MICAH 2 - KHYINGEI PU'TLOU Bible (BSI)

Kanring Rapya Marhotpi Thimi Rapbei Doura Pichar

¹ Ipneikhi naimakne lhangaimak lhouya wairangbi klei thimi rapnungeiri kounakei lah'kna hoirouwo! Yane nung katwaarranung yai wairangkur lhangaimak lhou rapya touthutlei, ngamri heinaksi toumanenei mantrang heiri yaihutra klei.

² Heirou yani khrampha tangnei ngamrou umphit toubine phailou rapkhi nambine lunglouheipi; heirou yani thimi khatdei cheem'keiya paammanungri, namne changbi marhotpikur, heitoubi aiyei lalthum ramphayakhi nambine lungloupikur.

³ Heingamei Umpune asitoubi shunlei, “Thilak, heinaksi bommai rapbei dourari Keine lhangaimak thukyerrou; heirouri heinaksi lam'rouwei nani ngak khreithutbi kartleikur manemakrou; heitoubi heiyei kheenrouri nani tangchakurkhi manemakrou; kouweiyo toulanungri, kheen heiri thuithine lhangaimakrou.

⁴ Heinaksi tlainirouri yani naya shei shaknarou, heitoubi lhawai klahni kanrelni chapbeirou; heirou yane yunrou, ‘Kari nammane maangchirou kleiyame; kai thimi rapbei bomya Ane thikfletdurla; heiwaya koutoubi Ane kairouwei louthutloukuro? Heitoubi kaiyei ramkhi kaya yeekna thimi rapbei hutra Ane pilhakurla.

⁵ Ngam heineri Umpuei khying thimi rapbei kulyom hangra naisiruk ariyame toubi tampirou thimiri hukhatkhi makrouwa.’

⁶ Heirou yane, ‘Nane Pu'tlou shunthutmaklo,’ toubi yani Pu'tlou shunthutpi thimi rapya shundongrou. Heingammei yani Pu'tlou shunthutmarou, heiya kanungeiri koukhi rikranungei bom makrou.

⁷ O Jacobei bommai toubi minthulya phakur thimi neinungeiri, Umpuei lhawaine yanimakurako? Awaya Aiyei touthutkur hoiyurako? Keiyei tloulhangniya tharmu chimni chathimi rapnungeiri lhangai koukhi toupimakurako?

⁸ Heiya hilluirouri nane Keiyei thimi rapya karhani yeekna khoini lhou toulei; heirou koukhi toumakroume toubi ningchabine, naipongra yenkral tounaram mak thimi rapyakhi nane raallei yenkalleng thiminakni yaiyei phirul-phishamb rapyakhi thiklhukbine lunglouheila.

⁹ Keiyei thimi rapbei napuiya rapyakhi yai cheemrei kyingni louklei rapyakhi nani hulthutdurpila; heirou yaiyei chanao raprei Keiyei klui naimakei thang'alya nane lunglouheila.

¹⁰ Nane kanthoubi chalakalo! Kouweiyo toulanungri, bi awari nai mathrilnanungei bom nimaklei; ngamri bi awari marmokura, awine nayari khullounungei makne maangyerrouwa.”

¹¹ Thimi hukounak khatne yenkarwaichabine mandallei tlouya yunbine, “Nanungei darkha heiyui, heirou tul marthumni thukyernanungei paolaa shunthutpilei,” toubi yunlanungri, a heiri heinaksi mandal thimi rapnungei paocha thimkhui khat hoirou.

¹² “O Jacobei thimirap, Keine na nammaya shuimakne khumtilleirou; heitoubi Israel rapbei maleithung thimirap, Keine naya ungmarkumpirou; Keine ya nammaya Bozrahyei yaorulnakni yaocheemra markumlhakpirou; heirou ramthingrei halrul naksine Keine yaya hulmarkumpirou; heirouri thimi kartilnei houni dirdir kartlinrouwa.

¹³ Heirouri yaosil Pu khatne yai maibongra lam louphatpirou; heirouri yane shumtrum cheemkhar nambaibine namma pura wathukchirouwa; heitoubi yaiyei Krungni yai maibongra loucharouwa; heirouri Umpune ya nammaei Lu khoini thrungrouwa.”