NEHEMIAH 8 - KHYINGEI PU'TLOU Bible (BSI)

Ezra'ne Kulyom Rapnung Chaylamya Pathutbine Ningkyer

¹ Heirou kulyom thimirap nammane ukning khatsi khoine malknaine Yuiso lhangei Palshung mangkhalla kartilbine leikur; heitoubi yane lailik maye'thimi Ezra'ya shunbi Umpuni Israel rapnungei piwurkhou Moses'yei Chaylam lailikya louthutyerkur.

² Heirou suipipu Ezra'ne tlun-eni tlung tanglaei lamkri tlainirou Moses'yei chaylam lailik heiwaya kartilbi klei napawa, napuiya heirou chaylam rapya phab dane ninglhak'khei kulyom nammaei maibongra louthutbine yenthutpikur.

³ Heitoubi ani lailik heiwaya Yuiso lhangei Palshung mangkhalla omkartilbi klei phabdani ninglhakmani napawa, napuiyarap nammaei maibongra ningshun waiyoubine rawaiphane pabi sherthutpikur.

⁴ Heirou maye'thimi Ezra'ne heinung'tlim sabaangbi khoukur turng doura mayungkur, heirou aiyei thya lhangrane Mattithiah, Shema, Anaiah, Uriah, Hilkiah heirou Maaseiah ya rapne mayungbine heiklei; heirou Pedaiah'le, Mishael, Malchijah, Hashum, Hashbbaddanah, Zechariah, heirou Meshullam ya rapne aiyei thyoi lhangra mayungbine heiklei.

⁵ Heirou Ezra'ne thimi rapbei mit'thrilna maibongra lailik heiwaya yuklaatkur, kouweiyo toulanungri ari thimirap nam'rouwei chouduini mayungkur; heirou ani lailik heiwaya yuklaatdei kalnung thimirap nammane kanthoubine mayungkur.

⁶ Heirouri Ezra'ne tangdui Dunpu Umpuya phor pikur. Heirouri thimirap nammane hut mlambine, “Amen! Amen!” toubi loukyun. Heitoubi yane thleira mai sikhuplhakbine Umpuya khrumkur.

⁷ Heirou Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah yarapnekhi heirou Levia rapnekhi chaylam rapya, thimi rapne ai'aiyei bira leiyei kalnung phab dananungei khminni yunpikur.

⁸ Heisitoubi Dunpuei chaylam lailikrei latbine, pathutbi kandangne arthakhi mallengthutpikur; heisitoubi yane lhangaine phab dane ninglhakkur.

Umpu ei Khying Tlaini

⁹ Heirouri Tirshatha touri Rampu Nehemiah'le, Pu'tlou maye'thimi suipipu Ezra'le, heirou Levia'rap nammane thimi rapnung shun, “Angtu tlaini awari naiyei Dunpu, Umpunungei khying tlaini khat; nani lhawai lahmak, heirou chapkhi chapmaklo.” Kouweiyo toulanungri thimirap nammane chaylamei tloulhang rapya pathutyeinung loumayekbi chapkur.

¹⁰ Heirou Nehemiah'ne shun, “Nane shalbi chak-an tui-tuiya chamailaka, heirou darkha yui ran simsimya mongbine harao-nungwaiyalo; heitoubi chamainungei marshikchangmak thimi rapnungeikhi khaithutbi siruk tampilak; ngamri angturi kaiyei Pu Dunpu'nungei khying tlaini khat. Nane lhawai klahne kanwangmaklo; kouweiyo toulanungri Umpura hakrao-nungkngaiyo touri naiyei mantrang hoikna.”

¹¹ Heisitoubi Levia rapne thimirap nammaya, “Naimalung damne leiyalo, kouweiyo toulanungri tlaini awari khying,” toubi yunbine ridaine rehyerkur.

¹² Heirouri thimirap nammane ai'aiyei biranung shalbine chamainungei marshikkur, heitoubi marshikthungmak thimi rapnungeikhi khaipibine, chamaibi Kneikhi tangne markhulbine langthoukur; ngamri yanungei shunmatupikur tloulhangrap heiwari yane phab dane ningmuwurla.

Cheemtlun Knei Markhul

¹³ Heirouri khnini tlung tlainirou cheemkhur namyerwaei uparap nammale, suipipu raple, heirou Levia rapne chaylamei tloulhang rapya lhangaine mulhaknanungei toubi Pu'tlou marnopipu Ezra'yei leina bira wakartilkur.

¹⁴ Heirou Umpune Moses'nung piwurkhou Chaytlou rapya Chaylam Lailikra asitoubi mayelhakbi louklei heiwaya karthangkur, touri ‘Israellei chanao rapne tlun'eni tlung tanglaei knei lhunyeinung khampak matru rapbei rilla leirou da.’

¹⁵ Heisitoubi yane Jerusalem rilla heirou heiyei karhillei klei khukarthilrap heirou yultlairap nammarakhi paothutbine khulpao chilkur, “Lhungdoura kabine heitoubi Chaytlou lailikra mayewurkhou heinakrimni khampak matrurap sabnanungei Olive heengbanrap, kangwoi banrap, myrtle banrap, heirou heengnbur thatha rapya khribloubine yenheilaklo.”

¹⁶ Heisi tounarouri thimi rapne lhungdoura kakawurbi, heitoubi heeng'nbur rapya yenkhrib'heibine, ai'aiyei cheem shangkai dourale, heirou ai'aiyei yuntlangmaira, heirou Dunpuei Pucheem mangkhallakhi, heirou Yuiso lhangei Palshung shumtrum maibongrakhi, heirou Ephraim Palshung shumtrum maibongrakhi khampak matrurap makhupbaangkur.

¹⁷ Heisitoubi raalmanbi leikhounarei yenkallengkur kulyomrap nammane khampak matru sabine heitoubi heirapbei rilla kallebi leikur. Israel chanao rapne Nunyei chanapawa Joshuaei chaanrouwei waiyoubine heiniyei tlainiphane heinaksi khampak matru samakne leiwurkhou. Heisitoubi yane beimak hakrao-nungkngaine langthoukur.

¹⁸ Heirou Ezra'ne tlainiserrou kyou'rouweine kluiphane Dunpuei Chaytlou lailikya pabine leikur. Heisitoubi yane tlaini eninibil knei lhunbine chotni tlung tlainirou yane chaylamra mayewurkhou hilthungne khyingei kulyom khultil khat kartilkur.