PAOCHA 25 - KHYINGEI PU'TLOU Bible (BSI)

Paul'ne Rome'yei Krungnung Shuncha

¹ Festus'ne khokul heirou wa'tlungkur tlaini khyumniyei hillouri, ane Caesarea'rouweine Jerusalem'ra yukur,

² heitoubi bi heirou Suipipu raple Jehudiayei upa rapne Paul'yei doura theibaangpinei tlou makatkur. Yane Festus'nung shunbi,

³ yanungei kalhopbine Paul'ya Jerusalem'ra yukruiheina'nungei buchakur, ngamri yane Paul'ya lamra loumrimbi hatnanungei raangkur.

⁴ Festus'ne loukyun, “Paulri Caesarea'yei kulrilla chalphopbi khouwurla, heine keikhi bi heirou khrangni kallengthurou.

⁵ Naiyei ruipipu rapkhi keikou kalhonne bi heirou yubine, heirou napawa heiyei doura ane kounaksi klallei lhouya touwurkhou leiyanungri yanimaknei tlou makatlaka.”

⁶ Heisitoubi Festus'ne bi heirou yakou kalhonne tlaini chotni nimanung chipniyeimal leiwurkhou, heitoubi Caesarea'ra kakur. Heirou thangei tlainirou ane pichar bomra ombi heirou Paul'ya rilla urlhaknanungei chay pikur.

⁷ Heirou Paul'ne wachangkur heirouri, Jerusalem'rei ka'tlungbi klei Jehudia rapne aya karhilne omkarhungbi, heitoubi yane aidoura chimmakme toubi yunnungei makrerikhi aya yanimakne klal theibaangbi yunkur.

⁸ Heiya Paul'ne louyunbi aitam loungakur: “Keiri Jehudi rapbei Tloulamya karhane koukhi klallei lhou toukhoumakhui, nimanung Pukhrumna cheemyakhi, nimanung Rome Krungpuyei dourakhi koukhi karhane lhou toukhoumakhui.”

⁹ Heiya Festus'ne Jehudi rapnung kalhopni tlou yunbi heirou ane Paul'nung tlou kngai, “Nangne Jerusalem'ra yubine, yane neidoura yanimakne keimaibongra theibaangnei tlou makatkur heiwaya bi heirou pichar touyernileiko?”

¹⁰ Heirou Paul'ne loukyun, “Keiri keiya pichar toupibom thukna bi Romia Krungei picharbom arou mayungbi leiyurame. Nangnekhi lhangaine kmu heiwariya, touri keine Jehudia rapnung koukhatkhi klal toukhoumak.

¹¹ Keine kounaksi hikur kyaei lhoubom khoine Tloulamya toubaikur leiyanungri, kartleinanungei keine yunmakrou. Heiya yane keidoura urbaangkur tlourap heirouei chimtlou yaomakanungri, thimi hukhatnekhi keiyari yaihutra pilhaknung yamakrou. Heinung'tlimni keine Rome Krungnung buchalei.”

¹² Heirouri Festus'ne aiyei tlou ngailouna thimi rapkou ane yunrilkur hillouri ane shun, “Nangne Rome krungnung buchawurlari, Krungei bira wachangkur yawarou.”

Paul'ne Agrippa'le Bernice Yakhuntayei Maibongra Myungkur

¹³ Kheen beiyei hillou Krungpu Agrippa'le Bernice yakhune Caesarea'ra Festus'ya louronanungei pothutkur.

¹⁴ Heitoubi yane bi heirou tlaini bei kalhonne leikhouweinung, Festus'ne Krungpunung Paul'yei ngamrou tlou bei yunkarshangpikur: “Bi arou Felix'ne kulla chalphopbi horkhoukur napawa khat klei;

¹⁵ heirou keine Jerusalem'ra yuweinung, Jehudia rapbei upa raple Suipipu rapne keinungei aingamrou yanimaknei tlou chungwane loumakatbi heirou yane aya hatnanungei tlou dayerpinanungei keinung loubuchakur.

¹⁶ Heiya keine yanung shunkur, touri ka Rome'yei thimi rapri thimi hukhatyakhi aidoura klal theibaangnei tlou makat thimi raple chrungknane murilbongyen, heirou theibaangkur heiwane theibaangpi thimi rapbei maibongra kartleinanung tlouya yunnanungei kheen phayerbongnung pichar luilhakkurri kai youkna nimak.

¹⁷ Heirou, yane bi arou wa'tlungkur heirouri, keine lepchakhi karyimmakne, thangei tlainirou pichar bomra urlhaknanungei chay pikur.

¹⁸ Heirou aya theibaangpi thimi rapkhi katmayungkur, heiya yane aidoura keiyei ningchakhouyabil klallei tlou koukhatkhi urthutchangmak.

¹⁹ Ya nammane akou yeetkril tloubom heiri, yai tharmuei ngamroule heirou tirrei hikur Jesu toubi ung napawa heiyei ngamroutom rkalrilkur; heiya Paul'neri napawa heiri ringleihui toubi kyun.

²⁰ Heitounei keiri tloubom heirapbei ngamrou kouya louserrouwo toubi keitamni tlou luilhak manemakkur; heitounei ngamrou Paul'ya Jerusalem'ra yubi heirou aidoura urbaangpikur tloubomrap namyerwayei ngamrou pichar touyernanungei yunirouko toubine ngaithikur.

²¹ Heiya Paul'neri aya lhangaine thikulpinanungei, heirou aingamrou tlou makatkur heirapya Rome'yei Krungya luilhakyernanungei loubuchakur. Heitounei aya Krungei bomra malhetbi pichar touyerbongyen lhangaine thikulpinanungei toubi keine chay pikur.”

²² Heirou Agrippa'ne Festus'nung shun, “Keinekhi napawa heiyei kyunya keiyei khnane mayeknilei.” “Nangne ningayei tlainirou aiyei kyunya mayekpharou,” toubi Festus'ne loumallangkur.

²³ Heitoubi heithangei tlainirou Agrippa'ne Bernice'kou kalhonbi beimakne maleni heirou malungamni wabi, raallui upa raple, khukarthillei lhou'urpu rapkou kalhonne thimichung kartilna cheemtang rilla wachangkur. Heirouri Festus'ne chay loupiwurbi, Paul'ya rilla urlhakkur.

²⁴ Heitoubi Festus'ne kyun, “Krung Agrippa, heirou bi arou kakou kalhonne klei thimirap, na nammanungkhi keine yunlei: Napawa aya nane muphawurla, heirou aidoura Jehudia nammane, bi aroukhi heirou Jerusalem'rakhi yanimakne keiyei maibongra yane tlou makatbi leilei. Yane napawa aya tlane ringyernung yamakrou toubine ungraochabi leilei.

²⁵ Heiya keineri aidoura hiyernanungei tlou dakur kyayei klalri koukhatkhi phamaklei. Heitounei ane Rome Krungei bomra malhetpina'nungei buchakur, heingammei keine aya neinungei malhetnanung tlou dapikur.

²⁶ Heiya keine Krungei bomra aiyei ngamrou klal heirime toubi chrungknane mayenungeiri koukhi maklei. Heitounei ngamrou keine aya bi arou nai maibongra - lilkhoine Krung Agrippa neiyei maibongra heiruikurme! - heitoubi anungei tlou darbi ngaithikur hillouri, aiyei ngamrou keine mayenungei thari louleirou.

²⁷ Kouweiyo toulanungri, keiyei khalnarari, kulrilla chalphopbi klei thimi khatya aidoura theibaangkur tlourap heiya touhyingyermakne malhetkurri chimmakroume.”