PAOCHA 26 - KHYINGEI PU'TLOU Bible (BSI)

Paul'ne Agrippa'yei Maibongra Ai'mshaya Loungananungei Tlou Kyun

¹ Krung Agrippane Paul'nung shunkur, “Asinungri nangne neimsha neitamyei loungananungei tlou yunnanung yapiwurla.” Heitounei Paul'ne aiyei hutbang tlangbine ai'msha aitamei lousouna'nungei tlouya asitoubi louyunkur:

² “Krung Agrippa! Keinungeiri likarsui lhangai khat khoine keine loulei touri angtu neiyei maibongra Jehudi rapne keidoura theibaangkur tloubom nammaei ngamrou keine keitam kartleina'nungei tlou mallangnei kheen phanarou beimakne nungwaiyura.

³ Heirou keiyei ningchanarari Jehudia rapbei youkna heirou yaihangrei chim-klal raphathut heiri nangnekhi muchirou. Heini keiyei kyun tlou awaya khminni louningpinanung keine neinungei buchalei.

⁴ “Jehudiarap nammane keiyei dounang kousitoubi kat'tangbangkuro touri muchilei. Heirou yane kei awari dounangri lamkrine keiyei ramra tangthutbi heihillouri Jerusalem'ra leikhoume toukhi kmu.

⁵ Ya nammane kheenserrou mubi klei touri yane keiyei ngamrou kounaksi klal theibaangkni leiyanungkhi, haallei waiyoubine keikhi lhangai karsa rapbei hangrari kaiyei tharmuya chetni ngaakbi leikhou thimi khat hoikhou.

⁶ Heitoubi asinungri keine bi arou pichar bomra mayungbi leilei, ngamri Dunpune kai nutar-patar rapnung tlou kantompikur heiya malungam leineime,

⁷ heitoubi Ahakpaya kai cheemkhur chiple-khniyei thimirap nammanekhi phananungei toubi yane malungamni masa-nunghang naimakne Dunpuya khrumkhou. Rikrai khrumknayei Krung! Keine anaksi uklum leinei ngamrou, Jehudia nammane keidoura theibaangbi tlou makatkurame!

⁸ Dunpune khirouwei ringyerroume toubi kyunya bi arou klei thimirap nane koungammei uklum manemakkurawo?”

⁹ “Keimsha-keitamne, ‘Nazareth Jesuei ngamrou lhoubom namyerwaya hotmaangurou’ toubine ningchakhou.

¹⁰ Heisitoubi keine Jerusalem'rakhi marhotkur. Heirou keine Suipipu rapbei kyaya loubine, Dunpuya kning thimirap kounakya manbi kulla chalphopkur; heirou yaya hatnanungei raangeinungkhi, keimsha'hakni yaidoura yanimakne lhou touwurkhou.

¹¹ Keine kheenserrou Pukhrumna Cheemrakhi changbine yaya klah-knang piwurkhou, heitoubi yai malungambi kningyakhi toudongnanungei mareknakhou. Keihakpanekhi yaidoura beimakne malungkhapibi, keine ram deirei khukarthil kounakrakhi chabine yaya marhotdurkhou.”

Paul'ne Aiyei Ukning Hungnei Ngamrou Yunthutpi

¹² “Keine lhou heinung'tlim Suipipu raprouwei kya loubine Damascus'rakhi kawurkhou.

¹³ Rikrai khrumna kya Krung, tlaini heiyei nunghangnung, kinniyakhi duiyei alkur kwaar khatne nungthou lhangrei keiyale heirou keikou chamalna thimi rapyakhi karhilne waaryerkur heiwaya keine mulhakkur.

¹⁴ Heirouri ka nammane thleira kanel-lhakbi leikur, kheen heirou keinungei Hebrew tloune ungbine, ‘Saul, Saul! Kouya tounei nangne keiya marhotkurrawo? Nangri halpawane aya loukhuikna puwei huitika cheiya honloukheinakne, nangri neitamni umnaloukheiyame!’ toubi yukshun.

¹⁵ ‘Nangya huwo, Dunpu?’ toubi keine loukngai. Heirou Dunpune loumallang, ‘Keiri nangne marhotbi lahyerkur Jesume.

¹⁶ Heiya nangne kanthoubi mayunglak. Keine neiya keiyei shok khat hoiyernanungei muyerkurrame. Angtu keine neinung muyerkur nammakhi heirou hilloukhi muyernungei lhourap namyerwakhi nangne thimi deinungkhi yunthutpirou dame.

¹⁷ Heirou keine neiya malhetlhakrou kyou Jehudiarap heirou Gentile rapbei hutrouwei keine neiya kalpirou.

¹⁸ Heitoubi nangne yaya mit waaryerbi, heirou yaya kmehyei lam'rouwei kwaarra, heirou Satanyei hutrouwei Dunpunung ruithutpirou; heisitoubi yane yai uklumnei ngamrou yaiyei borhya kukpiwurbi heirou yakhi Dunpuei khalthutpikur thimi rapbei hangra leinanungei bom pharou.’

Paul'ne Aiyei Lhouwei Ngamrou Yunthut

¹⁹ “Heingammei keine Thangmun lhangrei kar'anmukur lhoubom heiya chanthungmakri manemakme, Krung Agrippa!

²⁰ Lamkrine keine Damascus'ra heirou Jerusalem rakhi heirou Gentile rapbei hangrakhi paolaa shunthutpiwurbi, yane yai borh'rouwei ukning hungurbi Dunpunung kalleklhakbi heirou yai borhrei lhourouwei ukning hungurame toubi munanungei lhouya touyerkur.

²¹ Heitounei keine Pukhrumna Cheemwaira leiyeinung Jehudi rapne keiya manbi hatnanungei raangkur.

²² Heiya angtu ramphane Dunpune keiya trungpiwurla, heingammei keine bi arou mayungbi, mandi thimi rapnungle tang thimi rapnungkhi lingkhat khoine keiyei mayungbi klei tlouya nammanung shunthutpilei. Keine yanung shunthutpiyei kaalnung Moses'le Thimkhui rapne hungthukeiroume toubi shunthutkhou heiya shunthutpikur:

²³ touri, Messiahni klah-mrim douheirou, heitoubi hikur rapbei hangrouwei ringthutkri thimi hoiyeirou, heirou Jehudia rapnung, Gentile rapnungkhi kalpinei pao lhangaiyei kwaarya shunthutpirou.”

²⁴ Paul'ne heinaksi loungananung tlouya yunheinung, Festus'ne anungei hou kalne ungraobi shunkur, “Nangri pongurame, Paul! Neiyei chouwei marnoloukhei heiwane neiya pongyerkurame!”

²⁵ Heitounei Paul'ne loumallangkur, “Keiri pongmakme, rikrai khrumknayei Krungo! Keine neinung krakne yunpichangrou, ngamri nangnekhi lhou namma heiyei ngamrou kmu.

²⁶ Krung Agrippa! Keinekhi mulei touri lhourap heiyei ngamrou nangne namyerwa kandangni mupilarou, ngamri lhourap heiri dumnarei thukkur lhoukhi nimakhui.

²⁷ Krung Agrippa, nangri Thimkhui rapya uklumleiko? Keiyei munarouri nangne uklumlei!”

²⁸ Heirou Agrippa'ne Paul'nung loushun, “Asi lepchayei kheenrou nangne keiya Christen hoiyerchangrou tounei ningchakuranu?”

²⁹ “Kheen lepcharou hoiyanungkhi nimanung kheen tlane hoiyanungkhi, keine keiyei Dunpunung shunchakurri, nangle heirou keiyei tlou kyunya ningbi klei thimirap na nammakhi angtu tlainirou keiyei hoibi klei anaksi hoiyerkni - heiya keiya thirrui msuiphopbi klei anaksiri hoimakneyasu!” toubi Paul'ne loukyun.

³⁰ Ane heitoubi yunnarouri, Krung Agrippa'le, Festus, Bernice heirou yakou klei thimi deirap nammakhi kanthouwurbi shaalkur.

³¹ Heirou yane shaalkur hillouri ya khatle khat yunkril, “Napawa awari hikur kyayei klal lhou nimanung kulla chalphopkur kyayei lhoukhi koukhatkhi toukhoumaklei.”

³² Heirouri Agrippa'ne Festus'nung shunkur, “Napawa ane Krungnung tlou makatkur nimanungri, ayari malhetkurkhi kyame.”