MICAH 7 - KHYINGEI PU'TLOU Bible (BSI)

Israel Rapbei Chorit Naimak Lhoutou

¹ Keiri lah'knaei thimi hoiyura; manthrallei darkha yekulra darkhahei luk'khamkur hillei, takara hei'khyur martamthi'nungei heipum khatchakhi holpha mumakne leikur thimi naksi, heirou keiyei ukningra madubi cha'knine khyudhei minkri khatchatomkhi lamumakne dongkur hei klah thimi'nakne hoiyura.

² Tlaipangpalla lhangai tharmuchim thimiri mangurchiya; heirou yaihangra tharmu chimmei lhoutou thimikhi hukhatkhi yaomakura; heirou yaihangra heenai dayernanungei mrimchabidik leirilwurchiya; thimi kantangni mimiyei teinao rapya yaa channakni hulcharilbine chaang kamnara manyernanungei hullhakrilwurla.

³ Yaihut khintamni lhangaimakya tounanungei marshikbine leiyura; Krung rapnekhi, heirou pichar pu rapnekhi tuy chananungei buphabine leiyura; heirou bomtang thimi rapnekhi yai ukningrei kathuk lhangaimak tlouyathil yunbine leiyura; heisitoubi yani lhangaimak lhou rapya kar'umbi heiwaya toubine leiwurchiya.

⁴ Yaihangrei lhangaiyame tou thimi heiwari thrutrung naksilei; heirou yaihangrei yerrouwei tharmuchim thimi heiwari shaisarthru masuryakhi duini masuilei; Thimkhui rapbei shunthutkhou tlainirap, heirou tanti tounei pichar heiwari hungtlungura. Heineri asinungri nari tamungurbi biso naimakrou.

⁵ Neiyei cheemlhun thimi rapyakhi malungammak, heirou neiyei palui rapyakhi malungampimak; heirou nangkou ipmalkna neiyei nu ramphanungeikhi tlou pangsane yunthutpimak.

⁶ Ngamri achaan arouri chanapawa rapne pa rapya manthapimakura; heirou chawi rapnekhi puiwi rapya karhani lhou touwurla; heirou mouwi rapnekhi neeniwi rapbei doura karhani tlou yunyouwura; tanghakpane thimi khatdei yeekna thimiri ai'bommai hakrei thimini hoiyura.

⁷ Heiya keiri, Umpua malungamne thibine leirouwa, heirou keiyei ralthutpina bom Dunpuya keine karngeibine leirouwa; ngamri keiyei Dunpune keihouya loumayekpirou.

Ralthutpina Bomri Umpu ne Yenpirou

⁸ Keiya thibine haraomaklo, O keiyei yeekna thimirap; keiri kanelwurbikhi, hanui kanthouthurou; heirou Keine mehna daakra ombine leiyanungkhi, Umpune keinungei kwaar khoini yuk'alpirou.

⁹ Umpuei meithukei malungkhanei tanti heiri keine urrou da; ngamri Aya karhani keine borh touwurkhoula; Ane keiyei lhou rapya ningthutthutbi picharra urthutbine tlou luilhakbongyen keine dourou dawa; heirouri Ane keiyari kwaarra urthutpibi, Aiyei tharmu chimmei thang'alya keinungei muyerpirou.

¹⁰ Heirouri keiyei yeekna thimi rapne heiwaya mupharouwa; keinungei “Neiyei Dunpu Umpuri kourangawo?” toubine khremnakhou thimi rapkhi rikraibi mai khumrouwa. Heirouri lamtlaira tatmanuikur thleibulnakne keiyei yeekna thimi rapya tatmanuirouwa; heirou keimitne yayari malungkhrane thibi leirouwa.

¹¹ Tlaini heiwari naiyei raalpalya sabaangnei tlaini hoirouwa; heirou naiyei Krungramkhi duine maryane saikulnei tlainikhi hoirouwa.

¹² Heitoubi heiyei tlainirouri, thimi rapne Assyria'rei, heirou Egypt'rei raalpal kuikoolkur khukarthil kounakrei, Egypt'rouweine Euphrate Krungramrei klei thimi rapne, samadru khatrouweini samadru khatra heiralbi, heirou lhunglim-daamlim kounakya heiralbine naileinara waeirouhui.

¹³ Kheen heirouri thimi rapbei ngamne tlaipang thleimairi chansher hoinarouwa; koungameiyo toulanungri, yaiyei lhangaimak lhou tounei klahman mhei hoirouwa.

Umpu ne Israelya Kringpi

¹⁴ Tangkui shinbine Neiyei thimiya silpilaklo, yari Neiyei yaorul rapme; Yari Carmel Lhungdouwei heengyao hangra yaitamtom kansangthutbi leiyurame; yayari tirrei'naksine Bashan'ra heirou Gilead'ra silbine namh pishailaklo.

¹⁵ Nane Egypt ramrei wathukyei kheenrou mutpikur heinakni, Keine nanungei kngakkei lhourap kounakya mutpithurou.

¹⁶ Limdei rapne heiwaya mubinekhi, yari hut'mantrangme toubine tangcha thimi rapri rikrai phaheirouhui; heirouri yaihutni mur domkhalbine heirou khnakhi tipburbine mayekmarou.

¹⁷ Yane thleirei rahuiya frulnakni marupbeirou, heitoubi thleipurrei tal kat'tulthut heinakni yani yaiyei raalpal'rouwei heitulthutchirou. Heitoubi naiyei ngamrou, yani kaiyei Umpu Dunpuya chi-kanchunle kalhonne Aiyei bira wachangeirouhui.

¹⁸ Nangnaksi borhya kukpi Pu Dunpuri dei hu leileihuiyo? Nangri Neiyei hirom thimi rapbei borhyakhi kukpi maneleime; Neiyei malungkhari kmit naimakne khoumakleime; ngamri Anungei hungcha naimakkei kringpikhei kleime.

¹⁹ Ane hanui kalleklhakthubi, kaidoura Aiyei kringpikhei khoupithurou; Ane kaiyei borhya machampirou; heitoubi kaiyei borh nammaya samadru yuknara khinglhakpirou.

²⁰ Bongei chaanrou kaiyei patar rapnungei kantom'piwurkhou heihakpaya, Jacob'nungei tharmu chimmei lhouya toupibine, heirou Abraham'nungei kringpi'khei heiwaya Nangne mutpiheirou.