PAOCHA 24 - KHYINGEI PU'TLOU Bible (BSI)

Jehudia Rapne Paul'ya Klal Theibaangpikur

¹ Tlaini phanganiyei hillouri Suipipu Ananeas'ne uparap thale heirou Tertullus toubi ung picharpu upale kalhonbi Caesarea'ra kakur. Heirou yane Felix'yei maibongra wachangbi Paul'yei doura tlou makatkur.

² Heitounei Paul'ya rilla unglhakbi heirou Tertullus'ne aidoura theibaangpinei tlou urbaangkur. “Krung Felix, Neiyei thang'alya choune rikrai khrumnalei! Neiyei shingkheine ruipipu hoipinarou kaidoura kheen tlane kounak kying yenpiwurla, heirou kaiyei ramya lhangainanung, chimmakur kounakya sheem'martlengpibi, toubomthuk kounakya kanung'tlim yenpiwurla.

³ Heinaksi lhouya kane bi kantangrou, heirou kheenserrou loulhakbine leilei; heitoubi lhou heinung'tlim kane khyukni neiya mathanglei.

⁴ Keine neirouwei kheenkhi tlane lounimaklei, heiya hoiyanungkhi nangne malungshipibi kaiyei urbaangkur tloubom awaya lepcha louningpina'nungei keine buchalei.

⁵ Napawa ari kaiyei ramya maangyerna'nungei wairangbi, heirou tlaipangpal karyouei klei Jehudia rapbei hangra tlou thukyerbi hou lungkyer thimi, heirou Nazareth'rei thimi rul khatdei ruipipu khat khoime toubi kane muwurla.

⁶ Heitoubi ane Pukhrumna Cheemyakhi maangyerna'nungei wairaangkhou; heingamei kane aya manbi, kaiyei tloulam hilthungne aya pichar tounanungei wairaangkhou.

⁷ Heiya raallui upa Lysiasni yubi, heirou ane raallui rapkou kalhonne aya kairouwei ruiloukhei.

⁸ Heitoubi Lysiasni napawa heiyei doura yanimakne tlou makatni thimi rapya neiyei maibongra tlou makat yaroume toubine chay pikur. Heineri asinungri nangne napawa heiwanung tlou ngaithipila'nungri, kane napawa heiyei doura yanimakur heiri neimshanekhi namma muchirou.”

⁹ Heisitoubi Jehudia rapne kantlangbi ‘makatkur tloubom heiri chimhakme’ toubi yuntrungkur.

Paul'ne Felixyei Maibongra Ai'mshaya Lousouna'nungei Tlou Kyun

¹⁰ Heirouri Krung heine Paul'ya tlou yunnanungei hutni martubi shun, heirou Paul'ne loukyun, “Keine kmu touri kum kounak nangne kai thimi rapbei doura pichar pu hoibi yenleiheila, heiyei ngamni keine neiyei maibongra keimsha-keitamya lousou'nungei tlou yunyernei ngamrou beimakne nungwaiyura.

¹¹ Nei'mshanekhi kmu heiwariwa, tlaini chiple khniyei maibongra keine Jerusalem'ra khrumcharou toubi yukhou.

¹² Trum heirouri Jehudia rapne keiya thimi hukounak khatle kalhonbi Pukhrumna Cheemwaira tlou yeetkrilya muthungkurkhi mak, heirou keine thimi rapya thoubi thrai khrumnara, nimanung khukarthillei bi kouroukhi hou lungyerkhi mukhoumak.

¹³ Heitoubi ya hukhatnekhi keiyei ngamrou tlou makat heiri chimme toubi neiyei maibongra krakne yunchangkhi yaomaklei.

¹⁴ Heiya keine neiyei maibongra keitam khraangne yachalei: Keiri angtu yane chimmakme toubi kyun Lam heiwaya hilthungbi kai nutar-patar rapbei Dunpuya keine khrumlei. Heiya keiri Moses'yei tloulamra heirou Thimkhui rapbei lailikra mayekhou nammayakhi uklumlei.

¹⁵ Keikhi ya thimi nammane Dunpura uklum klei nakrimne, lhangai thimi rapkhi heirou lhangaimak thimi rapkhi, khirouwei ringthutdeirou toubi malungam naksini keinekhi malungam leilei.

¹⁶ Heitounei ngamrou keine Dunpuei maibongrakhi heirou thimi rapbei maibongrakhi kheenserou mukheine lhou toubine leilei.

¹⁷ “Kum kounakei hillou keine Jerusalem'rei chutdurbi, heirou keine hanui bi heirou klei keiyei thimi rapnungei hutthul tuy, heirou khrumnara makatnungei putchei rapya urbine bi heirou wathu.

¹⁸ Keine Pukhrumna cheemwaira heinaksi lhouya toubine keitam marthingyernei lhou touwurchi hillou yane keiya bi heirou mulhakur. Kheen heinungri bi heirou thimi chungkhi kartilmak, heirou koukhi manoknayei lhoukhi leikhoumak.

¹⁹ Heiya bi heirouri Asia khokulrei Jehudiarap tha heiklei, yane neimaibongra yaitamne yunbine keidoura klalyei tlouya theibaangnanungei leiyanungri yane tlou makatbom thukrouko.

²⁰ Nimanung bi arou klei thimi rapne, keine Yama-krungei maibongra mayungeinung keidoura kou klalya phakur touri yunthutpilaksu.

²¹ Heiya bi heirou keine yai maibongrei yunkurri: ‘Keine khirouwei ringthutdeirou toubi uklumnei ngamrou, angtu nane keiya klal theibaangbi pichar toukurrako!’ heichatomngei.”

²² Heisitoubi Felix'ne, Tloulam heiyei ngamrou lhangaine mukur hillou, Paul'yei kyun tlouya ningnei lhoulam heiri luilhakur. Heirou ane thimi rapnung kyun, “Raallui upa Lysiasni bi arou wa'tlunganung, keine nai tloumakat awaya luilhakpirou.”

²³ Heisitoubi ane Paul'ya kngaak raallui upawanung Paul'ya lhangaine khoupina'nungei chay pikur, heitoubi aiyei palui rapne anungei koukouya heimarshikpi leiyanungkhi khampimakna'nungei shunkur.

Paul'ne Felix'le Drusilla'yei Maibongra Myungkur

²⁴ Tlaini beiyei hillou Felix'ne aiyei nu Jehudia napuiya Drusilla'le kalhonne wabi, Paul'ya ungthutyerbi, Jesu Christa'ya uklumnei ngamrou tlou yunyerbi ningkur.

²⁵ Heiya Paul'ne heisi yenyunbi, lhangai tharmuei lhou tounei ngamrou, ai'msha-aitam ukningya manphopnei ngamroukhi, heirou hungrou kyou Pichar tlainiyei ngamroukhi yunthutpinarouri, Felix'ne chiwurbi kyun, “Nangri asinung shaalkur yawarou. Keine kheen phalanungri hanuikhi neiya ungyerthurou.”

²⁶ Heile kalhonne ane ningchakhou touri Paul'ne anungei tuy tha pirou manthakur; heitounei ngamrou ane karyom thimi heiyilbi Paulkou tlou yunrilyerkur.

²⁷ Kum tlane yenralkur hillouri Porcius Festus'ne Felix'yei rungkhlang khoine Krung hoikur. Felix'ne Jehudia rapbei kanthangpinei lhouya madunei ngamrou Paul'ya kulrilla chalphopbi horkhoukur.