NAHUM 1 - KHYINGEI PU'TLOU Bible (BSI)

Dunpuri Chi-rikraiyei Shakrung

¹ Nineveh'yei doura klei tantiyei paolaa ngamrou, Elkoshia Nahum'ne kar'anmukur Pu'tlouei paolaa asitoubi leilei:

Nineveh'yei Doura Dunpuei Malungkha Klei

² Umpuri horthitang Dunpu, heirou khlang lhakter Dunpu; Umpuri meithukni malungkhabi khlang lhakter Pu khat; Aiyei shunya ninglhakmak thimiya Ane khlang lhaklei, heirou Aidoura yeekna thimi rapya Ane malungkhalei.

³ Umpuri malungkha'termak, heiya Ari mantrang klei; heirou khril lhangaimak thimiyari Ane tanti pimakne tekkhi lakhoumakrou; Umpuei lamri lhimnung-marthee hangra klei; heirou rameiri Aiyei homairei rahui.

⁴ Samadruia Ane chay pilanungri, aitam yenheepburlei; kungbanrap namyakhi Ane taaryerwurlei. Bashanyei phaikarkhi yentaarwurlei, heirou Carmel Lhungdou rapkhi taarwurbi yenmraowurlei; heirou Lebanonyei heengpar-rampar rapkhi yenmarhuibi trulwurlei.

⁵ Umpuei maibongrari lhungdou rapkhi linglang kanthingurlei; heirou lhungpum rapkhi yasundawurlei; heirou Aiyei maibongrari thleikhi meipung naksine kaangtlummurlei; heirouri tlaipangpal heirou heiyei dourei klei tlaipang thimirap nammakhi chibi kanchunwurlei.

⁶ Umpuei malungkhana maibongrari huni loumayungchangrou? Heirou Aiyei meithukkei malungkhana bomrari hune ringchangrouwo? Aiyei malungkhakur heiwari meihalnakne shungthutdurla, heirou Ane thlungmtum rapkhi rahui thukni khingchaalwurla.

⁷ Umpuri lhangai malungdam, klah-knangei kheenroukhi kallena bomkhoi; Anungei uklumbi loukallekur thimi rapya Ane thikulpilei.

⁸ Heiya Aiyei yeekna thimi rapyari yuitangni omphumbi dumyerkur heinaksine, Aya karhaei yeekna thimi rapyari khiya rammei mehnara hullhakurbine maangyerrouwa.

⁹ Umpuya karhane nane kouya manrangbi kleiyo? Naiyei waikrang heiwari Ane tumne maangyerheirou; khnui tlungni klah-mrimtou hungthukmarou.

¹⁰ Kouweiyo toulanungri, yani thruiam yentaarkur heinaksine, chamalip-maimalipbi yentaaryei kaalnung, yayari sapul taarya meira hongkurnakni hongurheirou.

¹¹ O Nineveh, neirouwei khril lhangaimak thimi khat hungthukbine, Umpuya karhane lhangaimak lhou touheirou.

¹² Umpube asitoubi shunlei: “Assyria rapne thimi mshing kounak chungbikhi, heirou kounakbil mantrangbikhi, yayari maangyerheirou, heitoubi yaiyei shakrung muphayermarou. Neiyari Keine hotkhouwanungkhi, hillouri Keine Judah neiyari hanui kallengni hotpimarou.

¹³ Kouweiyo toulanungri, asinung waiyoubine neirouwei Assyria'yei putkhrit Keine khangsundapirouwa; heirou neiya shok hoina bomrei thirrui msuinarei thiktatpirouwa.”

¹⁴ Heirou Umpube Assyria'yei ngamrou chay piwurla, “Neiyei shullamri hanui kallengni muphamarou, heirou neiyei thrai bomrei thrailha rapya Keine umbaichirouwa; heitoubi neinungei Keine lhankhi toukhourouwa; kouweiyo toulanungri, nangri ringbomkhi thukmakura!”

¹⁵ Thilak, lhangai paolaa urbine paocha thimi khatni hungthukbine lhungdoura ho hungtrumlei, heitoubi Kyingei Pu'tlouya khulpaobi shunlei! O Judah, nane Pnung fyoubine kumoi toulaklo, heitoubi naiyei ukning khyingni kantomkur tlouya tlungyerlak. Kouweiyo toulanungri khril lhangaimak thimi rapne naidoura raal damakarou; ayari yrungphane tlumni maangyerrouwa!