PAOCHA 22 - KHYINGEI PU'TLOU Bible (BSI)

¹ “Keiyei Israel paluirap, keine nai maibongra keitamyei loungana'nungei tlou kyun awaya nane louningpilaklo!”

² Ane yanungei Hebrew tloune kyun heiya yane loumayeknarou, kouhoukhi lungmakne rie louleikur; heirouri Paul'ne heisi yenyunsundakur:

³ “Keiri Cilicia ramrei klei Tarsus khukarthilra pukbine heirou Jerusalemyei bi arou Gamalialne marnopikur Jehudia khatme. Keikhi angtu bi arou klei na namyerwa'naksini, kai nutar-patar rapbei Tloulamra lhangaine shunmatupikur thimi khatme, heirou Dunpunung tharmu lhukni makatbi klei napawa khatkhi hoikhou.

⁴ Angtu anakei lamra hilthungbi klei thimi rapya keine hikur kyane marhotkhou. Heitoubi keine napawarap heirou napuiya rapkhi lhuimakne yaya manbine kulrilla khinglhakbikhi khouwurpila.

⁵ Suipipu upawa heinekhi heirou Yama-krung upawa heinekhi keiyei kyun ari chimleime toubi mupirou. Keine yairouwei Damascus'ra klei Jehudia palui rapnung mayepikur chethiya urloubine heirou keine bi heirou yubi thimi rapya manlouheibi thirruini msuibi heitoubi yaya klah-knang pinanungei toubi Jerusalem'ra yentaangheikur.

Paul'ne Aiyei Ukning Hungurnei Ngamrou Yunthutpi

⁶ “Keine heisi lam tlayeinung, Damascus'yei yultlai pongra yu'tlungrou youweinungri, nunghang tlaikallei kheenrou loumuthungmakne nungthou lhangrei kwaar khatne keiya karhilne yuk'alpikur.

⁷ Heirouri keiri thleira kanelhakura, heitoubi keinungei yukshun hou khatya keine loumayekkur, ‘Saul, Saul! Koutounei Keiya marhotkurawo?’

⁸ Heirouri keine, ‘Nangya huwo, Dunpu?’ toubi loukngai. ‘Keiri nangne marhotbi klah-knang pikur Nazarethdei Jesume,’ toubi Ane keinungei loushun.

⁹ Keikou chamalna thimi rapri kwaar heiyatom kmu, heiya keinungei yukshun heiyei hou heiri yane loumayekmak.

¹⁰ Heirou keine loukngai, ‘Keiri koutouserouwo, Dunpu?’ Heirouri Dunpune keinung loushun, ‘Nangne kanthoubi Damascus'ra wachanga, heitoubi bi heirou Dunpune neiya touyerkni lhou namyerwa neinung loushunpirou.’

¹¹ Keiri kwaar heine yuk'alwurnei ngamrou keiyei mit deokur, heisi tounarouri keile chamalna thimi rapne keiya hutbangra churbi Damascus'ra ruilhakloukur.

¹² “Khukarthil heirou Ananeas toubi ung kaiyei Tloulamya hilthung tharmu klei napawa, heirou bi heirou klei Jehudia rap nammane choune rikrai khrumkril napawa khat louklei.

¹³ Heirou ane keileinara wabi keiyei pongra wamayungbi kyun, ‘Keiteinao Saul, neiyei mitlung heiri hanui kallengne mulakasu!’ Heisitoubi kheen heirou keiyei mitlung mumanewurbi keine aya louthimanrekur.

¹⁴ Ane kyun, ‘Kai nutar-patar rapbei Dunpune neiyari Aiyei kningya muyernanung, heirou Aiyei Chimyei Pu heiwaya munanungei, heirou Aiyei kyun hou heihakya louningna'nungei khalthutpiwurla.

¹⁵ Ngamri nangne Anung'tlim tlou mayungpi thimi khat khoine, neiyei mukur heirou neiyei mayekkur heirapya thimi kantangnung shunthutpi thimi khat hoirouwa.

¹⁶ Heirou asinungri, koutounei heinak tlane ngaakbi leikurrawo? Kanthoulaka, heitoubi yui lupbi neiyei borhya kukpi phananungei Anungei shunchalaka.’

Paul'ya Gentile Rapnung Pao-laa Shunthutpinanungei Ungpi

¹⁷ “Keine Jerusalem'ra kallengkur, heitoubi keine Pukhrumna Cheemra shunchayei kaalnung, keiya kar'anyerkur, heitoubi

¹⁸ Puya loumuyerbi heirou Ane keinungei asitoubi loushunpi, ‘Khrangtoubi Jerusalem lakurkhoubine shaallaka, ngamri bi arouwei thimi rapne nangne keingamrou mayungbi tlou kyun heiwari loulhakpimakarou.’

¹⁹ Heitounei keine loumallangkur, ‘Upawa, keine Pukhrumna Cheemra wachangbi heirou neiya uklum thimi rapya manbi umkur heiri yanekhi muthungkur.

²⁰ Heirou Neinung'tlim mayungpi Stephenya hatyei'nungkhi keikhi kyao, heirou aya thlungne khingbi nanghatkur thimi rapbei phirul rapya keine mayungaakpikur.’

²¹ Puni keinung loushun, ‘Chalaka, ngamri tlatnarei klei Gentile rapbei bomra chananungei Keine neiya malhetpirou!’ ”

²² Ane heisibil phane yenyunnarou thimi rapne loukning; heiya hanuikhi yane yaiyei hou chouweimkhei ungraobi kyun, “Aya urthutloubine hatlakalo. Aya ringyerbi koukhi karsukmakrou!”

²³ Heirou yane ukningra beimakne malungkhawurbi, yai phirul rapya mathumchabi, heirou nungthou lhangra rahui katkhrebine ungraochakur.

²⁴ Heirouri Romia raallui upawane aiyei raallui rapya chay piwurbi Paul'ya tengkon rilla urlhakyerkur, heitoubi aya umyerkur, heirou Jehudi rapne aidoura heinaksi ungraochabi yunkur heiri koungameiyo toubi munanungei yaya tlou daryerkur.

²⁵ Heiya yane aya umnungei phonphopbei kaalnung, Paul'ne aiyei pongra heimayung raallui upa khatnung shunkur, “Tloulam hilthungne nanungei Rome'rei thimi khatya aidoura klal koukhatkhi phabongnung aya phonphopbi umkur ari chimrouko?”

²⁶ Raallui chaylampu upawane kyun tlou heiwaya mayeknarouri, ane raalluipu upawanung hungchangbine kyun, “Neitoukur heiya kouwo? Napawa heiri Rome'rei thimileime!”

²⁷ Heitounei raallui upawane hungchangbi Paul'nung kngai, “Keinungei shunlak, nangya Rome'rei thimiko?” “Moi, keiri Rome'rei thimime,” toubi Paul'ne loumallangkur.

²⁸ Raallui upawane kyun, “Keiri tuy chungne pibine Rome'rei thimi hoikurme.” “Heiya keiri puknarei pukphopkurme,” toubi Paul'ne loukyun.

²⁹ Heitounei Paul'ya tlou ngaithirou kyou napawa heikhi tallengne airouwei hil karshonkur; heirou Paul'ya phonbi khoukur raallui upawane Paulkhi Rome'rei thimime toubi ningmuwurnarou beimakne chikur.

Paul'ya Yama-Krungei Maibongra Myungkyer

³⁰ Raallui upawane Jehudi rapne Paul'yei doura khingbaangkur tlou heiri kouwo toubi kanreni raphathutnikur; heitounei ngamrou thangei tlainirou ane Paul'ya phonbi khoukur heiya shutdurbi, heirou Suipipu rapya, Yama-krung murilbi kartilnanungei chay pikur. Heisi toubi ane Paul'ya ruilouheibi Yama-krungei maibongra mayungyerkur.