NAHUM 2 - KHYINGEI PU'TLOU Bible (BSI)

Nineveh Kanelkur

¹ (O Nineveh), Neiyari harhar dayerna'nungei neidoura raal darou Thimi khat wathukura, raal lousounanungei raalluirap marshiklaka, raal'lam omtatbine leirera mitkhringni raal ngaklaklo, raal'shamb baangbine raal kardourilnanungei marshiklaka.

² (Kouweiyo toulanungri, yeekna thimi rapne yaya toumangurbikhi, Umpube Israel rapbei thang lhangaiya mallenglhakpikur heinaksine Jacobei thang lhangaikhi mallenglhakpirou.)

³ Aiyei mantrangkur raallui rapne chungkhi shinmarshikbine leiwurchiya; krak raallui lhouwa rapkhi hee kimyei raal'shambya mansambine leiwurchiya; heitoubi yane raal dananungei marshikbi chanlhakyeinungri, yaiyei sapuk kaari rapri meithlankhi liplip althutlei; heirou yaiyei raalchei rapkhi liplip mherchalei.

⁴ Sapuk kaari rapri khullam kantangra kyongle-kale thulkartlikchani chanchabi leiyura; yane lamtangra meithlan liplip thukni chanchawura, heirou nungthourei liptlai alnaksine shaikarhilchabine leiwurchiya.

⁵ Lhou'urpu bomtang thimi rapya Ane ungbangurla, heitoubi yani raal bomra taponbine kanelwurchiya; heirouri raalda thimi rapne raalpal channi heitonlhakurchiya, heitoubi raal karsoya lousounanungei chungrap marshikbine leiwurchiya.

⁶ Kung lhangrei raalpal shumtrum cheemkhar rapkhi namtatdurchila, heirou Krungkulkhi baiwurbi heirou yama upa rulkhi kanchaiwurchiya.

⁷ Heirouri Krung-nuwi Huzzab'yakhi raalla manlouheirouwa; ayari kul chalphopbi yukbaangrouwa; heirouri aiyei shok-napuiya rapne malungpak umbine, mathru khungnakni kanelkhup'khupne chapchirouwa.

⁸ Heiya Nineveh, bongnungri yuinalinak warkeo leikhou, heiya asinungri yui tingkhou tonyaankur heinaksine thimi rapne minung-minung trukchekrouwa! Yane “Myungriyalo! Myungriyalo!” toubine ungthungeirou, heiya hukhatnekhi loukallekthimarou.

⁹ Sina'le lapa, heirou kulshan rapya nani louheibi kontlumlaka, kouweiyo toulanungri, khukarthil heirouwei marpeilhakkur lalthum rapri klui naimakme.

¹⁰ Nineveh'ri deek'bai thukbine khromchirouwa; dingura, heirou rilla koukhatkhi makni hangwalni leiyura; heirou chiwurnei ngamrou solungkhi yawurchiya; heirou chi'kanchunnarou khuklukhi chingkantummurchiya, heirou malung kandupbi yaiyei mairungkhi mraowurchiya.

¹¹ Heitoubi kheen khatrou hume rabu thlungkhan naksine, heirou yangkong rapbei shaichana ramnakni, heirou yangkong shun rapbei neina rabu khoini leikhou khukarthil heiwari asinungri kourangawo? Heitoubi yaiyei chanao rapri kourangachiyawo?

¹² Chaan khatrouri yangkongpa rapne yaa chanbi, sraltang'an chik'hatbine, yaiyei pui raple shun rapnungei yenpeikhouna bi khoini leikhou; heitoubi bi heiwari sraltang'anne thimkhou.

¹³ “Heiya thilak, asinungri Keiri neiya yanimakura,” toubine Thangwan-Shimleiyei Pu Umpube shunlei; “heirou neiyei sapuk kaari rapkhi meira namma hongurchirouwa; heirou neiyei yangkongnak mantrangkhou chanao rapya raalshonra himaangyerrouwa; heitoubi neiyei sraltang'an rapkhi tlaipangrouwei Keine louthutrouwa; heirouri neiyei Pu'tlou shunthut Pao cha thimiyei houkhi mayekpha'makarou.”