MATTHEW 8 - KHYINGEI PU'TLOU Bible (BSI)

Jesu'ne Kna Thimi Napung khatya Raiyerpi

¹ Jesu'ne lhungdourei yongchumyeinung, thimirap chungwane Aihilla louchanthungkur.

² Heirouri thilak, raichipat napawa napung khatne Aiyei maibongra louchanrobine khuklu kanthrunchabi loubuchakur. “Upawa, Nangne yapiyanungri, keiyei raichipat awaya bei marthingyerbi raiyerpilaklo.”

³ Heirouri, Jesu'ne Aihut lamthutbi napawa heiya palbine asitoubi loushun, “Keine marthingyerpirou; neiyei raichipat heiri damkur hoilakasu.” Heisi tounarouri napawa heiyei raichipat heiri tallengne dammura.

⁴ Heirouri Jesu'ne anung shunthu, “Louninglak! Neiyei raichipat damkur heiri nangne thimidei hu khatnungkhi yunpimakno, heitoubi Suipipu leinara wabine, neiyei raichipat heiya yrothiyerlak; heisi toubine Moses'yei shunkhounakne, thimi rapne neiyei raichipat heiri dammura toubi munanungei Dunpunung khrumna put makatlaka.”

Jesu'ne Rome Raallui Macha Khatdei Upawayei Shokya Kna Raikyer

⁵ Jesu'ne Caperna-um'ra wa'tlungnarou, Rome'yei Raallui upa khatne Aya louchanrobi, bei trungpilaklo toubi loushunchakur.

⁶ Heirou ane loukyun, “Upawa, keiyei shok napung-khat cheemra nawurbi ipnadoura chutchangmakne beimak mrimne leiyurame.”

⁷ Heirou Ane loushun, “Keine wabi aiyei kna heiwaya raiyerpirou.”

⁸ Heisi tounarouri Raallui upa heiwane kyun, “Heisi tourimakhui Upawa, keikyunri Neiya keicheemra wawase tounei nimakme, keiyei cheemwaira Neiyei wachangri kallonamakrou, heinung'tlimri Nangne keiyei shok heiyei kna heiya rainanungei tlouyatom sherpithunglaklo.

⁹ Keikhi Raallui upa rapbei daakra klei raallui khatme, heirou keiyeikhi keidaakra raallui machakhat leilei. Heirou keine ya napung khatya ‘Chawalo’ toulanungri ane louchakur; heitoubi keine napung khatya ‘Ara hungalo’ toulanungkhi heirou ane louchanthunglei; heirou keiyei shok khatya ‘Lhou hei yukpanglak’ toulanungkhi ane loupaanglei.”

¹⁰ Heitoubi kyunya Jesu'ne mayeknarou, Ane ngakurbi, heirou Aihilla chanthung thimi rapnung kyun, “Keine nanung tanghakne yunlei, touri, Israel thimi rapbei hangrakhi napawa heiyei uklumnakne khatchatomkhi Keine karthangmakhui.

¹¹ Keine nanungei shunthutlei touri, kulkung lhangreikhi, kulrel lhangreikhi thimi chungne wakartilbine, Abraham, Isaac heirou Jacob'le pulne Thangmunyei Krungramra ombine phalphei marngeiyeinungri,

¹² Thangmunra changbom thuk thimi ramphane kmehyei bira khingthutdurbine, bi heirou yane chapbi, yaiha khrik-khrik chikmardebi leiheirou.”

¹³ Heirouri Jesu'ne Raallui upa heiwanung kyun, “Nangri cheemra shallaka, heitoubi neiyei uklumnei ngamrou neikning heiri heisi hoiyerpila.” Heirouri tallengne Raallui upawayei shok heiwari kna raikur.

Jesu'ne Thimichungya Kna Raiyerpi

¹⁴ Heirouri Jesu'ne Peteryei cheemra wakur, heitoubi bi heirou Peteryei pipiwi heini kanchun nawurbi ipnadoura louklei Jesu'ne wamukur.

¹⁵ Jesu'ne napuiya heiwiya aihutra palbine yrothinarou, aiyei kanchun kna heiri raikur, heirou Ane kanthoubi Jesu'nung watlhou churtrungpikur.

¹⁶ Heitoubi tlaini heiyei yenrawaikur heirouri, thimi rapne Jesu'yei leinara lhimpob thimi kounakya heiruilhaknarou, heirou Jesu'ne tloulhang khat yunbine lhangaimak lhawai rapya hulthutdurbi yaiyei kna heiwaya raiyerpikur.

¹⁷ Ane heinakei lhou rapya toubine Isaiah Thimkhuiyei shunthutkhou tlou rapya hungchimyerpikur, touri “Aitamtomni kaiyei knaya urloubi kna namyerwa damyerpi.”

Jesuei Hilthungrou Thimirap

¹⁸ Heirou Jesu'ne Aya karhilni thimi chungne wakar'umbi klei heiwaya munarouri, Ane ruishik rapya Samadruei khatlhang seralla wawurnanung hilkur.

¹⁹ Heirou Chaylamyei upa khatne Aiyei leinara wabine kyun, “Upawa, keiri nangne koura-koura chawanungkhi Nangle kalhonne chananungei marshikkura.”

²⁰ Heirou Jesu'ne anung loushunkur, “Yekshang rapbeikhi yai chaknanungei thleikhur klei, heitoubi ramrei waacha rapbeikhi yai chaknanungei rabu klei, heiya Thimiyei Chanapawaeiri Aiyei lu khangbi karngananungei bi khatkhi maklei.”

²¹ Heirou ruishik hangrei napung khatne loukyun, “Upawa, keiri cheemra kallengbi kaiyei pawa hikurya hungbine khi ruikhourieise.”

²² Heirou Jesu'ne anung loushunkur, “Keiyei hillatom chanthunga, khi thimi rapne yai hikur heiwaya ruilaksu, heihorkhoulaka.”

Jesu'ne Yuilhouya Trimkyer

²³ Heitoubi Jesu'ne malirilla polhakbine, Aiyei ruishik raple kalhonne chayeinung,

²⁴ thilak, loumuthungmakne lhimnung martheetang katyouwurbi samadru heirouei yuilhouni maliya katdumrou waiyoukur. Kheen heirou Jesuri ipbine louklei.

²⁵ Heirou aiyei ruishik rapne Aiyei leinara hungchangbi hungfyoubi kyun, “Kanthoubine kaya bei kalpilaklo, Upawa! Kari hiwurou leiyame!”

²⁶ “Nari koungameiyo heinak plangkurya?” toubi Jesu'ne loukyun. “Nai uklumya koungammei heinak shulkurawo?” Heirouri Ane kanthoubi martheele yuilhouya ‘Neemmalo’ toubine yunnarou, tallengne yuilhou heiwari trimkur.

²⁷ Heirou thimi namyerwani ngakurbi, “Awari kounaksi thimiyo? Martheenikhi aiyei kyunya chanthunglei!” toubi yane yunrilkur.

Jesu'ne Lhimpob Napawa Napung khniya Raiyerpi

²⁸ Jesu'ne Galilee samadru khatlhang mnakra klei Gadara ramranung wayeinung, lhimpob napawa napung-khnine lhanyaorei louchanthutbi Aya rorilkur. Napawa napung-khni heini lhim popburnei bi heirou leinei ngamrou thimi rapne chiwurbi lhanyao lhangrei lamra hu khatnekhi ralngammak.

²⁹ Heisi tounarouri thilak, “Dunpuei Chanapawa, Nangri kairouwei kouya maduwo? Nangne kaya kheen hungtlungbongnung maangyerrou waiyoukurako?” toubi yane ungraochabi loukyun.

³⁰ Bi heirouwei kalnikhi tlatrilmakna ram khatrou hog rulkhat silbine louklei.

³¹ Heirouri lhim rapne Jesu'nung buchakur, “Nangne kaya hulthutrou waiyouwanungri, kayari hogrul hangra changyerpilaklo.”

³² Heirou Jesu'ne yanung shunkur, “Nari leimaka, thuklaka,” heisi tounei ngamrou lhimrul rapne thukkurbi napawarap heiya horkhoukur, heitoubi hogrul hangra wachangkur. Heisi tounei ngamrou hograp heine samadru kanyarnara changbine yuira namyerwa dahatkur.

³³ Heirou hogsil thimi rapne trukkurbine, yane yultlaira channurbi thukkur lhourap namyerwa heiya thimi rapnung pao hungtamkur, heirou yane lhimpob thimi rapnung thukkur heikhi yunpikur.

³⁴ Heitounei yultlai heirou klei thimi namyerwani pothutbi Jesu'ya murilkur; heirou yane Jesu'ya yai ramya horkhoubi shallakalo toubi shunchakur.