MICAH 6 - KHYINGEI PU'TLOU Bible (BSI)

Israellei Doura Dunpuei Pichar

¹ Asinungri nane louningpilak, Umpune asitoubi shunlei, “Kanthouwalo, heitoubi naiyei tloubom rapya molshaang-lhunglim rapnungei makatlak; heitoubi naiyei houya mollim-lhunglim rapne loumayeklaksu.”

² O lhunglimrap nani louningpilak! Umpune naidoura tlou makatlei; tlaipangpalya loumardoubi klei mantrangkur cheemmunrap nanikhi louninglak; kouweiyo toulanungri, Umpune Aithimi rapbei doura yanimakne tloubom urbangurla, heiyei ngamrou Israel rapbei doura Ane tlou makatdurla.

³ “O Keiyei thimirap, nanungei Keine kou toupiwurlawo? Keine nayari kourou lahyerwurkhou leiyurawo? Keinungei mallangbine louyunthi!

⁴ Kouweiyo toulanungri, Keine neiyari Egypt ram'rouwei ruithutpikur, heitoubi shok hoina bom'rouwei Keine neiya lhukthutpikur, heitoubi neiya ruipinanungei toubi Keine Moses'le, Aaron heirou Miriam'ya yenmalhetpikur nimakko!

⁵ O Keiyei thimirap, nani ningthutlaklo, Moabei Krung Balak'ne koutoubi naya karhani raal silpikur, heirou Beor'yei chanapawa Balaam'ne koutoubi anungei raal paangpikur; heirou Shittim touri Acacia rouweini Gilgal wa'tlungphane nane lam tlayeinung koutoubi Umpune naya kalpikurro touri nane yuktrithilak. Lhouthukrap namma heiri Umpuei tharmu chimmei lhouya nanungei muyernanungei touwurkhouthil.”

Umpu ne Tlaipang Thimirei Kou Madu!

⁶ Keine kouya urlhakbine Umpuei maibongra wachangrou? Heirou koutoubi Yerrouwei Choudui Dunpuei maibongra wachangbine khrumserouwo? Meira hongbi makatnungei malan putya urlhakserouko? Nimanung kumkhatdei halshuncha khatya urbine wachangserouko?

⁷ Nimanung yaopa lishing khat makatbi Umpune malung khrahrouko? Nimanung shirek kungban lishing chipbeimal urlhaklanungri Ane loulhakpirouko? Keiyei borhnung'tlim Keine keiyei chanapawa samranya makatserouko? Keiyei chahakya kei lhawaiyei borhnung'tlim makatserouko?

⁸ O tlaipang thimi, lhangairi kounakko touri Umpune neinungei mutpiwurlame; heirou Umpune nairouwei kou madulei? Nairouwei Aiyei touyerkniri, ‘tharmu chimmei lhoutou, heirou kringpikheiya malungshilei, heirou naiyei Dunpuei maibongra ukning khnimni Aya rikrai khrumbine klei heiwarime.’

Israel Rapbei Mral Heirou Yaidoura Pichar

⁹ Umpuei houne khukarthil rapbei doura yuk'unglei; heirou Aiyei hou heiwari Neiyei minya chi'rikrai thimi rapbei roushing hoikna tloume; “Louningpilaklo, O limrap heirou khukarthilyei khulbungrap! Sina Chaylamya nani ninglhaklak; heitoubi Chaylamya yukpikur Puyakhi nani chanthunglak.

¹⁰ Khril lhangaimak thimi rapbei cheemrari, yani ukning hyingmakei taal'lhakkur lal rapne bil'thimlei nimakka? Heitoubi yani machinkna klallei holmarkhena khalni holbine marpeilhakbi khoulei nimaka?

¹¹ Khril lhangaimak thimi rapbei khal rapya khyingei lhoume toubine Keine mshing sherpirouko? Heirou minambine hol'lhakkur kao rapya Keine loulhakpirouko?

¹² Kouweiyo toulanungri, laldun thimi rapri khril thuithi; heirou akou leikalhon thimi rapkhi mandal kyunthil; heirou yaiyei murrei katyunthutkur tlourap heikhi minamnei tlouthil.

¹³ Heingamei Keine nayari manthiryerbi namsundawurla; heitoubi nane borhnei ngamrou nayari Keine maangyerrouwa.

¹⁴ Nane chamairou, heiya uktho toukhi naimakrou; heirou naiyei ukwaira msul-yuihatbidik leikaryomrou; nani yulkhounungei markumlhakrou, heiya koukhatkhi khouthungnungei makrou; heirou naiyei khoulhakthungkur heirapkhi Keine raalla lunglouyerrou.

¹⁵ Nangne lung tuklhakrou, heiya heiri lukphamakrou; nangne Olive shirek shumrou, heiya nangneri kou shirekkhi teithungphamakrou; heirou nangne darkha heiyui shumrou, heiya nangneri darkha yui mongphamakrou.

¹⁶ Kouweiyo toulanungri, nangne Omri'yei chaylam rapya chanthungbi leileihui; heirou Ahabei bommaine toukhou lhourap namma nanikhi touleihui; heirou yani shunmatupikur youkna tlourap hilthungni nane lhou touleihui. Ngam heineri, Keine nayari tlumni maangyerrouwa; heirou ram heiyei thimi rapne rikrai phachirouwa; heitoubi Keiyei thimi rapbei rikrai-maithee heiwari naidoura dachirouwa.”