NEHEMIAH 12 - KHYINGEI PU'TLOU Bible (BSI)

Zerubbabel'le Kalhonne Jerusalem'ra Yenkallengkur Suipipu raple Leviarap

¹ She-alti-el'yei chanapawa Zerubbabel'le, Jeshua'le kalhonne Jerusalem'ra yenkallengkur suipipu raple Levia rapri: Seraiah, Jeremiah heirou Ezra;

² Amariah, Malluch, Hattush;

³ Shecaniah, Rehum, Meremoth;

⁴ Iddo, Ginnethoi, Abijah;

⁵ Mijamin, Ma-adiah, Bilgah;

⁶ Shemaiah, heirou Joiarib, Jedaiah,

⁷ Sallu, Amok, Hilkiah, heirou Jedaiah. Yarap heiri Jeshua'yei chaanrou suipipu raple, yaiyei cheemkhur-teinao rapbei yama uparap khoine leikhou.

⁸ Heirou Levia rapri: Jeshua, Binnui, Kadmi-el, Sherebiah, Judah, heirou Mattaniah. Mattaniahle aiyei teinao rapri Umpuya mathangnei laa shanara ruichingpi purap khoine lhou toubine leikhou.

⁹ Heirou Bakbukiah'le Unno heirou yaiyei teinao rapnekhi yai maibongra mai kallukrilni mayungbi yaiyei watlhouya churtrungbine leikhou.

¹⁰ Heirou Jeshua'ri Joiakim'yei pa, heirou Joiakim'ri Eliashibei pa, heirou Eliashib'ri Joiadaei pa;

¹¹ Heirou Joiada'ri Jonathan'yei pa, heirou Jonathan'ri Jadduaei pa.

¹² Joiakimni suipipu upa hoiyei chaanrou suipipu rapbei cheemkhur upa rapri: Seraiah bommaireiri Meraiah; Jeremiah'yei bommaireiri Hananiah;

¹³ Ezra'yei bommaireiri Meshullam; Amariah'yei bommaireiri Jehohanan;

¹⁴ Malluchi'yei bommaireiri Jonathan; Shebaniah'yei bommaireiri Joseph;

¹⁵ Harimei bommaireiri Adna; Meraioth'yei bommai'reiri Helkai;

¹⁶ Iddoei bommaireiri Zechariah; Ginnethonyei bommai'reiri Meshullam;

¹⁷ Abijahyei bommaireiri Zichri; Miniamin'yei bommaireiri Moadiah bommaireiri Piltai;

¹⁸ Bilgahyei bommaireiri Shammu-a; Shemaiah'yei bommaireiri Jehonathan;

¹⁹ Joiaribei bommaireiri Mattenai; Jedaiah'yei bommaireiri Uzzi;

²⁰ Shallai'yei bommaireiri Kallai; Amok'yei bommaireiri Eber;

²¹ Hilkiah'yei bommaireiri Hashabiah; heirou Jedaiah'yei bommaireiri Nethanel.

Levia Rapbei Cheemkhur-Bommai Uparap

²² Heirou Eliahshib'yei chaanrou Levia rapbei cheemkhur uparap khoine leikhou suipipu rapri: Joiada, heirou Johanan, heirou Jaddua. Heisitoubi yarap heini Persiaei Darius'ne Krung hoiyei kheenrou suipi purap khoine leikhou.

²³ Heisitoubi Levia rapbei cheemkhur yama upa rapya Eliashib'yei chanapawa Jehonan'yei chaan phane thimi rapya Levia rapbei Chaanlam Lailikra mayelhakbine khoukur.

²⁴ Heirou Levia rapbei cheemkhur upa rapri: Hashbiah, Sherebiah, heirou Kadmi-el'yei chanapawa Jeshua, heirou aiyei cheemkhur-teinao raple kalhonne markhulbine, Dunpuei thimi David'ne shunmatukhou hilthungne yane thral knaini Dunpuya mathangnei laa shabine Puwatlhou toukhou.

²⁵ Heitoubi Mattaniah'le Bakbukiah, heirou Obadiah, Meshullam, Talmon heirou Akkub'ne ngaaksilpi thimirap khoine Palshungrei lalkei rapya ngaaksilbine leikhou.

²⁶ Yarap heini Jozadakei chanapawa Jeshua, heirou aiyei chanapawa Joiakimyei chaanrou, heirou Nehemiah'ne Rampu hoiyei kheenrou, heirou Ezra'ne suipipu heirou Pu'tlou maye'thimi khoine leiyei chaanrou Puwatlhou toubine leikhou.

Raalpal Sabaangchibi Umpu nung Makatkur

²⁷ Asinungri Jerusalemei Raalpal heiri sabaangchibi makatdei kheenrouri, yane Levia rapya yairam nam'rouwei raphathutbine, heitoubi yaya Jerusalem'ra ungthutpikur, heitoubi yane hakrao-nungkngaine, taarile, toutli'le, sengshekle, heirou phungle-daarle toubi marhukbine, mathangnei shei kanyerle laale toubi shabine Umpunung makatnungei marshikkur.

²⁸ Heisitoubi laarung rapbei chanao rapne Jerusalem karhillei klei ramlim rapreikhi, heirou Netophathia yultlai rapreikhi;

²⁹ Beth-Gilgal'rei, heirou Geba'rei, heirou Azmaveth'rei yaiyei loukul rapreikhi namma wachangbine kartilkur; kouweiyo toulanungri yane Jerusalem karhilni yuldabine paalkhou,

³⁰ Heitoubi suipipu rapne, heirou Levia rapnekhi yaitam marthingthutbi, heitoubi thimi rapyakhi, heirou Palshungle, heirou Raalpal khi namma marthingthutkur.

Pucheem Makatnei Lhouram Lammitrap

³¹ Heirouri keine Judah'yei yama upa rapya raalpallei doura ungbangyerbi, heitoubi yaya rulkhni khaithutbi mathangnei laasha thimirap khoine khalthutkur; heitoubi lamkriyei laasha thimirul heini thya lhangra Yunlhi Thutna Shumtrum lhangra chananungei silpikur.

³² heitoubi Hoshaiahle, heirou Judah'yei ruichingpi pu rul lhang'khatni yai hilla heichanthungnungei silpikur,

³³ heitoubi yale kalhonne Azariah'le, Ezra, Meshullam,

³⁴ Judah, Benjamin, Shemaiah, Jeremiah'khi,

³⁵ heirou suipipu rapbei chanaorap thakhi pengkul shinbine, heirou Jonathan'yei chanapawa Zechariah'le, Shemaiah'yei chanapawa, Mattaniah'yei chanapawa, Micaiah'yei chanapawa, Zaccur'yei chanapawa, Asaph'yei chanaowei pawakhi,

³⁶ heirou aiyei teinaorap Shemaiah, Azarel, Milalai, Gilalai, Maai, Nethanel, Judah'le heirou Hanani, yanekhi Dunpuei shikrui David'yei shunmatukur hilthungne phungle daarle shinbine, yaihilla heichanthungkur. Heitoubi Pu'tlou maye'thimi Ezra'ne yai maibongra louchabine ruipikur.

³⁷ Heitoubi yane kulrel lhangei Yuiphumei Palshung Shumtrum'rouweine raalpal doura kakana khlakra yengdang kakawurbine heitoubi David'yei Krungkul shangkai douwei raalpalthungni yentlaralbi, heitoubi kulkung lhangei Yuisoei Palshung Shumtrumra hungdakur.

³⁸ Heirou laasha thimi rul khatni thyoi lhangra chawurbi, heirou keile kalhonne thimirul lhang khatle raalpal doura chabine yaihilla heichanthungkur, heitoubi Paltangei Meibom douwei Raal'daang lhangra yenralwurbi,

³⁹ heitoubi Ephraim Shumtrum doura yenralkur; heithangrou Shumtrum Khman doura yenralkur, heithangrouri thanga Shumtrumra yenralkur, heitoubi Hananel Raal'daangra yenralkur, heirou Raallui Machaei Raal'daang lhangra hungtlungbi, heirou Yaorul Shumtrumbil hungdakur, heitoubi yane Raal ngakna Shumtrumra hungdongkur.

⁴⁰ Heirouri ya laarungrap rul khnine Dunpuei Pucheem rilla wachangbine mayungkur. Heisitoubi keikhi heirou ruichingpi pu rul lhang'khatkhi keikou kalhonne;

⁴¹ heirou suipipu rapkhi Eliakim, Ma-aseiah, Miniamin, Micaiah, Eli-o-enai, Zechariah, heirou Hananiahkhi pengkul shinbine;

⁴² heirou Maaseiah, Shemaiah, Eleazar, Uzzi, Jehohanan, Malchijah, Elam, heirou Ezer'khi kyao. Heirou laarung rapnekhi Jerahiah'ne yaiyei laarung upa khoine ruichingbine laa shakur;

⁴³ heisitoubi heiyei tlainirou yane tangne malamput makatbine beimakne haraokur, ngamri Dunpune yayari harao-nungkngaine langthouyerkur; heisitoubi napuiya, naoshun-naopar lhuimakne haraobi nungwaikur; heisi tounarouri Jerusalem'rei haraobi langthounei hou heiwari tlatna ramrakhi heimayekphakur.

⁴⁴ Heitoubi heiyei tlainirou thraithutkur putchei raple, trunwai hutlha heirap, heirou PUei ruiput rapya marpeina lalkeiya panananungei napawa rapya khalthutbi bom lhakpikur. Heitoubi yane chaylamrei mayekur hilthungne suipipu rapnungle, Levia rapnungei thulpinungei tsai-an siruk rapya khukarthil heiyei karhillei klei louyao raprei trunwai lung rapya markumbine lalkeira shunglhakrou da. Kouweiyo toulanungri Judahne suipipu raple Levia rapbei watlhou toupikur heiwaya beimakne malung pilkur.

⁴⁵ David'le aiyei chanapawa Solomon'yei chay hilthungne, Shumtrum kngaak thimi raple, laarung rapne marthingthutbi Puwatlhou toukhou heinaksine, suipipu raple Levia rapne yaiyei Dunpuya khrumnei watlhouya toukhou, heirou marthingthutnei watlhoukhi toukhou.

⁴⁶ Kouweiyo toulanungri bongei David'le Asaphbei chaanrouwei waiyoubine, laarung upa rapne ruibine Dunpuya mathangnei laaya shakhou. heirou Aya kanyernei sheikhi shakkhou.

⁴⁷ Heisitoubi Israel'rap nammane Zerubbabel'le Nehemiah'yei chaan'rouwei yane laasha thimi rapnungei, heirou shumtrum kngaak thimi rapnungei pibomthuk sirukya tlainisernung yane thulpikhou, heitoubi Levia rapnungei pibomthuk siruk rapkhi thulpikhou, heitoubi Levia rapnekhi Aaron'yei chanao rapbei siruk rapkhi khaithutbine marthingthutkur.