NEHEMIAH 1 - KHYINGEI PU'TLOU Bible (BSI)

Nehemiah'ne Raalmankur Thimi Rapnung'tlim Lhawai Lahpikur

¹ Hacaliah'yei chanapawa Nehemiah'yei tloulhang rapri asitoubi mayelei: Kum somni tlungkum Chislev tanglarou Nehemiah keine Khulil Susa'ra leiyei kheenrou,

² keiyei teinaorap'rouwei napung'khat touri, Hanani'le, heirou thimi thale toubi Judah'rouweine keileinara wa'tlungkur; kheen heirouri keine yanung raalmannarei kartleithungbi leithungkur Jehudia rapbei ngamrale, Jerusalemei ngamrakhi loungaithikur.

³ Heirou yane keinungei mallangbi loukyun, “Raalmannarei kartleithungbine Judah'ra leithungkur thimi rapri beimak klah-mrimne, heirou rikraiknaei trumra leiyurame; heirou Jerusalemei raalpalkhi deeksundabi khromwurchiya, heirou palshung rapkhi meine namma kaangtaakkurchilame.”

⁴ Heirou keine pao heiwaya loumayeknarouri, keiyei lhawai klahne thleira omlhakbi, chapbi tlaini kounakbil kanrelkur; heitoubi keine chaamak-maimakne chara yilbine, Dunpuei bomra shunchabi leiwurkhou.

⁵ Heirou keine kyun, “O Thangmunrei Dunpu, Umpu; kngak khatdei toumane Dunpu, mardingrilkur tloubomya baimakne ngaakbi klei Pu, heirou Aya malungshini heirou Aiyei Chaylam rapya kngak thimi rapya kringpikhei Pu Dunpu, keine Neinung shunchaleime;

⁶ asinungri Neiyei khna khaangchoubine, heirou Neiyei mitlung mharbine, heirou Neiyei shikrui keine Neimaibongra mayungbi Neiyei shikrap Israellei chanao rapbei rungkhlangra yaiyei touwurkhou borh rapya kukpinanungei ukning hungbine shunchakur awaya beicha ninglhakpilaklo; ngamri keile kai pawa rapnekhi borh touwurkhoulame.

⁷ Kane Neiya karhane beimakne thuithiyei lhouya touwurkhoula, heirou Neiyei shikrui Moses'nung piwurkhou Neiyei Chaylam rapkhi, Puwatlhouwei lammit rapkhi, heirou kulyomei youkna lammit rapkhi ngakmakne toubaibine chawurkhoula,

⁸ Neiyei shikrui Moses'nung piwurkhou Chaylamrei tloulhangra: ‘Kounakpi nane malungamnamakei lhouya toulanungri, Keine naya limdei rapbei hangra toucheklhakrou;

⁹ heiya kounakpi nane Keinungei yenkallengthuwanungri, heirou Keiyei Chaylam rapya kngaakne chabi, heitoubi heirapya hilthungne lhou toulanungri, tlaipangpal wadongna ramphane hulcheklhakurya hoiyanungkhi, nayari Keine raal manphopkhouna birouwei yenruimallengthurou, heitoubi Keiyei minya phunkhounanungei Keine khalthutpikur bi heirou naya Keine hanui urbaangpithurou,’ toubi yunpikhou heiwaya Nangne ningthutpithulaklo toubi keine buchaleime.

¹⁰ Yarap heiri Neiyei mantrangne heirou toumaneyei hutne kalthutbi lhukthutpikur Neiyei shok, heirou Neiyei thimi rapme.

¹¹ O Umpu, keine Neinungei buchaleime, Neiyei khnani Neishik keiyei shunchakurya heirou Neiminya chi-rikraine khrumbi klei Neiyei shik rapbei shuncha-buchakur houya louningpilaklo; heitoubi angtu tlainirou Neiyei shik rapya lhoutou maniyerpilaklo, heitoubi Krungei thimi rapbei doura kringpikhei mutpilaklo.” Kheen heikallouri keiri Krung Ar-ta-xerxes'yei tulflei thimi khat khoine leikhou.