MICAH 5 - KHYINGEI PU'TLOU Bible (BSI)

¹ Asinungri naitamne mimiyei raal kardounungei marshiklakalo, O raalluirap; kouweiyo toulanungri, kayari raal manlouheinungei kuikoolwurla; yane Israellei picharpu rapyari maibira thirshukni umtluiwurchirouwa.

Bethlehem'ra Krung Khat Puknungei Kantompi

² Heiya, O Ephrathah'yei Bethlehem, nangriyo, Judah'yei yultlai'rap lishing kounakei hangra nangri mandicha khat hoiyanungkhi, neirouwei Keinung'tlim Pu khat pukkeirou; heitoubi Ane Israellei Krung hoirou, Aiyei yenwaiyouna shullamri bongei youbine klui naimakna chaanlamrei yenkyou.

³ Ngam heineri, napuiyane naopuk waisang'bongyen manshan kna dou naksine, Aiyei thimi Israel rapya Ane lakurkhouheirou; heirouri yaihangrei maleithung teinao rapne yenkallengbi yaiyei teinao Israel rapkou hungkartilthurou.

⁴ Heirou Ane kanthoubi mayungrou, heitoubi Umpuei mantrangkyer hilthungni, heirou Aiyei Dunpu, Umpuei thang'allei minra Ane Aiyei yaorul rapya silrou; heirouri yani Aiyei kyunya chanthungbi kyingni paalrouwa; kouweiyo toulanungri, kheen heirouri tlaipang thleidong waphane Ane tangduichirou.

Kalthutpinei Tlou Heirou Klahyei Pichar

⁵ Heitoubi Ane kanungei kying yenpiheirou. Heirou Assyria rapne kaiyei ramra wachangbi, heirou ani kaidoura raal dabine marhotyei kheenrouri, aya chrungknani raal lousounanungei kane yaosilpu napung-eni heirou raallui upa lhouwa napungchot khalthutrou.

⁶ Heitoubi yani Assyria'yei ramya raalshon shinbine yaosilnakne silcharou, heirou yani Nimrod'rakhi wachangbi raal manbine luklourouwa. Heisitoubi Assyria'ne kai ramra heirallhakbi, kaidoura raal dabine konyei kheenrou, Ane kayari Assyria rapbei hutrouwei kalthutpirou.

⁷ Heirouri Jacobei himaleithung thimi thacha heiri thimichung kulyomei hangrari Umpurei rdainaksi heirou tingtou doura nungyuini rodokpi naksine hoirouwa; heirou yarap heiri tlaipang thiminung'tlim kleikhi nimak, nimanung thimiyei chanao rapyakhi ningmarshikmakrou.

⁸ Heirou Jacobei hirom thimi thacha heiri limdei heirou thimichung hangrari, ramhangrei yaalim hangrei yangkongnaksi hoirou; heirou A heiwari yangkong khatne yaorul hangra ranchabi, yaoshun rapya ani hulcha-hulcha chik'hatbi threlmaiyei kheenrou Ayari hukhatnekhi hul'khralchangmak heinakne hoiheirou.

⁹ Heiya neiya yanimak yeekna thimi rapbei maibongra neihut choune khaangyerpirou, heitoubi neiyei yeekna thimirap namyerwaya maangyerrouwa.

¹⁰ Heitoubi heiyei tlainirouri asitoubi hungthukheirou, toubi Umpune shunlei, “Neiyei sapuk rapya neirouwei Keine louthutrouwa, heitoubi neiyei sapuk kaari rapyakhi tumni maangyerrouwa.

¹¹ Heirou neirammei khukarthil rapya Keine toubairouwa; heitoubi mantrangkur raalpalrap nammakhi Keine nangbairouwa.

¹² Heirou thimkhui rapyakhi neihutrouwei Keine louthutrouwa; heirouri neinungei meirui thipirou thimi hukhatkhi makrouwa.

¹³ Heirou naiyei thrailha rapya heirou naiyei thrai bomra bunkhoukur thrai shutlai rapya Keine namma toubairouwa; heiyanungri nangne neiyei hutsa rapya hanui kallengni sikhuplhakbine khrummakarou.

¹⁴ Heirou naiyei Asherim lukbomrei bunkhou thrailha rapri neirouwei Keine louthutrouwa; heitoubi naiyei khukarthil rapya Keine maangyerrouwa.

¹⁵ Heirou Keiyei meithukkei malungkhakur awane shunya chanthungmak limrap nammaei doura Keine tanti pibine khlang lhakrouwa.”