MATTHEW 7 - KHYINGEI PU'TLOU Bible (BSI)

Mideiya Pichar Tou

¹ “Nane mideiya pichar toumak, heiyanungri Dunpune nayakhi pichar toumakrou,

² ngamri, nane thimi deinung pichar toukur heinakrimne Dunpune naidourakhi pichar touweirou, heirou nane minung holpikur trum heibil nanungkhi holthueirou.

³ Heirou neiyei mitlungra klei mithrum heiyakhi mumakne, neiyei teinaowei mitlungrei klei mithrum heiwaya kounungei shunmandowo?

⁴ Heitoubi neimitrei borh heiwari heengmtumnak leibine kousitoubi neiyei teinaowei mithrum louthutpiyeise toubi yunrouwo?

⁵ Lhangai karsa thimirap nari! Naiyei mitlungrei borh klei heiwaya louthutrilak heitoulanungri neiyei teinaowei mithrum heikhi kanreni mumanirou.

⁶ Marthing putya uinung khingpiwurmak- hune kmu, yane neilhangra kalleklhakbine neiya chikkurkhi kya; heirou naiyei manklu thlungkwaar heirapya hognung khingpiwurmak, heiwaya khingpilanungri yaiyei honi heirapya tatmanuirou tomngeiya.”

Bucha, Rapha, Cheemkhar Hei'um

⁷ “Buchalak, heitoulanungri nanung pirou; raphalak, heiyanungri nane raphamurou; heirou cheemkhar hei'umlak, heiyanungri nanungei loulatpirou.

⁸ Ngamri bucha thimi kantangnung pirou; heitoubi rapha thimi kantangne rapmurou; heirou cheemkhar hei'umbi kngaak thimi kantangnung khar laatpirou.

⁹ Na hu khatne pa hoibi neiyei chane mumtol bulanungri thlungmtumya loukhaangpirouko?

¹⁰ Nimakne, ane thanga bulanungri nangne frul loumanpirouko?

¹¹ Ngamri nane heinakbil lhangaimakya hoiyanungkhi, naiyei chawa rapnung lhangaiyatom pi'kninakne, Thangmunrei klei nai Pawanekhi Anungei buchakur thimi rapnungri kounakei lhangaiya pinirouwo!

¹² Heinakrimne, nane mideiya nanungei touyerkni heinakrimne, nanekhi minungei heinakrim toupilak. Moses'yei Chaylamne heirou Thimkhui rapbei shunthutkhouya mayewurkhou namyerwa heikhi heirapriso.”

Karsik Lam

¹³ “Nane karsikna lamra chawalo, ngamri khiya ramra chananungei lamri maryalei, heitoubi bi heirou ruilhakna lamri chayeinung klai, heirou bi heirouri thimi chungwane chabi leilei.

¹⁴ Heirou ringna lhangranungei lam heiri karsiklei, heirou lam heiri beimakne klu, lam heirou cha thimi chungmak.

Heengtrung Heirou Aiyei Hei

¹⁵ “Baorani yao-un khupbi, rilrari yekshangeinak ukning borhni thimbi, nanungei Dunpuei paocha thimi rapme toubi polhakanungri nane mukheine louropilak.

¹⁶ Heirou yane kounaksi tlouya yunthutlei touri nane loutrimurou. Thru yamra darkha hei heimakrou, heinakrimne thru trungra khyudhei heimakrou.

¹⁷ Heitrung lhangainara lhangai heenghei heirou, heitoubi lhangaimak hei-trungrari heenghei manthirrou.

¹⁸ Heitrung manbobnara hei manthirmak, heitoubi heitrung manthirnarari hei lhangai heimakrou.

¹⁹ Heitoubi hei lhangai heimak heitrung rapri sendeekkurbi meiwaira khinglhakbine hongurou.

²⁰ Heinakrimne yai touthutkur lhou heirouei Dunpuei klal paocha thimi rapme toubine nane loumurou.

Nari Huwo Keine Mumak

²¹ “Keiya Dunpu, Dunpu! toubi ungkur thimi namyerwani Thangmunyei Krungramra changrou nimak, heiya Thangmunra klei kaiyei Pawaei kningya hilthungei lhoutou thimi raptomni changrou.

²² Pichar tounanungei tlaini hungeinungtom, thimi nammane Keiya ‘Dunpu, Dunpu’ toubi lou'ungphaeirou! ‘Neiminra kani Dunpuei lhangai paoya shunthutkhou, heirou Neiminra kani lhangaimak lhimkrao rapyakhi hulthutkhou, heitoubi kani kngakei lhou kounakyakhi toukhou!’ toubine yunrou.

²³ Heirou Keine yanungei asitoubi louyunrou, ‘Nari huwo? Keiri tekkhi mukhoumak. Lhangaimak mandallei thimirap, nari bi arou leimaka, shallura!’ ”

Cheem Sabaang Thimi Napung-khni

²⁴ “Heiyanungri, hukhatne Keiyei kyunya mayekloubi heiyei hilthungne lhoutou thimi heiri, thlungshim dourei cheem sabaangkur mukhei thiminaksi.

²⁵ Nung yenrobi kungra tuywok yongbinekhi heirou lhimnung-martheetang katthiyanungkhi, kouniroukhi cheem heiwaya namdeek manemakrou. Ngamri cheem heiri thlungshim doura sabaangkur.

²⁶ Heiya, hukhatne Keiyei kyunya mayekloubi, tlou heiyei hilthungne lhou toumakanungri, a heiri shitnrui doura cheem sabaangkur muheimak thiminaksi.

²⁷ Nung yenrobine, kungra tuywokni katpayeinung, heirou lhimnung-martheetang katthiyeinung cheem heiwaya namdeekrou. Heiyanungri namdeekkur cheem heinung'tlimrou kounakei lah'kna hoirou!”

Jesuei Mane-Mantrang

²⁸ Heirouri Jesu'ne tlourap heiya yunchibine, Aiyei marnopikur heirapya mayeknarou thimi rapri beimakne ngakura;

²⁹ ngamri, Jesu'yeiri Chaylam upa rapbei shunmatupinak nimakne, Aiyei mane-mantrang kyaoni marnopinei ngammei.