MATTHEW 28 - KHYINGEI PU'TLOU Bible (BSI)

Jesu Ringthutkur

¹ Mathrilna tlainiyei hillouri, haptaei lamkri tlainiyei ningshun kul kayoueinung, Mary Magdalene'le kalhonne Mary khatle lhan yeelthirou toubi wakur.

² Heirouri tallengne chi'knaei shakrung khoine linglang khngaakkur; heirou Dunpuei Thangring khatne Thangmunrei yongchumbi, lhanpurrei thlungpakya khaangmaletbine, heiyei doura ombine louklei.

³ Aiyei shakrungri tliplai nakne alkur, heitoubi aiyei shamb heiwari thurnakne khngou.

⁴ Heirou lhanbom chakngaak raallui rapri chitekkurnei ngamrou khi thimi'nakne leikur.

⁵ Heirouri Thangring heine napuiya rapnung loushun, “Nari chimak, nari manyarhatkur Jesu'ya raphame touri keine mulei.

⁶ Ari bi arou makkura; ngamri Aiyei yunkhounakne Ari ringthutdura. Nane wachangbine Aya phneikhouna biya wathilak.

⁷ Arouri nane khrangne shaallaka, heitoubi Aiyei ruishik rapnung asitoubi hungshunpilak, ‘Ari khirouwei ringthutbi, asinung nai maibongra lamkrine Galilee'ra louchawura; heitoubi nane bi'heirou Aya murillou!’ Keine nanungei kouya yunpikhou nane ningthutlak.”

⁸ Heisi tounarouri yane chi'knale hakraoni thimmurbi, lhanbomya lakkurkhoubi khyangni shaalkur, heitoubi channe hungurbi Aiyei ruishik rapnung pao heiwaya hungshunpikur.

⁹ Heirouri thilak, tallengne Jesu'ne yaya rorilbine . “Nari malungdam hoiyalo!” toubi yanung loushun. Heisi tounarouri yane chanlhakbine Aihora palbine khrumrou waiyouweinung,

¹⁰ “Nari chimak, heinung'tlim nane shaallurbine naiyei teinao rapya Galilee'ra wawalo toubi hungshunpilak, heitoubi yane bi heirou Keiya murillou,” toubi Jesu'ne yanung loukyun.

Lhanbom Kngaak Sipai Rapbei Pao Hungtam

¹¹ Napuiya rapne lamra wayeinungri, lhanbom chakngaak raalluirap thane shaallurbi Krungkulra klei Suipipu upa rapnung thukkur lhou namyerwaya pao hungtamkur.

¹² Heirouri Suipipu upa rapne yama upa rapya murilbi, yane tlou sikrilkur, heitoubi raallui rapnungei tuy chungwane rumlanwurbine,

¹³ yaya shunmatukur, “Nane yunrouri, ‘Masanung kane ipbi leiyeinung, Aiyei ruishik rapne wabi khi'lhung heiwari mulouheila.’

¹⁴ Heitoubi Rome'yei Krungni pao heiya mayeklanungri, ayari kani manelrouwa, heitoubi nayari klah dayermakrou. Heirou nane heiyei ngamrou koukhi lhawai lahmaka.”

¹⁵ Heirouri raallui rapne tuy louheibine, yanungei shunmatupikur heinakrimne yane toukur. Heisitounei ngamrou anakei pao awaya Jehudi rapne angtu ramphane yunrilbine leileihui.

Jesu'ne Aiyei Ruishik Rapnung Mu'kyer

¹⁶ Ruishik napung chiple khatne yaya louchawalo toubi Jesu'ne shunpikhouna lhungdoura louchakur.

¹⁷ Heirouri yane Aya muwurbi, khrumkur, heiyanungkhi ya thaneri khalcha'kna leileihui.

¹⁸ Heirou Jesu'ne yenkarnakbi yanungei shun, “Thangmun-tlaipang namyerrei mantrangri Keinungei piwurkhoula.

¹⁹ Ngam heineri nane chabine heitoubi lim nammaei ruishik sheemlak; heitoubi yaya Pawa Dunpuei heirou Chanapawaei heirou Lhawai Khyingei minra yui luppilak;

²⁰ heitoubi Keine nanungei chay pikur namyerwa heiya hilthungnanungei yanungei shunmatupilak; heirou thilak, Keine naya kheenserrou, tlaipang trimbongyen kalhonpirou.”