NEHEMIAH 11 - KHYINGEI PU'TLOU Bible (BSI)

Jerusalem'ra Kallenglhakbi Paalkur Thimirap

¹ Asinungri thimi rapbei ruichingpi pu rapne Jerusalem'ra paalbine leiwurchiya, heiya thimidei rapne meirui khingbine yaihangrei thimi napung-chiprei napung-khatsolya khalthutbine Khyingei Khulil Jerusalem'ra leiyernanungei hilthutkur, heitoubi thimi siruk chiprei siruk takori khukarthil deirapra leithungkur.

² Heisitoubi Jerusalem'ra paalnungei chunthutkur thimirap nammaya thimi rapne mathangbine phor pikur.

³ Yarap heiri ramkul heirouwei cheemkhur uparap khoine Jerusalem'ra paalkur. Heiya Israel thimi rapne, suipipu rapne, Levia rapne, Pucheemyei wattouwa Nethinim rapne, heirou Solomon'yei shok rapbei yu-cha rapne Judah'yei khukarthil deideira ai'aiyei klei putchei rapya yrengbine ainung-ainung palcha'kna.

⁴ Heirou Judah'yei cheemkhurrei chanaorap thale, heirou Benjamin cheemkhurrei chanaorap thakhi Jerusalem'ra paalkur: Heirou Judahyei chanao rapreiri: Uzziah'yei chanapawa Athaiah, Zechariah'yei chanapawa, Amariah'yei chanapawa, Shephatiah'yei chanapawa, Mahalalel'yei chanapawa, yarap heiri Perez'rei yenrankur yu-chathil.

⁵ Heirou Baruch'yei chanapawa Maaseiah, Col-Hozeh'yei chanapawa, Hazaiah'yei chanapawa, Adaiah'yei chanapawa, Joiarib'yei chanapawa, Zechariah'yei chanapawa, yarap heiri Shilonia'yei chanaorap.

⁶ Heirou Jerusalem'ra paalkur Perez'yei chanao rapri napung macha-phali'le somrukle chot tlung, yarapri lhouwathil.

⁷ Heirou Benjamin'yei chanao rapri: Meshullam'yei chanapawa Sallu, Joed'yei chanapawa, Pedaiah'yei chanapawa, Kolaiah'yei chanapawa, Maaseiah'yei chanapawa, Ithielyei chanapawa, Jeshaiah'yei chanapawa;

⁸ heirou aiyei hillari Gabbei'le, heirou Sallai, ya napung macha-takole somnile-chot tlung.

⁹ Heirou Zichri'yei chanapawa Joel'ne yaidoura lhousilpi pu khoine thikulpikur, heirou Hassenuah'yei chanapawa Judahni aiyei ngamthangei lhousilpi pu khoine leikhou.

¹⁰ Heirou suipipu rapreiri: Joiaribei chanapawa Jedaiah'le, heirou Jachin.

¹¹ Hilkiahyei chanapawa Seraiah, Meshullam'yei chanapawa, Zadok'yei chanapawa, Meraiothyei chanapawa, Ahitub'yei chanapawa rapne Dunpuei Pucheemra watlhou thilhakpi thimirap khoine leikhou.

¹² Heirou yale kalhonne, Pucheemra watlhou churthimi rapbei teinao rapkhi klei, heitoubi yarap namyerwa heiri pulni thimi macha-chotle somnile-khni tlung; heirou Jerohamei chanapawa Adaiah, Pelaliah'yei chanapawa, Amzi'yei chanapawa, Zechariah'yei chanapawa, Passhur'yei chanapawa, Malchijah'yei chanapawa;

¹³ heirou Pucheemra watlhou churbi klei aiyei cheemkhur-teinao rapkhi, cheemkhur uparap pulni thimi napung macha-khnile somlile-khni tlung; heirou Azarel'yei chanapawa Amashsai, Ahzai'yei chanapawa, Meshillemoth'yei chanapawa, Immeryei chanapawa;

¹⁴ heirou yaiyei teinaorap lhouwa rapkhi napung machale somnile-chot tlung. Heirou yaidoura Haggedolim'yei chanapawa Zabdi-el'ne lhousilla pu khoine leikhou.

¹⁵ Levia cheemkhurrei thimi rapri: Hasshubei chanapawa Shemaiah, Azrikam'yei chanapawa, Hashabiah'yei chanapawa, Bunni'yei chanapawa;

¹⁶ heirou Shabbethai'le, Jozabad yakhuntani Levia cheemkhur upa rapbei hangrei Pucheem purei watlhoura thikulpi purap khoine leikhou;

¹⁷ heirou Mica'yei chanapawa Mattaniah, Zabdi'yei chanapawa, Asaphbei chanapawa; ane Dunpuya mathangle shunchanei Puwatlhoura ruichingpi pu khoine leikhou; heirou Bakbukiah, ani yaiyei teinao rapbei hangra khintamtlung chanapawa khat, heirou Sammua'yei chanapawa Abda, Galal'yei chanapawa, Jeduathun'yei chanapawa:

¹⁸ Khyingei Khulilra klei Leviarap namyerwari pulni napung macha-khnile, somshrile phali tlung.

Jerusalemei Purei Klei Thimirap

¹⁹ Heirou palshung shumtrum kngak thimi rapkhi, Akkub'le, Talmon, heirou yaiyei teinaorap nammane thimi napung machale somretle-khni tlung.

²⁰ Heirou Israellei thimirap dei nammale, suipipu raple, heirou Levia'rap nammari Judah'yei khukarthil deideira ai'aiyei shungyang rapya yrengbine ainung-ainung paalbine leikhou.

²¹ Heiya Ophel, heirou Ziha, heirou Gishpa khukarthil rapra paalbi leikhou Pucheemyei watlhouchur shok rapneri Pucheemyei shok rapbei rungkhlang khoine lhou churbi leikhou.

²² Asinungri Jerusalem'ra klei Levia rapbei doura thikulpibi klei lhousilla pu rapri Baniyei chanapawa Uzzi, Hashabiah'yei chanapawa, Mattaniah'yei chanapawa, Mica'yei chanapawa, yarap heiri Dunpuei Pucheemra laa shanei watlhou toubi klei Asaphbei chanapawa raprei yenrankur thimithil.

²³ Kouweiyo toulanungri laasha thimi rapne Krungei chay hilthungne tlainiserrei lammit hilthungne lhou toubine leikhou.

²⁴ Heirou Judah'yei Limrei, Zerah'yei chanapawa rapbei hangrei Meshezabel'yei chanapawa Pethahiah'ne Persia Krungei maibongra Israel rapnung'tlim tlou numpi pu khoine leikhou.

Thimi Rapne Khukarthil Deirakhi Heirou Khulil Deirakhi Paalkur

²⁵ Heirou Judahyei thimirap kounakni khukarthil raple, heiyei karhillei klei louma raprakhi yuldabine paalkur. Yarap thani Kiriath-Arba khukarthil'le, heiyei karhillei klei mandi raprakhi, Dibon khukarthille heiyei yulban raprakhi, heirou Jekabzeel khukarthille heiyei yulban raprakhi yuldabine paalkur.

²⁶ Heirou Jeshua'ra, Maladah'ra heirou Beth-Pelet'rakhi yuldabine paalkur.

²⁷ Heirou Hazar-shual'ra, Beer-sheba'ra, heirou heiyei yulban raprakhi,

²⁸ heirou Ziklag'ra, Meconahr'ale heiyei yulbanra,

²⁹ heirou En-Rimmon'ra, Zorah'ra, heirou Jarmuth'ra,

³⁰ Zanoah'ra, Adullam'ra, heirou yaiyei yulban rapra, Lachish'le heiyei yulban rapra, Azekah'le aiyei yulban raprakhi yuldabine paalkur. Heisitoubi yane Beer-sheba'rouweine Hinnom phaikar wadani yuldabine paalkur.

³¹ Heirou Benjamin'yei chanao rapnekhi Geba'rouwei waiyoubine, Michmash'le, Aija waphane, heirou Bethel'rale, heiyei yulban raprakhi;

³² Anathoth'ra, Nob'ra, Ananiah'rakhi;

³³ Hazor'ra, Ramah'ra, Gittaim'rakhi;

³⁴ Hadid'ra, Zeboim'ra, Neballat'rakhi;

³⁵ Lod'rale heirou hutshakhei thimi rapbei phaikar Ono'rakhi yuldabine paalkur.

³⁶ Heirou Judah'yei Levia cheemkhurrei thimirul thakhi Benjamin'le paalmalnakur.