MATTHEW 3 - KHYINGEI PU'TLOU Bible (BSI)

Yuiluppi John'ne Lhangai Paolaa Shunthutpi

¹ Kheen heirou yuiluppi John'ne Judea rammei ramhangra wathukbi lhangaiyei paolaaya asitoubi shunthutkur.

² “Nane naiyei borh lhou'rouwei mai holthutlaklo, kouweiyo toulanungri Thangmunyei Krungram heiri kalthi nakkura!”

³ John'ne paothutdeinung Thimkhui Isaiahyei shunthutkhou heinakrimne yunlei, “Hukounak khatne ramhangra, ‘Dunpu'nungei naiyei lam loumarshiklak; Aiyei chananungei lamya mar'engyerlaklo,’ toubi ungraochalei!”

⁴ John'yei phirulri Utdei an'unni mansam; heitoubi Ane an'unnei shintlak rui raklei, heirou aiyei chamai putri khaole khuiningtomni.

⁵ Heirouri Jerusalem'rei, Judea khokulrei, heitoubi Jordan kungrui ramra klei thimi rapne aiyei leinara wabine,

⁶ heitoubi yane yaiyei borh rapya yunthutrilbi ukning hungkur, heitounei Ane yaya Jordan kungra yui luppikur.

⁷ Heirou John'ne lhangai karsa raple Sadducee rapne aiyei leinara yui lupyernanungei wakar'um loumunarou, Ane yaya loushunkur, “Frullei chanaorap, nari huni nanungei Dunpuei meithukei malungkhanarei kartleinanung shunpirouwo?

⁸ Heirou heinakei lhouya toubine nane naiyei borh'rouwei ukning hungurame toulanungri lhouni mutlakma.

⁹ Heirou nane ‘kaya yenranna patar Abraham leileime’ toubi yunbine, heinaksi Dunpuei malungkhanarei kartleikur manirou toubine malungammak. Keine nanung kyunri: Dunpune thlung rapya khulloubine Abraham'yei yu-cha khoine sheemthutkurkhi manilei!

¹⁰ Rei heiwari heengtrung rapya yrung phane yutatdurnungei marshikbi khouwurla; hei heimak heengtrungrap heiri yutatdurbi meiwaira khinglhakrouwa.”

¹¹ “Nane naiyei ukning hungura toubi munanungei keine naya yuira luppila, heiya keiyei hilla hungrou kyou napawa heine naya lhawai khyingrale meira luppirou. Heitoubi A heiri keiya beimak duine tang thimi; keiri Aiyei khorkhangya uryakhi kallomaklei.

¹² Ane homthainanungei leikhoya Aihutra shinbine leiyura, Ane gehuya ruitlaira theimarkumbi yapmathairou, heirou tsai kyao gehu rapya chapongra shunglhakrou, heitoubi tsai yaomak yui rapri trimkur naimakna meiwaira khinglhakbine hongurou.”

Jesu'ya Yui Klup

¹³ Heirouri Jesu'ne Galilee'rouwei Jerusalem'ra John'yei leinara yui lupyernanung wa'tlungkur.

¹⁴ Heirou John'ne yui luppinimaknei ngamrou asitoubi loukyun, “Keihakyakhi neiya yui lupyerkni, heiya nangne keileinara yui lupyerna'nungei wathuleinu?”

¹⁵ Heiya Jesu'ne anung loumallang, “Asinunghakri heisi hoilakaso, Dunpuei kningri asitoubine hoiyerrou.” Heisi tounarou John'ne yapiwurla.

¹⁶ Heitoubi Jesu'ya yui luppikurle, Ane yuirei katkarthut, heirouri thilak, Anungei Thangmun latpiwurla, heitoubi Dunpuei Lhawaine mathru naksine Aidoura yongchubi Aya waaryerpikur Ane loukmu.

¹⁷ Heirou Thangmun lhangrei hou khatne asitoubi yukpao, “Ari Keiyei kringkna Chanapawa khatme, Aiyei ngamrou Keiri beimakne malung'khrahwura.”