PAOCHA 21 - KHYINGEI PU'TLOU Bible (BSI)

Paul'ne Jerusalem'ranung Shaalkur

¹ Heitoubi kane yanungei karkhainei tlouya bekhoubi shaalkur. Heirou kane mali tungbi heisi yengne heiraalwurbi, heihillouri kane Cos'ra yu'tlungkur; heitoubi thangei tlainirouri Rhode'ra yu'tlungkur, heitoubi bi heirouweine kane mali tungloubine Patara bira wa'tlungkur.

² Bi heiroukhi mali khat Phoenicia'ranung charou waiyoubi louklei heiwaya kane heichanphanarouri, mali heirou kane tungbi duinara chawurthu.

³ Heitoubi kane Cyprus'yei ramya thrilphanabil wawurbi, heirou Cyprus'yei khate lhangra mali hulloubine Syria lhangra hungkur. Heitoubi kane Tyre'ra hungtlungbi samadru ruira mali hungmathrumkur.

⁴ Bi heirou kane uklum thimirap thaya murilbi, yakou hapta khat leimalnakur. Heirou yane Lhawai Khyingei muyerkur hilthungne Paul'ya Jerusalem'ra yumaknanungei shunkhamkur.

⁵ Heiya kane yakou leimalnanei kheen yenluiwurnei ngamrou, yaya lakkurkhoubi shaalkur. Heitoubi ya nammakhi, yai nu-cha rapkhi kyaone kakou kalhonne khukarthil heirouwei samadru ruira yubi, bi heirou kane khuklu kanthrunchane khrumchakur.

⁶ Heitoubi kane khatle khat karkhainei tlouya berilbi, heirou kane malira tungbi shaalkur, heirou yane cheemranung kallengkur.

⁷ Kane kai mali lamtlaya heisi chasundabi, Tyre'rouweine Ptolemais'ranung mali hulbi yukur, heitoubi bi heirou uklum thimi rapya yumurilbi yanungei murilnei tlouya berilbi karyemkur, heirou yakou nungkhatnui leimalnakhou.

⁸ Heitoubi thangei tlainirouri kane yaya lakurkhoubi, Caesarea'ra yu'tlungkur. Bi heirou kane Jerusalem'ra watlhou churtrungnanungei khalthutkur thimi napung-eni hangrei paochawa Philipbei cheemra yarekkur.

⁹ Aiyei cha nangaka shal dunmakpi napung phalikhi Dunpuei Pao-laaya shunthutpibi louklei.

¹⁰ Kane bi heirou tlaini bei leikhouweinung, Judea'rei Agabus toubi ung thimkhui khatkhi wa'tlungkur.

¹¹ Heirou ane kai leinara wachangbi, Paullei shintlakrui heiwaya loubine, heitoubi aitamne aiyei horale hutra phonphopbi kyun, “Lhawai Khyingne atoubi yunlei: shintlakrui pu heiwaya Jerusalem'ra yuweinung Jehudi rapne aya anakrimne motphopbeirou, heitoubi yane aya Gentile rapbei hutra pilhakurou.”

¹² Kane kyun tlou heiwaya mayeknarouri, kanekhi heirou thimi dei rapnekhi Paul'ya Jerusalem'ra yumaknanungei buchakur.

¹³ Heiya ane loumallangkur, “Kouya tounanungei nane chapbi keiyei malungya kaangyerkurrawo? Keiri Jerusalem'ra yubi keiya louphonphopkur heithil nimakne, bi heirou keiri Pu Jesuei ngamrou hinanungei marshikbi leikurame.”

¹⁴ Heirouri kane aya manelchangmakura, heisi tounei kane manelya dongurbi, “Dunpuei kning hoilakasu,” toubi yunbi leithungkur.

¹⁵ Bi heirou kane kheen bei leikhoubi, heitoubi kakhi put marshikbi Jerusalem'ra yunanungei bi heiwaya lakurkhou.

¹⁶ Caesarea'rouwei ruishikrap thakhi kakou kalhonne yubi heirou yane kaya haallei waiyoubi uklumbi louklei Cyprus'rei -Mnason toubi ung napawa khatdei cheemra kaya ruilhakpibi heirou kane leikur.

Paul'ne James'ya Wathipi

¹⁷ Kane Jerusalem'ra yu'tlungnarouri, uklum thimi rapne bi heirou lhangaine kaya louropikur.

¹⁸ Heitoubi thangei tlainirou Paul'ne kakou kalhonbi Jamesya wathipi; bi heirou Churchyei uparap nammakhi kaihangra kyao.

¹⁹ Heirou Paul'ne yaya murilnei tlou yunbine karyempikur, heitoubi ane yanungei, aiyei lhou tounara Gentile rapnung Dunpuei toupikur lhoubom rapbei ngamrou tlungne namma shunthutpikur.

²⁰ Aiyei kyunya ningkur hillouri yane Dunpuya mathangkur. Heitoubi yane kyun, “Kaiyei teinao Paul, Jehudiyei thimirap kounak chungne uklummura, heirou yane Tloulamya kounak klune ngaakbi leilei touri nangne kmu.

²¹ Bi arou klei Jehudi rapne pao heiwaya mayekkurla touri nangneri Gentile rapbei ramra klei Jehudia rapnung Moses'yei tloulamya lakurkhoulaka, heirou yai chanao rapya murdinnei lhoukhi toumaka, heirou Jehudi rapbei youknakhi chanthungmaka toubi nangne marnopiwurla.

²² Arouri nangne bi arou yu'tlungurame touri yane mayekurlarou. Heiyanung yane kousi touleikhiyo?

²³ Asinungri kane neiya touyerkniri asitoubi leilei, kaihangra yaitam tlou kantombi klei napawa napung phali leilei.

²⁴ Nangne yaphalikou kalhonne chabi, yaihangra yaothungbi, marthingthutnei cherni heirou yaowalo, heitoubi yai changbom thuk nammaya piwurlak, heiyanungri yane yai lurei shamya ngoumathaikur manerou. Heisi toulanungri yane neingamrou mayekkur lhoubomrap heiri koukhatkhi klal yaomakme toubi thimi kantangne mupharou, heitoubi nangkhi Moses'yei tloulamya hilthungbi kleime toubi munarou.

²⁵ Heiya uklumkur Gentile rapnungei kane chethi mayebine pao shunthungurla, touri yane thrainungei makatkur chamaiput, nimanung anhee, nimanung sraltang-an heirou metu ankhi mainung yamakrou, heirou yane napuiya-napawa chorit naimakne phitho tilrilbine borhyernungkhi yamakrou toubi kane darilwurla.”

²⁶ Heisitoubi Paul'ne thangei tlainirou yaya ruilouheibi yakou pulne marthingyernei lhouya toukur. Heitoubi Paul'ne Pukhrumna cheemwaira wachangbi, yai marthingthutnei knei heiri kouninung luilhakrouwo toubi muyerbi, heirou ya napung kantangne khrumna putya makatkur.

Paul'ya Pukhrumna Cheemwairei Mankur

²⁷ Heiya tlaini enini yenluiwairou, Asia khokulrei Jehudia thimirap thane Paul'ya Pukhrumna Cheemwaira mulhakur. Heirou yane thimi rapya shunkantlangbi Paul'ya mankur.

²⁸ “Israellei thimirap!” toubi yane paobi kyun, “Kaya trungpilaklo! Kouweiyo toulanungri, napawa ane bi kantangrou yenchaheibine thimi kantangnung Israel rapya, heirou Moses'yei Tloulamyakhi, Pukhrumna cheem ayakhi karhayei tlouya yunpilei. Heirou asinung ane Gentilerap thaya yenruilhakbi Khyingei Pukhrumna Cheem ayakhi borhyerwurla!”

²⁹ (Yane heitoubi kyun heiri Ephesia'rei napawa Trophimus'ya khukarthil rilla Paulkou kalhonne klei heiwaya yane mukur, heirou Paul'ne aya Pukhrumna Cheemra ruilhakurlame toubi yane ningchakur.)

³⁰ Khukarthil heiyei thimi rapne biso-bibalkhi naimakne tamungurbi, ya nammane lokpa kartilbine heitoubi Paul'ya mankur. Heitoubi yane aya Pukhrumna cheemrei taangthutloubi Cheem heikhi thungkur.

³¹ Heirou Jerusalemei thimirap nammane fyoubi Paul'ya hatnanungei wairangura tounei pao heiya Rome'yei raallui upawanung malhetbine muyerkur.

³² Heitounei raallui chaylampu upawane aiyei raallui upa raple aiyei raallui dei rapya ruilouheibi thimichung kartilnaranung khnotni wakur. Heirou thimi rapne aya raallui raple kalhonne wa'tlungkur heiwaya loumunarouri yane Paul'ya umbi louklei heiri loudongkur.

³³ Heirou raallui pu upawane wachangbi Paul'ya manlouheibi aya thirrui khintamni phonphoplak toubi chay pikur. Heirou ane tlou kngai, “Napawa ari huwo? Ane koulhouya touwurkhoulawo?”

³⁴ Heirouri thimirap thane ungraobi tlou khat loukyun, heiya thaneri tlou khatya loukyun. Heitounei bi heitamrou nammane bibalkhi naimakne leikur heirouri raallui upawa heine ‘bi heitamrou kou lhouya toukurro’ tounei chimmei paoya muchangmakura, heitounei ane aiyei thimi rapnung shunbi Paul'ya raallui tengkon rungbomra urlhakyerkur.

³⁵ Heirouri tengkon shumtrum waphane yane akou kalhonne heichanthungkur, heitoubi raallui rapne aya kar'umphopbi ruilhakloukur, ngamri thimirap heiri beimakne thuithikur.

³⁶ Ya nammane aihilla heichanthungbi, “Aya hatlaklo,” toubi yunbine heitonlhakur.

Paul'ne Aitam Loungananung Kyun

³⁷ Raallui rapne aya tengkon rilla ruilhakbong chekrou, ane Raallui upawanung buchakur, “Keine neinung tlou khatcha yunneise, yarouko?” Heirou raallui upawane, “Nangri Greek tlou yunmaneko?” toubine anungei loukngai.

³⁸ “Heiyanungri a'tlakei maibong tlainirou raal kyou thimi lishing phaliya raal younanungei ramhangra ruithutloukhei Egyptbei napawa heiri nang nimako?”

³⁹ Heirou Paul'ne loumallangkur, “Keiri Jehudiame, Cilicia'rei lilkhoi khukarthil Tarsus'ra pukbine tangbaangkur napawame. Malungshipibi keiya thimi rapnung tlou beicha yunyerpilaklo.”

⁴⁰ Heitounei ngamrou raallui upawane Paul'ya tlou kyun yayerpinarouri, ane shumtrumyei chouna bira katmayungbi, thimi rapya hou lungmaknanungei aiyei hutni heiyaapkur. Heirouri yane hou lungmakne louleiyeinung Paul'ne yanungei Hebrew tloune yunyoukur.