MICAH 4 - KHYINGEI PU'TLOU Bible (BSI)

Umpu ne Tlaipangpalla Kyingni Thrungeirou

¹ Kluiyei tlaini heirouri asitoubi hungthukheirou, “Umpuei Pucheem phunkhouna lhungdou heiwari lhunglim nam'rouwei yerrouwei choudui lhungdou hoirouwa; lhungdou heiwani yerrouwei thang'aldui hoirou; heitoubi lim rapne bi heirounung trimkur-khamkur naimakne wachangbi kar'umrouwa.

² Heitoubi Limrap kounakni wachangbi yunheirou, Wawalo, Umpuei Lhungdoura kane kakawase, heitoubi Jacobei Dunpuei Pucheemra kani kachangase; bi heirou Ane kanungei Aiyei lam rapya shunpirou, heitoubi kani Aiyei lamra charou; kouweiyo toulanungri, chaylam heiwari Zion'rouwei yukpithutrou, heirou Umpuei tloulhang heiri Jerusalem'rouwei heipaothutpirou.

³ Heirou Limrap kounakyei tlakra Ane pichar toupirou, heitoubi tlatnarei mantrangkur lim rapyakhi Ane tlouthuk-raalthukya sempirou; heirouri yane raalshon rapya loutrunna louhinnungei sheemrou; heirou raal cheipak rapkhi chamche khoini sheemrou. Heirouri lim khatne lim khatdei doura raal youmarou, heirou yani raallei sireikhei marnorilmarou.

⁴ Heiya yani mimiyei yekulra darkha yam daakra heirou khyudhei trung holira muidani om-mathrilbi leirillouwa; heirou hukhatnekhi yaya chi'mathunyerkhi toumakarou; ngamri, Thangwan-Shimleiyei Pu Umpune shunthutpikhou.

⁵ Kouweiyo toulanungri, thimi nammane mimiyei thraiyei minya khrumbine chakurkhi kya, heiya kari klui naimakei klui naimakne Umpu, kaiyei Dunpuei minya khrumbine leirouwa.”

Israel Rapya Markumpithurou

⁶ “Heiyei tlainirouri raal manloukur thimi rapya Keine ungmarkumpirou, heirou hulchekkurbi klah-mrimni marhotpikur thimi rapya Keine markumpithurou,” toubi Umpune shunlei.

⁷ “Heirou raal manloukur thimi rapya Keine maleithungyerrou, heirou tlatnara hulthutloukur thimi rapyari mantrangkur Lim khat hoiyerrou; heitoubi Umpune Zion'yei Lhungdoura kheen heirouwei waiyoubine klui naimakne yaidoura Krung khoini thrungrouwa.”

⁸ Heirou nangri, O Yaosil Puei mayungna lhungdou; heirou Zion'yei Chanapuiya rapbei kallena bi lhungdou; haallei Krungbom heiwari neinungei mallenglhakpithurou, heirou Jerusalemei Chanapuiya rapnungei yaiyei Krungram heiwari hanui yenkalleng'lhakthurou.

⁹ Asinungri koutounei nangne ungraobi chapkurawo? Naihangra Krung hukhatkhi makme touneiko? Naya shunmtupinungei Puri hiyura touneiko? Nao puknei manshan kna napuiya'nakni lhawai klahni nriebidik leikurya koutouneiyo naya?

¹⁰ O Zion'yei Chanapuiya, nangri napuiyaei naopuk manshan kna naksine manshanlakalo; kouweiyo toulanungri, nangri asinungri khukarthil lakurkhoubi pura charouwa; heitoubi nangri Babylon'ra wa'tlungrouwa, heitoubi bi heitamrou neiya yaihutra pilhakrouwa; bi heirouwei Umpune neiya yeekna thimi rapbei hutrouwei neiya lhukthutpithurou.

¹¹ Asinungri limrap chungwani neiya yanimakne kartilbi yani asitoubine yunrillei: “Jerusalem'ri borhwurbi marmoklakasu, heiyanungri Zion'yei doura kou thukleiyo touri kane mit'thrilbi leirouwa.”

¹² Heiya yaneri Umpuei kningyari muphachangmaklei; heirou Aiyei waikrang heiwakhi yani lamphachangmak; kouweiyo toulanungri, yayari ruitlaira cha'sphal theimanpungkur heinakni Ane markumheirou.

¹³ “Kanthoulakalo, cha'sphalya mnuibi thingsundalaklo, O Zion'yei cha napuiyarap, Keine naiyei cheirung rapya thirchei hoiyerrou; heirou naiyei hutmathin-homathin rapya lapathir holyerrou. Heiyanungri nani thimi chungwaya harhar dani umchaalkur manerou; heitoubi yani minambi taallhakhou lalthum rapya, heirou sina-lapa rapya Umpu, heirou Tlaipang-Shimleiyei Pu Dunpu'nungei makatrou da.”