MATTHEW 9 - KHYINGEI PU'TLOU Bible (BSI)

Jesu'ne Mnaak Pangkhat Khi Thimi Khatya Raiyerpi

¹ Jesu'ne mali tungbi samadru khatlhang mnakrei klei Aiyei ramra yenkallengkur,

² bi heirou thimi rapne Aiyei leinara mnak pangkhat hisundakur napawa khat ipna doura phneibine heiurlhakur. Heirou Jesu'ne yai uklum heinak tangei klei heiwaya loumunarou, Ane mnak pangkhat khi thimi heiwanung loushun, “Neiyei malungthram hoiniyalo, Keiyei chawa! Ngamri neiyei borh namyer limmurpila.”

³ Heisi tounarouri Chaylamyei upa rapne yaitam yunkril, “Thilak, napawa heiri mandalya kyunso!”

⁴ Heirou Jesu'ne yai kning heiya muwurbi Ane yanung kyun, “Kouya tounei nane heinakei lhangaimakya ningchabi leikurya?

⁵ Yukkhalthilak, ‘neiyei borh rapya marthingpiwurla’ toubi kyunle, ‘neiyei ipna khumdourei kanthoubi pochawalo’ toubi kyunri kouni lairou?

⁶ Ngam heini nane murou, touri Thimiyei Chanapawari tlaipang doura borhya marthingpinanung mantrang kleime touri nanekhi mupharou.” Heisi toubine Ane mnak pangkhat khi thiminung kyun, “Kanthoubi neiyei ipna khulloubine neicheemra kallenglaka.”

⁷ Heirouri napawa heini loukanthoubi ai cheemranung shaalkur.

⁸ Heirou thimi rapne heiya munarouri, yane chiwurbi heirou tlaipang thimi rapnungkhi heinakei mantrang leiyernei ngamrou yane Dunpuya mathangkur.

Jesu'ne Matthewya Ungpikur

⁹ Heirouri Jesu'ne bi heiya lakurkhoubi, Ane heisi lam tlayeinung, napawa khat minri Matthew toubi ung Khulrui thou thimi heiwane aiyei khulrui markumna cheemra ombine louklei Ane wamukur. Heirou Ane Matthewya “Keihilla chanthungalo” toubi wachilkur. Heirouri Matthewni kanthoubi Aihilla chanthungkur.

¹⁰ Heirou Jesu'ne Matthewei cheemra chamaibi louleiyeinung Khulrui thou thimi dei raple, heirou mihangra kulchalmak thimi thale pulne wachangbi heirou Aiyei ruishik raple lokpani lukturng doura chamalnakur.

¹¹ Heisi tounarouri Lhangai karsa thimi rapne heiya mulhakurbi heirou yane ruishik rapnung kngai, “Kouya tounei ngammei naiyei Upawane heinaksi thimi raple pulne chamaimalnawo?”

¹² Heirou heisitoubi kyunya Jesu'ne mayeknarou Ane yanung mallangkur, “Kna mak thiminungri thim ungbom thukmak, heiya kna thimi rapnungtom thim ungrou.

¹³ Nane holphalak, Dunpuei Khyingei lailikra asitoubi yunlei. ‘Kringpi kheiyatom Keine madulei, heitoubi khrumnarei makatkur anchumya Keine madu nimak.’ Keiri rikrai khrumna kya thimi rapya ungpirou kyong nimak, heiya thimi rapne yaikulla chalyermak thimi rapya ungpirou kyong.”

Cha'kmai Ngeinei Ngamrou Tlou Kngai

¹⁴ Heirouri Yuiluppi John'yei ruishik rapne Jesuei leinara wabine kngai, “Kale lhangai karsa thimi rapne mandonser cha'kmai ngeibine, Neiyei ruishik rapri tekkhi ngeimakne cha'kmairi koungammei?”

¹⁵ Heirou Jesu'ne yanung loumallangpi, “Nai kningri, nu klou napawane aiyei palui rapya omkanthrinbi leiliyenri, tlaini heirouri yane chaamak-maimakne lhawai klah'ne omrouko? Heiri kouniroukhi hoimakrou! Heiya nu klou napawa heiwaya yai hangrouwei ruimartleiwurbine, heirou aiyei palui rapne chaamak-maimakne lhawai klah'ne leithungrou tlaini heiri hungeirouhui.

¹⁶ Thimi hu khatnekhi linglik cheetna doura phi'mtum ranya thruibaangbine tholrilmak, heiya thruibanglanungri phi'mtum ran heiwane linglik khman heiya thikkarshanloubi cheetna bi heiri duine maryarou.

¹⁷ Heinakrimne hu khatnekhi darkha heiyui ranya an'unkao khmanra haalbi khoumak, heiya haallanungri khman an'unkao heikhi loutrekurbi, darkha heiyui heikhi yanthutdurou. Heirou an'unkao heikhi karsukmakrou. Heinung'tlimri an'unkao ranra darkha heiyui ranya lhalhaklanungri, an'unkao heikhi heitoubi darkha heiyuikhi khintamrek lhangairou.”

Jehudi Lhou-Urpu Khatdei Chanapuiya, Heirou Jesuei Linglikra Therthungkur Napuiya

¹⁸ Jesu'ne tlou heisi yunbi leiyeinung, Jehudi lhou'urpu khatne wabine, Aiyei maibongra khuklu kanthrunchabi Anung shunchakur, “Keiyei chawiri asinunghak hiyurame; heini wabine aiyei doura Neiyei hut beicha tlangpilaklo, heitoulanungri a heiri hanui ringroume.”

¹⁹ Heirouri Jesu'ne kanthoubi aihilla heichanthungkur, heirou Aiyei ruishik rapkhi Ale kalhonne wakur.

²⁰ Heirouri kum chiple-khnirekpa hee karsobi kna napuiya khatpini Jesuei hilla louchanthungbi Aiyei linglik chulna msurchara tekcha loutherthungkur.

²¹ Heibongnungri napuiya heini ukningra aitamne, “Keine Aiyei linglik msurchara hanuidikcha thirthunglanungri, keiyei hee karso ari shuimakne kaprou!” toubi ningchakhou.

²² Heirou Jesu'ne karhilni kallekbi thiphanarouri Ane napuiya heiwiya mulhakbine heirou Ane kyun, “Neiyei malungkhrah hoiyalo, Keichawi! Ngamri neiyei uklum heini neiya raiyerwurla.” Heirouri tallengne napuiya heiyei hee karsokhou heiri kapkur.

²³ Heitoubi Jesu'ne Jehudi lhou'ur puei cheemra wachangurbi, bi heirou Ane thimi'khi ruinanung marshikbi louklei phungrui raple, heirou chapkar'umbi plangbine louklei thimi rapya mubi,

²⁴ heirou Ane yanungei kyun, “Na nammari pura wathukriyalo! Napuiya douwacha heiri himakhui- a heiri iplhakurme!” Heisi tounarouri ya nammane Aya loulaonakur.

²⁵ Heiya thimi rapya pura hilthutkurle tallengne, Jesu'ne cheemwaira wachangurbine, napuiya douwa heiya aiyei hutbangra wachurbi taangkanthounarou, a heiri loukanthoukur.

²⁶ Heiyei pao heiri ram heiyei kulwairei klei yultlairap namyerrou karyoune mayekkur.

Jesu'ne Mitdeo Napawa Napung-khniya Damyerkur

²⁷ Jesu'ne bi heiwaya lakurkhoubi Ane heisi chayeinung, mitdeo napawa napung-khnine Aihilla louchanthungbi Anung ungraochani loukyun, “David'yei chanapawa, kaya bei kringpilaklo.”

²⁸ Heirou Jesu'ne cheemwaira wachangeinung, mitdeo thimi napung-khnine Anung hungnarou, heirou Ane yakhuntanung loukngai, “Keine naiyei mitdeo heiwaya raiyer maniroume touri nakhuntane uklum leileiya?” Heirouri yakhuntane, “Moi, Upawa, kane kaiyei uklum tangni leilei!” toubine loumallangkur.

²⁹ Heitounei ngamrou Jesu'ne yaiyei mitlungra palpibine kyun, “Nane uklumnei ngamrou nai mitdeo heiri heinakrimne lhangaikur hoilakasu!”

³⁰ Heirouri yakhuntaei mitdeo heiwari hallei'nakrimne raikur. Heirou Jesu'ne yakhuntanung rekrek shunmatukur, “Lhou ari thimidei hu khatnungkhi yunpimakno!”

³¹ Heiya yakhuntane shallurbi thukkur lhou heiri ram heirou karyoune mayekyerwurla.

Jesu'ne Tlou thukmak Napawa Khatya Raiyerpi

³² Heirou thimi chungne shalkarkhaikur hillouri, thimi thane lhangaimak lhawai tungnei ngamrou tlou thukmak napawa khatya Jesuei leinara heiruilhakur.

³³ Heirou lhangaimak lhawaiya hulthutkurle tallengne napawa heiri tlou yunthut manikur, heitounei ngamrou thimi nammane ngakurbi yaitam yunrilkur, “Anakei lhouthuk awari kani Israel ramra tekchakhi mukhouthimakhui!”

³⁴ Heisi tounarouri lhangai karsa thimi rapne kyun, “Lhangaimak lhawaiyei Pawane Anung heinaksi lhangaimak lhawai rapya hulthutkur maninei mantrangya pikur.”

Jesu'ne Thimi Rapya Kringpi

³⁵ Jesu'ne khokul kounakle, heirou yultlai kounakra yenkarwaichabi thrilthikhou. Heirou Ane Pukhrumna Cheemra polhakbine, Thangmun Krungramei ngamrou lhangaiyei paolaa kounakya shunthutkhou, heirou limlimyei kna thimi rapyakhi raiyerpikhou.

³⁶ Heirou Ane thimichung kartilbi kleiya munarou, Aiyei ukningra yaya kringpikur, ngamri thimirap heiri tounaram makne lhawai lahwurbi kanwangni leikur, silpirou makkur yaorulnakne hoiyura.

³⁷ Heitounei ngamrou Aiyei ruishik rapnung kyun, “Luknungei louyaori beimakne tanglei, heiya lukpirou thimi rapri chungmaklei.

³⁸ Heini nane loupunung shunchalak, heirouri Ane trun markumnanung thimi yenmalhetpirou.”