NEHEMIAH 6 - KHYINGEI PU'TLOU Bible (BSI)

Yikna Thimi Rapne Nehemiah'yei Doura Manraangkur Lhou

¹ Trum heirouri asitoubine hungthukura, touri, keine raalpal heiwari putnabi heirou karsamna bi khatchatomkhi karkulmakne sakhalwurbi luilhakurlame tounei pao heiwaya Sanballat'le, Tobiah heirou Arabia Geshem'le heirou kaya yeekna thimirap nammane mayekurla. Kheen heihakrouri keine palshung shumtrum rapri cheemkhar paalbaangchimakne leileihui.

² Heirouri Sanballat'le Geshem'ne keinungei pao heimalhetbine asitoubi shunthungkur, “Wawalo, kani Ono'yei phaikar Chephirim'ra pulni murillase.” Heiya yaneri keiya touyemnanungei muni manraangbi leikur.

³ Heisi tounarouri keine pao-ur thimi rapya heimalhetbine washunkyer, “Keiri lhou kalni churleihuime, heineri keiri bi heirou yuchum manimakrou. Koutoubi keine neileinara yuchumbi keiyei lhou churya toudongrouwo?”

⁴ Heisitoubi yane keinungei heiyei ngamrou pao phalibuirek heimalhetbi shunthungkur, heirou keinekhi heiyei ngamrou shunthungleiyen pao heisi loumallengpikur.

⁵ Heirouri Sanballat'ne tloubom heiyei ngamrou phangabui tlung chethi khat mayebine lhomphopmakne aiyei shok khatdei hutra manthunbi keileinara heimalhetthu.

⁶ Chethi heiyei tloulhang rapri asitoubine mayelei: “Lim rapbei hangra asitoubi paotamlei, heirou Geshem'nekhi pao heiwari chimme toubine yunlei, touri nangni, Jehudia rapri raal younungei wairangurame toulei; heitounei ngammei nani raalpal heiwaya hanui kallengne sabaangkurame. Heitoubi pao heiyei hilthungneri, nangri yaiyei Krung hoinanungei marshikkuralei.

⁷ Heirou nangni Jerusalem'ra, ‘Judah'ra Krung khat leiyurame!’ toubi paothutyernanungei thimkhui rapkhi khalthutdurlame. Heineri asinungri paotamkur tloubom heiyei hilthungne Krungnungei paotambi tlungyerrouwa. Heineri asinunghak kane pulne omkartilbi kartongrillase, yuwalo.”

⁸ Heirouri keine pao-ur thimi khat loumalhetbine anungei shunkur, “Neiyei kyuntlou heihakpari koukhatkhi toukhoumak, heiya neitammei ukningra ningthutbi yunmareknei tlouroume.”

⁹ Kouweiyo toulanungri ya nammane kaya touchiwurbi lhou churchangmakne hut karyimwurbi raalpal sabaang heiwari luilhakmakurasu toubine ningchabi markholkur. Heiya keine, “Asinungri keiyei hut mantrangyerpilaklo, O Dunpu,” toubine shunchakur.

¹⁰ Heirou keine Mehetabel'yei chanapawa Delaiah'yei chawa Shemaiah'ne cheemwaira thungphopbi leiyei kalnung aicheemra wachangeinung ani keinungei loushun, “Kakhuntani Dunpuei Pucheem rilla wachangbine murillase, heitoubi Pucheemyei cheemkhar rapya thungphopbine leiyase, ngamri yane neiyari masanung hatnanungei raphabine leiyura. Yane masanung wabine neiya hatrouwa.”

¹¹ Heiya keine loukyun, “Keinaksi napawa khatniya heirouwei loutrukrou dako? Heirou kei awari kounaksi thimime tounei ringnanungei Pucheem rilla truklhakrouwo? Keiri heiyei rilla truklhakmakrou.

¹² Heiya keitam keiyei ukningra ningmuwurla, touri tanghakpani Dunpune ayari watyilkurri nimaklei, heiya Tobiah'le Sanballat yakhuntani aya neekbine keiya yanimakne Pu'tlouya shunthutyernei tloulei.

¹³ Yane aya neekbine keiya toumathunbi, heitoubi keiya mral dayerbine, keiyei minya thuithiyerbi rikrai phayernanungei toubi ningchabi rangurnei tlou.

¹⁴ O keiyei Dunpu, Tobiah'le Sanballat yarukhniyei touwurkhou lhou rapya ningthutpilaklo, heirou thimkhuiwi Noadiah'le, heirou thimkhui dei rapnekhi keiya chi-mathunyerna'nungei touwurkhou lhou rapya ningthutbi heinung'tlim tanti yukpiwurlaklo.”

Raalpal Sabaangbi Luilhakkur

¹⁵ Heisitoubi Jerusalemei raalpal sabaangkur heiwari, Elul tanglaei somnile phanga tlung tlainirou luilhakkur. Raalpal heiwaya sabaangeinung tlaini somngale khnibil changkur.

¹⁶ Heirouri asitoubi hungthukura, touri kaya yeekna thimirap nammane pao heiwaya mayeknarouri, kaya karhillei klei lim rapnekhi lhou heiwaya mulhakurla, heirouri yai ukningra beimak ningchiwura, heitoubi yaitamni ukningra khalrikraikur; ngamri kaiyei lhou toukur heiwari Dunpune kalhonpibi luilhakurme touri yanekhi ningmuwurla.

¹⁷ Heitoubi kheen heiroukhi Judah'yei lhou'urpu uparap kounakrei chethi rapkhi chungwani Tobiah'nung wadakur, heirou Tobiahyei chethi rapkhi yanungei loumallengpikur.

¹⁸ Kouweiyo toulanungri Judah'yei Jehudiarap chungwani Tobiah'kou tlou kantomrilbine yarilkhou, ngamri ari Arabia Shecaniah'yei kmak khatkhi khoi, heirou aiyei chanapawa Jehohanan'ne Berechiah'yei chanapawa Meshullamei chanapuiya heiwiya nu khoine loukhou.

¹⁹ Heiyakhi duinara, yarapne keimaibongra Tobiah'yei lhou lhangai heiyei ngamyadik kanthangbine kyun, heitoubi keiyei tloulhang rapya anungei paotamkhou. Heitounei ngamrou Tobiah'ne keiya mathunyernanungei chethi rapya mayebi malhetkur.