PAOCHA 23 - KHYINGEI PU'TLOU Bible (BSI)

¹ Paul'ne Yama-krung rapya thimanthrambi kyun, “Keiyei Israel paluirap! Angtu ramphane Dunpuei maibongra keiyei ukning khyingne ringbi leiwurkhoula.”

² Suipipu upa Ananeas'ne Paullei pongra knakne mayungbi heiklei thimi rapnung aya murra umnanungei chay heipikur.

³ Paul'ne anungei loushun, “Rapthang khngouwa-Neiyari Dunpune yulmakne umheirouhui! Nangne bi heirou ombi tloulamyei hilthungne keiya pichar toulei, heiya nangne yaya thoulhakbi keiya umnanungei Tloulamya toubaiwurla!”

⁴ Paullei pongra mayungbi heiklei thimi rapne anung shun, “Dunpuei Suipipu upa heiwaya nangne shamkurano!”

⁵ Heirou Paul'ne loumallangkur, “Keipalui-Israelrap, a heiri Suipipu upame touri keiri mukhoumak. Khyingei lailikni yunlei, ‘Nane nai thimi rapbei lhou'ur puya lhangaimak tloune yunnung naimak.’ ”

⁶ Heirou thimi rapbei hangrei ya thaneri Sadducee'rap heirou thaneri Lhangai karsa thimi rapme toubi Paul'ne muwurnarouri, ane Yama-krungei maibongra ungraobi yunkur, “Keiyei-palui Israelrap, keikhi lhangai karsa thimiyei chanapawa, heitoubi keihakpakhi lhangai karsa thimi khat. Keiya bi arou tlou daryerkur ari keinungei malungamkna khat leinei ngammei, touri khi thimiya khring chaan phayernanungeime!”

⁷ Ane heinaksi tlouya yunthutkur heirouri, Lhangai karsa raple Sadducee rapne ngakkur, heirouri yaihangra rulkhni thukkur.

⁸ (Ngamri Sadducee rapne kyun, ‘khi thimi rapne kouniroukhi ringthutmarou, heitoubi Thangringkhi, lhawaikhi mak; heiya Lhangai karsa thimi rapneri khyumtamrek kleime toubi uklumlei.’)

⁹ Heisitounei yaihangra ungraokur heiri duine katkalkur, heirouri Lhangai karsa rapnung kalhop thimi Tloulamya marnopipu thane kanthoubi yai kyun heiya yanimakne heikyun: ‘Kane napawa awaei doura klal koukhatkhi phamaklei! Lhawaine, nimanung Thangring khatne anungei tanghakpane yunyerkurkhi hune kmu!’

¹⁰ Heisitoubi thimi rapne beimakne yeetrilkur heiwaya munarouri, raallui upawari, ‘Paul'yari harhar thukne taangthrelrouwame’ toubi beimakne chiwura. Heitounei ane aiyei raallui rapya malhetbine thimi rapbei hangra yuchangbi Paul'ya yai hangrei ruithutloubi, tengkonra urlhaknanungei chay pikur.

¹¹ Heiniyei masanungri Dunpune Paullei pongra mayungbi loushun, “Chimaklo. Nangne Keinung'tlim Jerusalem arou mayungpiwurla, heirou nangne Rome'rakhi Keinung'tlim heinakrimne mayungpirou da!”

Paul'ya Hatnanungei Munne Raangkur

¹² Thangei tlainiyei ningshunnung Jehudia'rap thane lokpane kartilbi murilkur, heitoubi yane tlou kantomrilbi, “Paul'ya hatbongyen koukhatkhi chamaimakrou,” toubi yane darilbi raangkur.

¹³ Raangna heirou kyao thimirap nammane napung somli dui.

¹⁴ Heitoubi yane Suipipu raple upa rapbei leinara wabine kyun, “Kari namyerwane khattom khoine mardingrilbi tlou kantomrilwurla, touri Paul'ya hatbongyenri ka hukhatkhi kouchakhatkhi chamaimakrou.

¹⁵ Heiyanungri asinung nangle Yama-krung rapne Rome'rei Raallui upawanung pao malhetbi Paul'ya bi arou yukruiheilaklo toubi shunthung-karsalak, touri nangne aingamrou duine chimmei pao lounileime toubine yunlak. Heiya ane bi arou yu'tlungbongnung kane aya hatnanungei lamra loumrimeise.”

¹⁶ Heiya wairangnei pao heiri Paul'yei charwiyei chawane mayekurbi, heirou ane rungbomra wabine Paul'nung pao heiya shunpikur.

¹⁷ Heirouri Paul'ne raallui macha khatdei upa khatya unglouheibi anungei shunpikur, “Nangne kartlanga douwa aya Raallui upawanung heiruilhakpilak, douwa ane anungei tlou khat shunpinung leilei.”

¹⁸ Heirou raallui macha khatdei upawane aya ruilouheibi Upawanung heiruilhakur, heirou ane kyun, “Kulla chalphopbi klei Paul'ne keiya ungloubine kartlang douwa aya neileinara ruilhakpilak toubi shunkur, ngamri ane neinungei pao khatcha yunpinung leileituei.”

¹⁹ Heirou Raallui Upawane aya hutbangra louchurloubine aitamya munne ruimartleibine tlou loukngai, “Nangne keinungei kou tlouya yunpinungei kleiyo?”

²⁰ Heirou ane kyun, “Jehudia rapbei lhou'urpu rapne ningayei tlainirouri Paul'ya Yama-krungei bira yuksundayernungei shunthungase toubine yarilwurla. Heirou yane toukarsabi Paullei ngamrou pao duine khminni ngaithinanungei toubi marshiklei.

²¹ Heiya yai shunthung tlou heiri louninglhakpimak, ngamri ya thimi napung somli duine lamra yulbine aya hatnanungei loumrimrou waiyoulei. Ngamri yane Paul'ya hatbongyenri ya hukhatkhi kouchakhatkhi chamaimakrou toubi tlou kantomrilwurla. Heini asinungri yane neitlouya loubine wairangbine leiyurame.”

²² Heirouri Raallui Upawane loushunkur, “Nangne tlou heiri keileinara shunlhakurlame touri thimi hukhatnungkhi yunpimakno.” Heisitoubi ane kartlang douwa heiya munne hilmallengkur.

Paul'ya Krung Felix'nung Heimalhetkur

²³ Heirouri Raallui Upawane aiyei raallui uparap napung-khniya ungloubine shun, “Raallui macha khni urlouheibi, sapuk tung raallui somretle raalchei shin thimi macha khnile kalhonbi, angtu masa pung-tako dalumnung Caesarea'ra wananungei marshiklaka.

²⁴ Heitoubi Paul'ne tungnanungei sapuk tha marshikbine heirou aya lhangaine ruilouheibi Krung Felixyei bira walaka.”

²⁵ Heisitoubi Raallui Upawane chethi khat mayebi manthunthungkur:

²⁶ “Claudius Lysias, choune rikrai khrumna kya, Krung Felix'nung keine karyemnei tlouya manthunlei.

²⁷ Jehudia rapne napawa aya manbi heirou aya hatnanungei wairangkhou. Keine a heiri Rome'rei thimi khatme toubi pao mayeknarou, keiyei raallui rapkou kalhonne wabine aya manlhakloukur.

²⁸ Heirou keineri aidoura klal leinei ngamrou yane theibaangpikurako toubi munnenei ngamrou, yai Yama-krungei bira yukruilhakur.

²⁹ Heiya keineri aidoura khi kyayei klalri koukhatkhi phamaklei, heirou kulla chalphopkur kyayei klalkhi aidoura phamaklei; yane aidoura yai tloulamyei ngamrou klal theibaangpinei tomngeilei.

³⁰ Heitoubi yane aya hatnanungei wairangnei paokhi keinungei mayekyerkur leilei, heingammei tallengne aya neileinara heimalhetnanung ningchakur. Heirou aya klal theibaangpi thimi rapyakhi neiyei maibongra yane aidoura yanimaknei tlou makatnanungei toubi muyerwurla.”

³¹ Heitounei raallui rapne yailhou heiya paangthutna'nungei chasundakur. Heiniyei masanung yane Paul'ya ruilouheibi Antipatris'ranung chakur.

³² Thangei tlainirouri howei raallui rapne rungbomranung yenkallengkur, heitoubi sapuk tung raallui rapya Paulkou kalhonne chananungei horkhoukur.

³³ Heirou yane aya Caesarea'bil heiruitlungbi, chethi heiwari Krungnung wapikur, heirou Paul'yakhi aihutra pilhakbi silnakur.

³⁴ Heitounarou Krung heine chethi heiwaya loupathibi Paul'ya, ‘Kou ramreiyo?’ toubi ane loukngai. Heirou ane Paul'khi Cilicia ramreime toubi munarouri,

³⁵ ane kyun, “Neiya theibaangpikur thimi rapne bi arou wa'tlungeinung keine neirouwei tlou tha ningthirou dalei.” Heitoubi ane Paul'ya aiyei cheem pongra khoubi lhangaine ngaakyernanungei chay pikur.