurla, heirou yai mitlungkhi mingmakne chibphapburla. Heisi nimanungri, yane mit mupharou, yai khnane mayekpharou, heirou yai ukningra muidane mulhakrou, heitoubi yane keinung kalleklhakrou, heitoubi keine yaya raiyerpirou, toubi Dunpune yunlei.’ ”

²⁸ Heisitoubi Paul'ne kyun luilhakkur, “Heiyanungri nane murou touri Dunpuei kalpinei Pao-laa heiri Gentile rapnung malhetwurla. Heirou yane paolaa heiya ninglhakrou!”

²⁹ Paul'ne tlou heiya yunthutpikur hillouri Jehudia rapne yadikne tlou rkalrilbi beimakne ngaalkhoubi shaalkur.

³⁰ Paul'ne kum'khnibil aitamtom cheem waibi bi heitamrou leikhou, heitoubi bi heirou aya murillou wathimi rapya ane louropikur.

³¹ Heisitoubi ane krakne heirou koukhatnekhi aya marhotmakne Dunpuei Krungram ngamle heirou Pu Jesu Christa'yei ngamroukhi shunthutbi lhangaine marnopikur.