PAOCHA 27 - KHYINGEI PU'TLOU Bible (BSI)

Paul'ne Rome'ranung Mali Tungbi Shaalkur

¹ Kane Italy'ranung mali tungbi chananungei darilkur hillouri, yane Paulle heirou kulla chalphopkur thimirap thayakhi, “Rome Krungei Raalluirap” toubi ung heiyei upa Juliusyei hutra pilhakkur.

² Heirouri kane Adramyttium lhangrei hungtlungbi, Asia khokul lhangranung charou kyou mali khatra loutungthungbi chakur. Heirou Thessalonicarei Aristarchus toubi ung Macedoniayei napawa heikhi kakou pulne chamalnakur.

³ Heitoubi thangei tlainirou kane Sidon'ra ka'tlungkur. Julius'ne Paul'yari beimakne kringpikur, heitounei ngamrou ane aiyei palui rapya murilbi, aiyei changbom thuk yrengnungei putchei piyerkur.

⁴ Kane bi heirouweine heisi chayeinung martheene kaiyei maikroni louthinei ngamrou, kane Cyprus Tuymakpung lhangra kallemalomni mali hulbi chakur.

⁵ Heitoubi kane Cilicia'le Pamphylia'yei samadruya heiraalwurbi Lycia ramrei Myra khukarthilla kane wa'tlungkur.

⁶ Bi heirouri raallui upawane Alexandria lhang'rouweine Italy'ranung charou kyou mali khatra kaya tungyerkur.

⁷ Heirouri kane bi heirouweine mali tungbi tlaini kounakbil changne, heirou kluyei bomrapkhi kounak chakarthangbi Cnidus khukarthilla wa'tlungkur. Heirou martheene kayari bi heirouwei tladuiyermaknungei tounakrimne loutheenarouri, kane Cape Salmone'yei tuymakpung heiraalwurbi heirou Crete tuymakpungra mali hulloubine wakartankur.

⁸ Heirou kane kounak klah-mrimle kalhonne mali hulbi Lasea khukarthillei pongra klei ‘Lhangai Mali mathrumna bi’ toubi ungna samadru ruira karnakne mathrumkur.

⁹ Kane kai mali'yei lamtla heiri bi heirou tlane karhimwurkhoubi leiyei kaalnung, ‘Lhukthutpinei Tlainiyei’ murchak ngeinei kheen heiwakhi kane yenraalkur, heirouri kaiyei lamtla awari shuikngam hungthukrou waiyoukur. Heiya munarou Paul'ne thimi rapya mukheine leinanungei shunmatukur:

¹⁰ “Palui-teinaorap, keine kmu khat leiyura touri, kaiyei mali'yei lamtla chanara shuikngam thukrou khat leiyurame; heine mali doura urbi klei putcherap maangkurtom heirou mali baikurthil nimakne, kaiyei chaan ramphane maangkur kyayei trum leiyurame.”

¹¹ Heiya raallui macha khatdei ruipipu heiwane Paullei kyunya malungamnung'tlimri, malihul thimile heirou mali puwei kyunya duine malungambi leikur.

¹² Mali mathrumna bi heiri phalbinungri kallenanung lhangaiyei bomhakri nimak; heitounei thimi rapne maneyanungri samadrurei pochutdurbi phalbinungri Phoenixra kallebi leikurni lhangairou toubi ningchakur. Phoenix heiri Crete tuymakpung rammei khate-kulrel heirou khalu-kulrel lhangra kallekbi klei bi khat.

Samadru Doura Martheetang Katyoubi Yuilhou thukkur

¹³ Martheene khate lhangrei thiyoukur, heirouri, thimi rapne yai lamtla heiri donsochangrou marbubi, malihulna heiya taangbaangbi maneyei'mkhei Crete'yei samadru rui lhangra hulnanungei marshikkur.

¹⁴ Heiya lepcharou - tuymakpungrei youbi ‘Euroclydon’ toubi ung ‘Khalu-karthel’ lhangrei martheetang khat yukthikur.

¹⁵ Heitoubi martheetang heine malira karnengkur, heirouri mali heiri marthee maironi louhulchangmakrou mubine, kane heiyei lhangra hulmakne dongurbi, mali heiri marthee thina lamthungne loumalhetkur.

¹⁶ Heirou kane Cauda tuymakpung mandichayei khate lhangra yukraallurbi loukallekur. Bi heirou kane beimakne klune mareknabi mali heiya shuingam thukyermakne leikhou.

¹⁷ Heirou yane mali heiya samadru ruira taangthutbi, ruifret thane msuiphopbi khoukur. Heirou mali heiri Libya touri Syrtis lhangra martlaoloubine shitnrui hangra dadumrou marbubi yane beimakne uksakur, heingammei yane malihulna heiya tounimmurbi marthee mailamra loumanyonthungkur.

¹⁸ Lhimnung martheetang heiri trim naimakne thibine leikur, heingammei thangei tlainirouri yane malidourei kyao putchei rapya khingsunda waiyoukur.

¹⁹ Heitoubi heithangei tlainiroukhi yane mali'yei putcheirap thakhi threthutbine khingsundakur.

²⁰ Tlaini kounakbui kane kinnikhi heirou masanung sorwakhi muphamakne leiwurkhou, heirou martheetang heiwane trimkhi naimakne heisi thibithil leikur. Hilluirouri kane ukningra ringeiroume tounei malungamri koukhatkhi makne leikur.

²¹ Thimi rapne tlaini kounakbui chamak-maimakne leikur hillouri, Paul'ne yai maibongra katmayungbi kyun, “Keiyei palui-teinaorap, keiyei kyun tlouya loubine mali heiri Crete'rouwei hulyoumakne leiyanungri, kane anaksi deekbaikhi thukkurmakrou, heirou malirei putcheikhi maangurmakrou.

²² Heiya asinungri keiyei nanungei shunkniri, nane uksamak heirou chikhi chimak! Na hukhatkhi hiwurbi maangurmakrou, heiya malitom maangrou.

²³ Kouweiyo toulanungri keiyei Pu hoibi klei heirou keine khrumbi klei Dunpuei Thangring khatne masanung keinungei yongbi,

²⁴ heirou ane keinung, ‘Chimaklo, Paul! Nangne Krungpuwei maibongra mayungeirou. Heirou nangkou mali tungmalkna thimirap nammaei doura Dunpuei lhangai heiwane ringyerrou!’ toubi loushunpi.

²⁵ Heini thimirap, nane uksamakne heirou chimakne leiyalo! Ngamri Dunpune keinung loushunpikur heiri yulmakne hoiyerroume toubi keiyei malungam leilei.

²⁶ Heiya kayari tuymakpung khatdei samadru ruira tonthutpirou.”

²⁷ Heirou tlaini chiple phaliniyei masanungri, Lhimnungne kaya Mediterranea'yei samadru lhangra tonlouheikur. Masa yantrimnung malihul thimi rapne mali heiri samadru rui lhangra yenkarnaka toubi ningchakur.

²⁸ Heirouri yane ruifret msurra thirmtum suimandokbi yuirilla laklhakbi thinarouri, yui heiri lamh somninakmal khyukni louklei; heitoubi hilloukhi lepcha leibi hanuikhi heinakrim laklhakbi thinarouri bi heirouri lamh chiple-phanga khyukni louklei.

²⁹ Heirouri yane mali heiri thlungra karnengleiko toubi ningchikur, heitounei yane mali hulna hutsi ruifret phalitam lakchulbine, heitoubi yane tlaini katwaarya kngaak khoine shunchabi leikur.

³⁰ Heirouri malihul thimi rapne malirouwei trukyulna'nungei wairangkur; heitounei yane mali heiri yuihangra mathrumbine, mali hulna maibong lhangrei hutsi ruifret shutrounakrimne toukarsakur.

³¹ Heiya Paul'ne raallui upawale aiyei raallui rapnung shunkur, “Malihul thimi rapne mali rilla leimakrou dawanungri, nari ringeirou toubi malungamnungei tlouri makkura.”

³² Heitounei raallui rapne ruifret rapya dintatdurbi mali heiri chayerkur.

³³ Heirou nung katwaarbongchekrou Paul'ne ya nammaya shunbi chamaiyerkur: “Angtu'phane tlaini chiple-phalinibil nane ngaakkurla, heitoubi tlainirap heiyei rillou nane koukhatkhi chamaimakne leiwurla.

³⁴ Heini asinung keine nanungei yunkniri, naiyei murchak bei chamailaka; ngamri nane ringnanungei beibei chamairouda. Nai lurei shampumcha khatkhi trulmaangyermakrou.”

³⁵ Tlou heiya yunhillou Paul'ne mumtol loubine heirou ane ya nammaei maibongra Dunpuya mathangbi, ane threlchaalbine yershaiyoukur.

³⁶ Heirouri ya namma lhawai klahkhi raikur, heirou ya napung kantangne mumtol shailoukur.

³⁷ Mali rilla ka thimi napung macha khnile somretle thrukbil tungkhou.

³⁸ Thimi napung kantangne ukthoni chamaikur hillouri, yane gehu kaorap namyerwa yuira laklhakurbi mali heiya put yaangyerkur.

Mali Karnengbi Baikur

³⁹ Heitoubi tlaini katwaarkur heirouri, malihul thimi rapne samadru rui heithrilmumakura; heiya shitnruini haphopbi klei thlungpak khatpaya yane munarouri, mali heiri thlungpak heiwayei doura kartanleiko mathrumthiyase toubine yunrilkur.

⁴⁰ Heitounei yane mali kangkui rapya rui dintatdurbi mali heiya yuira dumyerkur, heikou kalhonne yane mali hulna hutshi ruifret rapya shutchulkur. Heitoubi yane mali'yei maibong lhangrei malihulna heiwaya mthumchouwurbi, mali heiya martheene samadru rui lhangra salouheibi hungthukkur.

⁴¹ Heiya mali heiri shitnrui hangra mur thundumlhakurbi kanchekcha manemakne kartankur; heitoubi hil'lhangrari yuilhouni hung'umbi mali heiri harhar dane baikur.

⁴² Heirouri raallui rapne kullei thimi rapya hatdurna'nungei rangkur, kouweiyo toulanungri yane samadru ruira yui haithutbi trukthutbi yulyermaknanung toukur.

⁴³ Heiya raallui machakhatdei Upawane Paul'yari hatdurmakne khoukni, heitounei ngammei ane yaya hatyermakne shunkhampikur. Heinung'tlimri ane thimi rapnung shunbi, ‘huhune yuihaibi samadru ruira thukchangroume touthimi rapne lamkrine chunsundalaka’ toubi chay pikur;

⁴⁴ heitoubi hillou dei nammakhi heengpik nimanung mali baiwurna har rapya urbi hil chanthunglakasu. Heisitoubi ka nammane samadru ruira koukhi shuikngam phamakne hungthukkur.