NEHEMIAH 13 - KHYINGEI PU'TLOU Bible (BSI)

Miram-Mithrilya Toukarkhaikur

¹ Heiyei tlainirou yane Moses'yei Chaylam Lailikrei pathutbine thimi rapya ningyerkur. Heirouri yane lailik heirouwei asitoubi mayelhakhou tloubom khat pakarthangkur, touri Ammonia nimanung Moabei thimirap hukhatkhi Dunpuei Kulyom kartilnara kouniroukhi yaothungnungei yamakrou;

² koungameiyo toulanungri Ammonia raple, Moabei thimi rapne Israel rapya unglhakbine tsai-ankhi, yuikhi loumalanmak, heinung'tlimri yane Balaam'ya neekloubi yaidoura manchoyerkur. Heisiya hoiyanungkhi Dunpune manchokur heiwaya phor khoine hollhakyerkur.

³ Heirouri asitoubi hungthukura, touri yane chaytlouya mayekbi, miram-mithrillei thimirap nammaya Israel raprouwei khaithutbi toukarkhaikur.

Tobiahya Hulthutkur Heitoubi Pucheemya Marthingthut

⁴ Heimaibongrou asitoubine thukwurkhou, touri suipipu Eliashib'ya kaiyei Dunpuei Pucheemrei lalkeiya pananungei lhousilla pu khat khoine khalthutbi leiyernarou, ani Tobiah'le beimakne karyarilbi leimalnakur;

⁵ heitoubi ane haallei suipipu raple, Levia raple, laarung'rap, heirou shumtrum kngaak thimi rapnung thulpinungei thraibaangkur tsai-an, heirou Puei ruiput heimakatkur trunwai lung raple, heirou makatput raple, mroh kun, darkha heiyui, Olive shirekle heirou shungyaang rapya marpeikhouna Pucheemyei bomtho maryana heiwaya Tobiah'yei ipna bi khoine marshikpibine leiyerkur.

⁶ Heiya kheen heirouri keiri Jerusalem'ra lhani leikhoumak, koungameiyo toulanungri, Babylon'yei Krung Ar-ta-xerxes'ne Krung hoiyei kum somthumle khni tlungkumrou keiri Krungei leinara heikallengbine waleikur. Heisiyanungkhi kheen beiyei hillouri, keiya shaalyerpina'nungei keine Krungnung shunchakur.

⁷ Heisitoubi keine Jerusalem'ra hungnarouri Eliashib'ne Pucheem rillei bomtho maryana heiwaya manshangthutbi Tobiahya leiyerna'nungei loutoukur lhangaimak lhou heiwaya keine pao hungmayekur.

⁸ Lhou heiwari keinungei beimakne ukningra pilnamakur; heitounei ngamrou keine Tobiahyei putchei rapya namyerwa bomtho heirouwei khingthutkur.

⁹ Heitoubi keine chaytlouni shunkur, heirouri yane bomthorap heiwaya namyer manshangurbine marthingthutkur; heirouri keine Pucheemyei shungyang raple, trunwai lung makatput raple, heirou mroh kun frankincense rapkhi namma lalkeira mallenglhakbi marpeikur.

Puei Ruiput Rapya Hanuikhi Khumbaangurthu

¹⁰ Heirou thimi rapne Levia rapnungei pibomthuk tsai-an rapkhi thulpimakurame tounei paokhi keine mayekurla; heitounei ngammei Levia raple, Puwatlhou toubi klei laarung rapri ai'aiyei phailoura kallengurchiyame toulei.

¹¹ Heisi tounarou keine lhousilla pu rapya shunlhakwurbi kngai, “Kouya tounei Pucheemya lhoukhoine thilhakpimakuro?” Heirouri keine yaya pulni ungmartilbine, heitoubi yaiyaiyei watlhou bomra hanui kallenglhakyerkur.

¹² Heirouri Judahyei thimirap nammane Puei ruiput trunwai lung raple, darkha heiyui, heirou Olive shirek rapkhi marpeikhouna lalkeira namyerwa heishunglhakur.

¹³ Heitoubi keine lalkei rapya thikulpi purap khoine suipipu Shelemiah'le, maye'thimi Zadok, heirou Levia Pedaiahya khalthutbi lhoubom lhakpikur; heitoubi yayakhi duinara Mattaniahyei chanao, Zaccur'yei chanapawa, Hanan'yakhi yaya trungpina'nungei khoine khalthutbi watlhou touyerkur; koungameiyo toulanungri, yarap heini yale watlhou toukanthrinbi klei palui-teinao rapnungei lhangaine tsai-an yerpinei lhoutou mani thimi rapme toubi keine yaya malungamkhou.

¹⁴ Heinungei'tlim keiya ningthutpilaklo, O keiyei Dunpu; heirou keine Neiyei Pucheemya malungshinei lhouya, heirou heinung'tlim watlhou toupikurya lhou hoimakri toupimaklo.

Sabbath'yei Lhouya Hanui Kallenglhakyerthu

¹⁵ Heiyei tlaini raprou Judahyei thimi rapne darkha hei rapya shumbine, trunwai lung raple phitungkara haalbine, gadha doura khangbangbine, darkha heiyuile, heiraple, khyudhei raple, heirou putchei limlimkhi put sheembine, Sabbath tlainirou yane Jerusalem'ra yentheilhakur heiwaya keine loukmu. Heitounei ngamrou keine yaya heiyei tlainirou tsai-an koukhatkhi yoryermakne shunkhamkur.

¹⁶ Heirou Tyre ramrei thimi rapnekhi bi heirou leibine lal holbi, yane thangale, lal'holput deideikhi limlim heilhakbine, yane Judahyei thimi rapnung Jerusalemei rilla ramphane Sabbath tlainiroukhi yorbine leikhou.

¹⁷ Heirouri keine Judah'yei lhou'urpu upa rapya tlousherbi shunkur, “Kouweiyawo nai toukur lhou awari Sabbath tlainirou ramphane anaksi lhangaimak borh lhouya toubine marmokyerkurako?

¹⁸ Naiyei nutar-patar rapnekhi anaksi lhou rapya touwurkhounei ngamrou, Dunpune kaidoura heirou Khulil awayei doura anaksi klah'knang thukyerkur nimako? Heinadourou nanekhi Sabbath'ya marmokyerwurbi Israel rapbei doura Dunpuei malungkhaya lhakbangkurame.”

¹⁹ Heirouri keine chay piwurbi, Sabbath tlaini maibongei rawai-kinni yenchiprou waikyoule Jerusalemei Palshung Shumtrum rapya thungyerwurbi, heitoubi Sabbath tlaini raalbongyen laatyermakne khouyerkur. Heitoubi keine keiyei shokrap thaya khalthutbi shumtrum rapya mayungakyerbi, heitoubi Sabbath tlainirou kouput khatkhi rilla yenlhakyermakne ngaksilyerkur.

²⁰ Heisitoubi lal'holnei putchei limlim kyor thimi rapne Jerusalemei Palshung pura masa khat-khni yarekbi leikurkhi kyao.

²¹ Heirouri keine yaya tlousherbine kyun, “Kouya tounungei nani Jerusalemei Palshung shumtrumra masa yarekbi kleiyo? Nane hillou hanui yarekthuanungri, nayari keine nambine manlhakbi chuiyerrou.” Heisi tounarouri heiyei trum heirouweine yane hanui kallengne Sabbath tlainirou wamakura.

²² Heirouri keine chay piwurbine Levia rapya yaitam marthingthutbi, Sabbath tlainiya marmokyermak'nungei yane wabi shumtrumya ngaksilnanungei shunkur. Heinungei tlimkhi keiya ningthutpilaklo, O keiyei Dunpu; heitoubi Neiyei malungshi-kringpikhei heiwaya keinungei mutpilaklo.

Nulou-Cha'lounarei Manokkurya Samlhakkur

²³ Heiyei tlaini raprou Jehudia douwa rapne Ashdod'rei, Ammon'rei, heirou Moab'rei cha'nyul rapya loulhakurya keine muwurla.

²⁴ Heisi tounei ngamrou yaiyei chanao rapri Ashdodei tlouya yunheiwurbi, heirou ya hukhatnikhi Judah, aithimi rapbei tlouya kyun heimakurchiya.

²⁵ Heitounei ngamrou keine yaya shamwurpi, heitoubi ya thayari umwurbi, heitoubi yai lurei sham ramphaya patdurpi, heitoubi yaya Dunpuei minra kantomyerbi, “Nane naiyei chanapuiya rapya yaiyei chanapawa rapnungei pilhaknungei yamakrou, heirou yaiyei cha'nyul rapya naiyei chanapawa rapbei heirou naimshaei nu khoinekhi loulhaknungei yamakrou.

²⁶ Israellei Krung Solomon'nekhi heinaksi lhoura borh touwurkhou nimaka? Heisiya hoiyanungkhi, lim nammaei hangrari anaksi Krungri dei hukhatkhi leikhoumakhui, heirou ayari aiyei Dunpune malungshikhou, heitoubi Dunpune ayari Israelrap namyerwaei doura Krung hoiyerpikur; heisiya hoiyanungkhi, miram-mithrillei napuiya rapne aya borhra dayerwurkhou.

²⁷ Heiyanungri kanekhi naiyei tlouya ninglhakbine, nane malungamkna yaomakne miram-mithrillei napuiya rapya loulhakbine kaiyei Dunpuya karhane lhangaimak lhouya toukur heinaksine touwase touneiko?”

²⁸ Heirou suipipu upawa Eliashibei chanapawa Joiada'yei chanao raprei khatnikhi Horonia'yei napawa Sanballat'yei kmak hoikhou; heitounei ngamrou keine ayakhi keirouwei hulthutkur.

²⁹ Yaya ninglhakpilaklo, O keiyei Dunpu; ngamri yane suipipu rapbei chorit lamya toumarmokbi, heirou suipipu rapbei heirou Levia rapbei kantomkhou tloumarding rapya toubaiwurla.

³⁰ Heisitoubi keine yaya miram-mithrilrei nu loukhounei lhouram nam'rouwei marthingthutpikur, heitoubi suipipu rapyale Levia rapyakhi yaiyei suipipuei heirou Levia'yei Puwatlhouei bomra kallenglhakyerbi, ai'aiyei watlhouya touyerkur,

³¹ heitoubi keine kartinkur kheenra urthutnungei makatput rapya hongnanungei meiheeng rapya marshikthutkur, heirou trunwai hutlha hei rapkhi thimi rapya shunbine urthutyerkur. Lhangaiyei lhounung'tlim keiya ningthutpilaklo, O keiyei Dunpu!