PAOCHA 14 - KHYINGEI PU'TLOU Bible (BSI)

Paul'le Barnabas Yakhunta Iconium'ra Wa'tlung

¹ Heirou Iconium'rakhi heinakrim thukkur: Paul'le Barnabas yakhune Pukhrumna Cheemra wachangbi heinakrimne shunthutpikur, heirou Jehudi raple Gentile rapkhi chungne uklumkur.

² Heiya uklummak Jehudia rapne Gentile rapya thouplangbi heitoubi yaya uklum thimi rapkou karhourilyerkur.

³ Paocha rapne bi heirou kheen tlane leikhoubi, heirou yane Pu Jesuei ngamrou krakne mayungpinei tlou yunpikur. Yane thimi rapnung kngakei lhou rapya heirou thimine touchangmak lhou rapya tounanungei mantrang piyerbi yai shunthutpikur paolaa heiri chimhakme toubi muyerkur.

⁴ Heirouri khukarthil heiyei thimi rapri rulkhni thukne lhang-lhang darilkur: thimi thane Jehudi rapbei lhangra leikur, heirou deine Paocha rapbei lhangra kalhopbi tlou yunkur.

⁵ Heirouri Gentile'rap thale Jehudia'rap thane, yaya ruipipu raple pulne kartilbi, heitoubi yane Paocha rapya manbi thuithine mareknabi heirou thlungni khinghatna'nungei tlou darilkur.

⁶ Paocha rapne heinak paoya mayeknarou yane Lycaonia'rei klei Lystra'le Derbe khukarthil rapra heirou ram heiyei karhillei klei khokul rapra truk-kartleikur,

⁷ heitoubi yane bi heirou Lhangaiyei Pao-laa shunthutpikur.

Lystra'le Derbe'ra Yutlungkur

⁸ Lystra khukarthilla puknarei waiyoubi ho deekurbi tekhi karwaichachangmak napawa khat louklei.

⁹ Ane bi heirou ombine Paul'ne marnopikur tlou rapya ningbi heiklei. Paul'ne ningmukur touri, ane uklummanungri aiyei hodeek heiri lhangaikur manerou, heitounei ane napawa heiwaya thimanthrambine,

¹⁰ heitoubi hou choune ungraobi kyun, “Neiho heiri katmayung'englak.” Heitounei napawa heine kanthoubi chunchane karhilne karwaichakur.

¹¹ Heirou thimi rapne Paul'yei touthutkur lhou rapya muwurnarou yane Lycaoniayei tloune, “Thrai rapne thimirung holbi heirou kaihangra yongchangurame,” toubi ungraobine yunyoukur.

¹² Heitounei yane Barnabas'ya Zeus, heirou Paul'yari Hermes toubine min thulpikur, ngamri Paul'ne ruibi tlou yunkur.

¹³ Heitoubi khukarthillei purei sabi klei Zeus thraishangei lhou'urpu upawane halpa thale, heirou paarrui riengbine palthungra heithulthutkur, ngamri ane thimi raple kalhonbi Paocha thimi rapnung makatdurbi kna thuinikur.

¹⁴ Heiya Barnabas'le Paul'ne yai toukur lhou heiya mayeknarouri, yane yai phirulya threlwurbi heitoubi thimi rapbei tlakra ungraochane chanlhakbi shunkur,

¹⁵ “Thimirap, nane kounungei anakei lhouya toukurrawo? Kakhi na'nakrim tlaipang thimi rapme! Kari bi arou Lhangaiyei Pao-laaya shunthutpinanungei mayungbi kleime, heirou naya anaksi karsukmak lhou rapya toubi leinarei Thangmun-tlaipang, samadruya, heirou heirapbei rilla ringbi klei chiwi nammaya sheempipu Khring Dunpuei lhangra hollhakyernanungei toukurrame.

¹⁶ Bongei chaanrouwei Dunpune tlaipang thimi nammaya ai'aiyei toukni lhoulamra chayerkhou.

¹⁷ Heiya Ane lhou kantangra thimi rapnung A leileime toubi lhangaiyei lhou rapya mutkhoupila: Ane nanungei nungthourei nung rosundayerbi, heirou trunwaikhi kumchaan chane pukthutyerbi heikhi heiyerpilei; Ane nanungei chamainung murchak thulpibi naiyei ukningra nungkngaini thimyerpilei.”

¹⁸ Bi heirou Paocha rapne heinakya yunpibikhi, thimi rapne yanungei khrumna put makatrou kyou heiya dongyerrouri kluni thukkur.

¹⁹ Pesidia Khokulyei Antioch khokulrei heirou Iconium khokulrei thimi rulkhatne wabine thimi rapya fyoubine, heitoubi yane Paul'ya manbi thlungni khingtlui-lhakkur; heitoubi aya khokulyei pura taangthutbi, hiyurame toubi khalbine aya lakkurkhou.

²⁰ Heiya uklum thimi rapne aya karhilne mayungbi trungpikur heirouri ane kanthoubi khokulra yenkallengthu. Heitoubi thangei tlainirou ale Barnabas yakhu kalhonbi Derbera wachangkur.

Syria'yei Antioch'ra Yenkallengkur

²¹ Heirou Paulle Barnabas yakhune Derbe'rakhi Lhangai Pao-laa shunthutkhoubi, heitoubi yane Pisidia'yei Antioch'ranung kat-kallengeinung Lystra'le Iconium'rakhi katchangkhei.

²² Heirou yane uklum thimi rapya chimmei malungamkna thimirap khoine leinanungei ukning thoubaangpiwurkhou. “Kane klah-knang kounakya yendouheibine Dunpuei Krungramra changnanungei tourou da,” toubi yane shunmatupikhou.

²³ Heitoubi yane Church kantangra uparap khalthutbine, heirou chamainung murchak ngeile kalhonne yane shunchapibi Dunpuei lhoura yaya malungamkna kleini watyilpikur.

²⁴ Yane Pisidiayei ram karyoune karwaichakhoubi heirou Pamphylia'ra yongchangkur.

²⁵ Heitoubi yane Perga'ra Pao-laa shunthutkhoubi, Attalia'ranung wakur,

²⁶ heitoubi bi heirouweine mali tungbi, heirou yaya watyilbi Dunpuei kringpina rilla leibi lhou luilhakurna bi Antioch'ra hanui yenkallengkur.

²⁷ Heirouri yane Antioch'ra hungtlungbi, Churchyei thimirap nammaya ungmartilkur, heitoubi yanungei Dunpune kalhonpibi touwurkhou lhou rapbei ngamroule, heirou kousitoubi Gentile rapnung uklumnanungei Dunpune lam laatpikurro tounei ngamroukhi yanungei khminni yunthutpikur.

²⁸ Heirou yane bi heirou uklum thimi raple kalhonbi kheen tlane leiwurkhou.