NEHEMIAH 9 - KHYINGEI PU'TLOU Bible (BSI)

Thimi Rapne Borh Shunthutrilbi Ukning Hungkur

¹ A'tanglayei somnile-phali tlung tlainirou Israellei chanaorap nammane kartilbine, chara yilbi, phi'mtum upbine, heirou lura rahui khrebaangbine lhawai klahne chap'kanrelkur.

² Heitoubi Israellei chanao rapne Lim deirei thimirap nam'rouwei yaitam laini kanshangthutkur, heitoubi yane mayungbine yaimshaei borhya shunthutrilbi, heirou yaiyei nutar-patar rapbei borh rapkhi shunthutbine ukning hungkur.

³ Heisitoubi yane tlaini heiyei nunghangfchip mayungbine yai Dunpu Umpuei Chaytlou lailikya pabine leikur, heitoubi heiniyei yenrawaikur heirouri yane ukning hungbine, heirou yai Dunpu Umpuya khrumbine leikur.

⁴ Heirouri Levia raprei Jeshua, Bani, Kadmi-el, Shebaniah, Bunni, Sherebiah, Bani, heirou Chenani ya rapne turngdoura mayungbine, heitoubi yaiyei Dunpu Umpunung hou chouni ungraobi khrumkur.

⁵ Heitoubi Levia raprei Jeshua, Kadmi-el, Bani, Hashabneiah, Sherebiah, Hodiah, Shebaniah, heirou Pethahiah ya rapne kyun, “Kanthouwalo, heitoubi Umpu naiyei Dunpuya klui naimakei klui naimakne phor pilaksu! O Neiyei thang'allei minya phor pilaksu; heirou namyerrei doura phorle kalhonne mathanglaksu!”

⁶ Nang'tomngeime Umpuri, Thangwanya Nangne sheemkhoupi; Thangwanle heiyei rillei klei kinni, sorwa heirou tangla rapyakhi; Shimlei-thleikhi heirou heiyei doura ringbi-paalbi klei heenglim-rolim, yaalim-yoolim rapkhi; Samadru rapkhi, heiyei rilla ringbi klei chiwi rapkhi, Nangne sheemkhoubi ringyerpikur. Heitoubi Thangmunrei Thangring rapnekhi Neiyei maibongra kanellhakbi khrumlei.

⁷ Nangri Dunpu, Umpu, Nangne Abram'ya khalthutkur, heitoubi Chaldea rapbei ram Ur'rouwei ruithutloupi; heitoubi aiyei min Abraham toubine thulpikur.

⁸ Nangne aiyei solungya Neiyei bomra malungamkna khat khoine raphamukur, heitoubi anungei tloubom khat mardingpibi Canaanyei ramle, Hittia rapbei, Amoria rapbei, Perizzia rapbei, Jebusia rapbei, heirou Gargashia rapbei ramya anungei heirou aiyei yu-cha rapnungei piroume toubine mardingpikur. Heitoubi Nangne Neiyei kantompikur tlouya tlungyerpikur; ngamri Nangri tharmu chimmei Pu.

⁹ “Kai nutar-patar rapne Egyptra klah-mrimkur heiwaya yukmupikur, heirou Mrao-Samadru'ra yaiyei ungraochakurya Nangne loumayekpikur.

¹⁰ Heirouri Nangne Pharaoh'ya yanimakne heirou aiyei lhou'urpu raple, airamyei thimirap nammaei maibongrakhi kngakei lhou kounakya touthutbine mutpikur. Ngamri yarapne kai nutar-patar rapbei doura lhangaimak thuithini toupiwurkhou heiwaya yukmupikur. Heitoubi angtu tamphaei klei naksine Neiyei minya chayernanungei toukurame.

¹¹ Heirou Nangne yai maibongra Samadruia toukarkhaikur. Heisitoubi yane samadru tlairei thlei taarna doura lamtlabi ralthutkur; heisitoubi yaya heihulthung thimi rapyari Nangne yuilhoura thlungmtum khinglhakbi martlaokur heinakni dumphopyerkur.

¹² Heitoubi nunghangei kheenrouni Nangne yaya rameidangei shutlaine lam ruipikur, heitoubi masanungri meiyei shutlaine lam ruipibi yai lamtlabi chana lhangra waaryerpikur.

¹³ Heirouri Nangne Sinaiyei Lhungdoura yongchumpikur, heitoubi Nangne thangwanrei yanungei tlou yukshunkur. Heisitoubi Nangne yanung tharmu chimmei kulyom lammitle, Puwatlhouwei lammit heirou Chaytlou lammit rapya yukpisundakur.

¹⁴ Heisitoubi Nangne yanungei Neiyei Khying Mathrilni heiwaya muyerpikur. Heitoubi yanungei'tlim Chaytlou raple, kulyomei youkna lammitrap heirou Puwatlhouei lammit rapya Moses'yei hutra malanthutpikur.

¹⁵ Heirou yane msulyei kheenrou Nangne yanungei Thangwanrei cha'kmai putya yukpisundakur. Heirou yaiyei yuikhatya khrahyernanungei Nangne yanungei tuysirya phayerpikur. Heitoubi Nangne yanungei mardingpiwurkhou ramra wachangbine ramkalnanungei Nangne yaya shunpikur.”

¹⁶ “Heiya kaiyei nutar-patar rapneri khril thuithiyei lhou touwurbi, yaiyei ukning kalyerbine, heirou Neiyei Chaytlou rapya ninglhakpimakkur.

¹⁷ Heiya yane kyunya ninglhakmakne, Nangne yanungei toupikur kngakei lhou rapya malumwurkhou. Heisitoubi yaiyei ukning kalyerbi napal touwurbi, yai Egyptbei nai'bomra hanui kallenglhakna'nungei ruichingpi pu khat khalbangurthu. Heiya Nangri kukpikhei Pu Dunpu khat, heirou kringpikhei heirou malungshipi khei Pu, heirou kanthrampi khei, malungkha'termak Pu Dunpu. Heineri Nangne yayari khingurkhoumaklei.

¹⁸ Heirou kai nutar-patar rapne yaitam halshun lhaya sheemthutbine, ‘Awari naya Egyptrei yenruithutpikur Dunpu,’ toubi yunbine beimak machinknaei lhouya toukhoubinekhi;

¹⁹ Nangneri yaya beimak kringpi kheini malungshikhou; heitoubi yayari ramthingra khingurkhoumaklei; heirou rameidang shutlaine lakkhoumakne nunghangnung yaya lam ruipikhoulei; heirou masanungkhi meiburyei shutlaine yaya lakkhoumakne lam ruipibine, yai charou'youna biya waaryerpikhou.

²⁰ Heitoubi Neiyei lhangai Lhawaini yaya lhangai-karbilne shunmtupilei. Nangne yai takarei Neiyei yukpikur manna'ya thapthutloumaklei. Heitoubi yane yui hatyeinungkhi Nangne yanungei tuysir yukpilei.

²¹ Tanghakpani, Nangne yanungei kum somli ramthingra murchak watmakne thulpikur, heingammei yanungei koukhatkhi kwatsam leikhoumak; yaiyei phirul-phishamb rapkhi mankur-cheetkur toukhi naikhoumak, heirou yaiyei homai rapkhi porthutkur toukhi leikhoumaklei.

²² Heirou Nangne yanungei Krungbom rapkhi, heirou Lim rapkhi pikur; heitoubi Nangne yanungei ramlim rapya ri-wadongna phane piwurkhou. Heirouri yane Heshbonyei Krung Sihon'yei ramle, Bashan'yei Krung Og'yei ramkhi kulchalbi ram kalyerkur.

²³ Heitoubi Nangne yaiyei yu-cha rapya nungthourei sorwa naksine mshing chungyerkur; heitoubi Nangne yaya yai patar rapya wachangbine ram kalnanungei shunpiwurkhou ramra yenruilhakpikur.

²⁴ Heisitoubi yaiyei yu-cha rapne ram heiwarou wachangbine ramkalbi yuldakur. Heitoubi Nangne Canaania rapbei ramra yuldabine louklei thimi rapya yaimaibongra namsundawurbi kulchalyerkur. Heitoubi Nangne Canaania rapyari yaihutra pilhakurbine, yaiyei Krung raple, heirou ram heirouwei thimi rapyakhi yaiyei toukni hilthungne lhou touyerkur.

²⁵ Yane raalpal kuikoolkur khukarthil rapya lukloubine, heirou marngirkur ramkhi lukloukur. Heitoubi yane lhangaiyei putchei rapne bilthimbi klei cheem-kei rapkhi wachangbine leikhalkur, heirou lungthilrei yuiphum rapkhi, heirou darkha yekul rapkhi, heirou Olive heengyao yekul rapkhi, heirou heitrung rapkhi lukloubine kalloukur. Heisitoubi yane heirapya chamaibine katmarnamkur. Heitoubi yane Neiyei lhangaiya hakrao-nungkngai hoinakur.”

²⁶ “Heiya yari Neiyei kyunya ninglhakmakne, Neiya karhane raal youkur, heitoubi Neiyei chaytlouya hil'lhangra khingurkhoubi, yaya touchimpibi Neinungei yenruimallengnungei shunpikur thimkhui rapya yane hatdurpi, heitoubi Neidoura yanimakne kyun.

²⁷ Heitounei ngammei Nangne yaya marhotpikur thimi rapbei hutra pilhakwurbi klah-mrim nangei kalnung yane Neinungei ungraobi buchayei kheenrou, Nangne Thangmunrei yaiyei houya louningpikur, heitoubi Neiyei malungshi-kringpi kheiyei ngamne Nangne yaya marhotpikur thimi rapbei hutrouwei kalthutpi pu rapya yanungei yukpikur.

²⁸ Heiya yane mathril phakurle tallengne hanuikhi Neiyei mit'thrilna maibongra lhangaimak lhouya touwurthu. Heitounei ngammei yayari Nangne yaiyei yeekna thimi rapbei hutra pilhakurbi, heirou yeekna thimi rapne yaya kulchallurbi yaidoura pu hoikur. Heirou yane Neinungei chapni ungraocha'yei kallou, thangmunrei Nangne yai shunchakurya ninglhakpithu, heitoubi Neiyei Kringpikhei hilthungne Nangne yaya kalleng-kalleng kalpikur.

²⁹ Heitoubi Neiyei chaylam lhangra ruimallengnanungei yaya shunmatupikhou, heiya yane ukningra tangchawurbine, Neiyei chaytlouya chanthungbi ringnanungei hoiyerbikhi yane Neiyei chaytlou rapya yamakne khingurkhoula. Heirou yane napal toubi Neiyei chaytlou rapya ninglhakpimakur.

³⁰ Heisiya hoiyanungkhi Nangneri kum kounak tlane yaya kanthrambine doupikur. Heitoubi Neiyei thimkhui rapbei karyunra Nei Lhawaine yaya shunpiwurkhou, heiyanungkhi yane Neiya ninglhakpikhoumak. Heitounei ngammei yayari Nangne ram heiyei lim rapbei hutra pilhakur.

³¹ Heisiya hoiyanungkhi, Neiyei kringpikhei tangnei ngamrou, Nangne yaya toudongurpimaklei, heirou khingurbi lakkurkhoupimaklei. Kouweiyo toulanungri Nangri kringpikhei heirou malungshipi'khei Pu Dunpu.”

³² “Ngam heineri asinungri, O kngak'khatdei Mane-mantrang thang'allei Pu kaiyei Dunpu, Nangri malungshi khei, heirou kantombine mardingrilkur tlouya baimakne kngak Pu; Assyria'yei Krung rapbei chaanrouwei angtu ramphaei rilla kaidoura, kaiyei Krung rapbei doura, Krungei chanao rapbei doura, kaiyei suipipu rapbei doura, kai thimkhui rapbei doura, kai nutar-patar rapbei doura, heirou Neiyei thimirap nammaei doura dawurkhou klah-mrimkur heiwaya Nangne malumpimaklo.

³³ Heisiya hoiyanungkhi, Nangri kaidoura thukwurkhou lhouthukrap heinung'tlim tharmu chimni thilhakbi toupikhou; kouweiyo toulanungri Nangri malungamknaine thilhakpikhou, heiya kaneri ukning lhangaimakei lhouya touwurkhoula.

³⁴ Kouweiyo toulanungri kaiyei Krung rapne, kaiyei ruichingpi pu rapne, kaiyei suipipu rapne heirou kaiyei nutar-patar rapneri Neiyei chaytlouya hilthungne chanthungkhoumaklei, heirou yane Neiyei chaytlouya ninglhakkhoumaklei, heirou Neiyei yanungei shunmatupikur tloulhang rapyakhi loulhakpikhoumak.

³⁵ Heiya yaneri Nangne yanungei piwurkhou lhangai-nungkngaiyei ramra, heirou yai maibongra tangne tlathutpikur marngirna ram, yaiyei Krungram heirouei leibine Neiya khrumbi watlhoukhi toupimakura, heinung'tlimri khril lhangaimak lhourei mai kallekthutmakura.

³⁶ Heiya thilak, angturi kari shok hoiwurchiya, heirou kai nutar-patar rapnungei ram heirouwei trunwai hei rapya chamaibine nungkngai-hakraone leinanungei Nangne piwurkhou ramra kani leibi, thilak kari shok hoiwurchiya.

³⁷ Heirou kani borh touwurnei ngamrou, ram heirouwei putthuk trunwairap nammakhi Nangne kaidoura pu khoine khoupikur Krungrap'nungeidik hoiwurchiya. Heirou yaiyei kning hilthungne kai dourakhi heirou kaiyei ui-waa rapbei dourakhi yai toukniya toubine pu khoine kulchalbi leiwurchiya. Heingammei kari klah-mrimne thimmurame.”

Thimi Rapne Yarilbine Mayerilbi Shoi Toukril

³⁸ “Asinungri tloubomrap namma heinung'tlim kani yarilbine myerilwurla; heitoubi yarilbi myerilkur che heiyei doura kaiyei ruipipu rapbei, kai Levia rapbei, heirou kaiyei suipipu rapbei simanlha namma nambaangkur.”