MICAH 1 - KHYINGEI PU'TLOU Bible (BSI)

¹ Judah'yei Krungrap Jotham, Ahaz heirou Hezekiah'yei chaanrou, Moresheth'rei Micah'nung Umpuei paolaa asitoubi yongshunpikur. Samaria'le Jerusalemei ngamrou ani kanre-kandangne kar'anmukur.

Samaria'le Jerusalemei Doura Kanrelpikur

² Louningpilo, tlaipang thimirap na nammane; Ninglhakpilaklo, thleidoura paalbi klei Lim nammakhi; Pu DUNPUne, Aiyei khying Pucheem'rouwei naidoura yanimakne tloumayungpi Pu khoini leilaksu.

³ Kouweiyo toulanungri, thilak, Umpune Aiyei Pucheem'rouwei wathukbine, heitoubi yongchumbi tlaipangpallei bungchou dourei klei lukbomrap heirou thraibom rapya yilthirou youlei.

⁴ Heirouri lhungdou rapri khuiluni meilira yasundakur heinaksine Aidaakra yasundarouwa; heitoubi takhangnarei yui shungsundakur heinaksine lhungdourap tringbaibi phaikara namma kungsundachirouwa.

⁵ Awari Jacobei thuithine lhangaimaknei ngammei, heirou Israel bommaine borhnei ngammei thukrou kyou. Jacobei lhangaimak borhri kouwo? Heiwari Samaria nimakeiya? Heitoubi Judah'yei borhlhou touna bi lukbom, thraibom rapri kourawo? Heiwari Jerusalem nimaka?

⁶ Heingammei Samaria'yari loutlairei raba hongurnungei baimanpungkur heinaksine hoiyerrouwa, heitoubi darkha trung lingnanungei meipung hongkur heinaksine hongurouwa. Heirou aiyei lhungdourei thlung rapya phaikara Keine malletsundarou, heitoubi aiyei cheemmunri hangwalne lakurkhouyerrou.

⁷ Heitoubi bi heitamrou klei thrai lharap namma haar'haar umchaallhakrouwa; heitoubi chorit naimakne langlhak-tallhakhou bi heirouwei klei putcheirap nammakhi meira hongurchirouwa; heirou bi heiyei thrai lharap namkhi koukhi karsukmakne Keine khingmarpeibi khoupirouwa; kouweiyo toulanungri, heirap namma heiri aiyei chorit naimakei lhoutoubi langlhakhou laldiklei; heineri chorit naimakei taal'lhakkur putcheirap heiri anungei heisi mallenglhakpirou.

⁸ Ngam heineri heinungei'tlim Keine kanrel laasherheirou, heinungei'tlim keihomai khorkhang tungmakne, koushamb khatkhi baangmakne hakthil hangwalni ranchabi klah mutpiheirou; heitoubi yekshangei khungnakni Keine ungraochani heirou tikini nrieni chapbeirou.

⁹ Kouweiyo toulanungri, aiyei yemna bi heiwari damchangmarou; ngamri aiyei kna heiwari Judah wa'tlungni karyouwura, heirou kna heiwari Keiyei thimi rapne palnabi Jerusalemei palshung ramphane wa'tlungura.

Yikna Thimi Rapne Jerusalem'ra Wachangura

¹⁰ Nane Gath'nungei shunpimaka, heirou nani chapbinekhi kouya touheirou; Beth-le-aphrah'yei rahui hangra kalletchabine leilaka.

¹¹ Shaphir'ra yuldabine klei thimirap, nari phirul-phishambkhi yaomakne rikraiya doubi hangwalne raal manlounara chalaka; Zaanan'ra klei thimirap, nari nai leinarouwei wathuk manemarou; Beth-ezel'yei thimi rapne kanrel laasherbine chapbeinung ane nayari koukhi trungpi manemarou.

¹² Ngamri, Maroth'rei thimi rapne likarsui lhangaiya msul-yuikhatne karngeibine leilei; heiya Umpurei lhangaimakya Jerusalemei palshungra yukmalhetsundalei.

¹³ O Lachish'rei klei thimirap, sapuk kaarira sapuk msuibaanglaka; na heiriame Zion'yei chanao rapbei borh yenwaiyounari; kouweiyo toulanungri, Israellei borh heiri neirouwei phawurlame.

¹⁴ Ngam heineri, nani Moresheth-Gath'nungei shalthutdurnei hutthul malankhourou da; Achzib bommaiyei thimi rapri Israel Krung rapbei maibongra machinknayei mandalkhei thimirap hoirouwa.

¹⁵ Heiyakhi duinara, O Mareshah'rei klei thimirap, naidoura Keine ram lukrou thimirap yenmalhetdeirou; heitoubi Israellei thang'alri Adullamyei hutra hungdarouwa.

¹⁶ Judah'yei thimirap, naiyei malungshi'kna chanao rapnung'tlim nani sam ngoumathaiwurbi, langteyaei lu kuknakni nailu kukyerwurlaklo; ngamri, yani naya lakkurkhoubi raal manlouheibi kul chalphoprouwa.