MATTHEW 27 - KHYINGEI PU'TLOU Bible (BSI)

Jesu'ya Pilate'yei Bomra Heiurlhak

¹ Heitoubi ningshun manmarou Suipipu upa raple yama uparap namyerwani kartilbi Jesu'ya hatnanungei wairangnei tlou yunrilkur.

² Heirou yane Aya thirrui msuibine, ruilouheibi Rome Krung Pilate'yei biranung urloukhei.

Judas'yei Hikur

³ Thimiya kyor Judas'ne, Jesu'ya hatdurnanungei tlou dawurlame tounei paoya loumayeknarouri ani ukning hungbine, aiyei lapa somthum heiya urbi Suipipu upa raple yama upa rapbei leinara heimallengpikur.

⁴ “Koukhi lalmak thimiya keine hatnungei yorkur awari beimakne klallei lhou hoiyura!” toubi ani yai maibongra wakyun. “Kane heirou kouya touheirou, heiri neitamyei langcha'knaei lhouwa, kari koukhi muphamak!” toubi yane loumallangkur.

⁵ Heirouri, Judasni tuychuirap heiwaya Pukhrumna Cheemwaira khingsundawurkhoubi shaalkur; heitoubi ani chawurbi aitamtom ngakhungra ruifret huklhakbine kanthuihatkur.

⁶ Heirouri Suipipu upa rapne tuychuirap heiwaya khulmarkumbi kyun, “Tuychui ari heeyei man hoiyura, heini anaksi tuyri Pukhrumna Cheemmei tuyphura hanui khouthuri kaiyei Chaylamra marmokna.”

⁷ Yane heisitou yunrilbine yarilkur hillouri, tuychui heiwane phusa thimiyei phaikar khat lobine, ram heiya miram-mithrillei thimi rapne hiyanung phumnanungei lhanyao hoinakur.

⁸ Heitounei ngamrou ram heiri angtu ramphane “Hee manyei phaikar” toubine munaleihui.

⁹ Heisi toubine Thimkhui Jeremiah'ne yunthutkhou tlou rapya chimne hungtlungyerlei. “Israel rapne yanarilbi Aiyei mannungei toubine loukur tuy lapa somthum heiya yane louheila,

¹⁰ heirou yane tuychuirap heiwaya yrengbi phusa thimiyei phaikar khat lokur. Asitoubi Puni Keinung shunmatukurnakne hungthukkura.”

Pilate'ne Jesu'nung Tlou Kngai

¹¹ Jesu'ne Rome Krungei maibongra mayungeinung, “Nangri Jehudi rapbei Krungko?” toubi Anungei kngai. “Neiyei yunthutkur heiwariya,” toubi Jesu'ne loumallangkur.

¹² Heiya Suipipu upa raple yama upa rapne Aidoura mral theibaangbine kyun tlou heirapri Ane koukhatkhi mallangmakur.

¹³ Heitounei ngamrou Pilate'ne Anung kyun, “Neidoura theibaangbi kyun tlourap heiri Nangne mayekmako?”

¹⁴ Heiya Jesu'ne tloulhang khatchakhi mallangmakur heirouri, Krung Pilate'ri beimakne ngakkur.

Jesu'ya Hatnanungei Tlou Darilkur

¹⁵ Ralthutpinei markhul tlainiserrou, Rome Krungni youkna khoine, thimi rapbei buchakur hilthungne phatopra kulchalphopbi klei thimi rapya napung khatri malhetthut.

¹⁶ Kheen heirouri thimi nammane mubi klei Barabbas toubi ung napawa khat phatopra khoubine louklei.

¹⁷ Heirouri thimi rapne kartilbi leinarou, Pilate'ne yanungei tlou ngaibi klou, “Angturi nane keiyari huya malhetthutyernilei? ‘Jesu’ toubikhi ung Barabbas'ya malhetthutserouwo, nimanung ‘Messiah’ toubi ung Jesu'ya malhetthutserou?”

¹⁸ Heirouri Jehudi rapbei lhou'ur laa'ur rapne Jesu'yari thinimaknei ngamrou aihutra heimalhetlhakme touri anikhi loukmu.

¹⁹ Heirou Pilate'ne pichar touna cheemwaira ombi leiyeinung, aiyei nune anungei paokhat heimanthunkur. “Nangne koukhatkhi mral mak napawa heiya hatnanungei koukhi pichar toubom thukmakme. Ngamri napawa heiyei ngamrou masanung keiyei rmongra kalthi klah'ne loumume.”

²⁰ Heirou Suipipu upa raple yama upa rapne thimi rapnung shunbi, Barabbas'ya malhetthutbi, Jesu'yari hatyerlaklo toubi Pilate'nung yunkyer.

²¹ Heiya Pilate'ne thimi rapnung loukngai, “Ya napung-khniyei tlakra keine huya nanungei malhetthutyernilei?” Heirouri “Barabbas'ya malhetthutpilak!” toubi yane loumallangkur.

²² “Heiyanungri keine ‘Messiah’ toubi ung Jesu'yari kousi touserou?” toubi Pilate'ne loungaithu. “Ayari heeng karbakra manyarhatlak!” toubi yane loumallangkur.

²³ Heiya Pilate'ne yanung loungaithu, “Heiyanungri Ane kounaksi klallei lhouya touwurkhoula?” Heirouri ya namtomni ungraobine loukyun, “Ayari manyarbi hatlak!”

²⁴ Heirouri Pilate'ne heiya duine chasundari yamakarou, hei nimanungri thimi rapri chekrouwame toubi munarou, ane yuiding thacha loubine thimi rapbei maibongra aihut mchikkur, heitoubi ani kyun, “Keiri napawa awaei hinarou koukhi mumaklei! Awari na nammaei toukur lhou!” toubi ani paothutkur.

²⁵ Heirouri thimi namyerwani loukyun, “Napawa heiyei hiwurnei lhouthuk namyerwa heiri kaidoura, heirou kaiyei yu-cha rapbei doura daniyasu!”

²⁶ Heisi tounei Pilate'ne Barabbas'ya yanungei malhetthutdurbi; heirou ani Jesu'ya umbine, manyarhatnungei pithutkur.

Raallui Rapni Jesu'ya Laokna

²⁷ Heirouri Pilate'yei raallui rapne Jesu'ya krungei Cheemtang rilwaira urlhakbine, heirou thimi chungne Aya kar'umkur.

²⁸ Heirou yane Aiyei phirul rapya lhukkurbi, phi'mrao khat hupbaangpikur,

²⁹ heitoubi yane thruei lukhup khatkhi sheembi Aiyei lura mkhubangpikur, heitoubi yane Aiyei thyarei hutra shung(chei) khat mrumlanbi, heirou yane Aiyei maibongra khuklu kanthrunchabi Aya laonabine kyun, “Jehudi rapbei Krungri pulchi hoiniyasu!”

³⁰ Heirou yane Aya matil mthukphaangbi, heirou chei khat loubine Aiyei lura umkur.

³¹ Heitoubi yane laonakur hillouri, yane phi'mrao hupbaangpikur heiwaya lhukloubi, heirou Aiyei phirul rapya hanui hupbaangpikur. Heitoubi yane manyarhatnung ruiloukhei.

Jesu'ya Manyarhatkur

³² Heirouri yane heisi wayeinung, Cyrene'rei Simon toubi ung napawa khat rorilkur, heirou raallui rapne aya churmanbine Jesuei heeng karbakya urtrungyerkur.

³³ Heirouri yane Golgotha touri “thimi luthru khingna ram” toubi ung bi heirou wa'tlungkur.

³⁴ Yane bi heirou Jesu'nung tulle heirou tulkha khatle mankonbi pimongkur; heiya Ane loumartamthibi myukchangmakur.

³⁵ Heirou yane Aya manyarhatdurbi, heirou Aiyei phirulrap heiri meirui thirilbine yadikni yerrilkur.

³⁶ Heihillouri yane bi heirou omngaakbi leikhou.

³⁷ Heitoubi Aya manyarna luthakra yane theibaangpinei tloulhang rapya mayethutbine, “Ari Jesu, Jehudi rapbei Krung” toubi yempopkur.

³⁸ Heirou yane Jesule kalhonne mucha thimirap napung-khniyakhi manyarhatkur, khatri Aiyei thya lhangra, heitoubi napung khatyari Aiyei thyoi lhangra manyarhatkur.

³⁹ Heiyei pongra yenkral thimi rapnekhi yaiyei lu khngaakbine, Aya tlou singbine kyun,

⁴⁰ “Nangme, Pukhrumna Cheemya threbi tlaini khyumnirou hanui sabangthurou toubi yunkhouri! Heirou Nangri Dunpuei Chanapawame toulanungri, Neitamya kalpilakma! Heitoubi Crossrei yongchumlakma!”

⁴¹ Heinakrimne Suipipu upa raple Chaylamyei upa rapne Jesu'ya laoknaei tloune kyun,

⁴² “Ane mideiyari kalpikur, heiya Aitamyari kalchangmaklei! Israel rapbei Krung touri A heiri nimako? Ane asinung heengkarbakrei yongchumkur maniyanungri, kani Aya uklumpirou!

⁴³ Ane Dunpuya malungam, heitoubi Ari Dunpuei Chanapawame toubine yunthulei- Lhangaiya heiyanungri, Dunpune yongbi Aya kalpileikoukhi kani thiyase!”

⁴⁴ Heirou Ale manyarhatkur mucha thiminikhi Aya heinakrim yunkur.

Jesu Hikur

⁴⁵ Nunghang tlaikallei kheenrou tlaipang namyerwa heiri lumkhyumbil mehbine leikur.

⁴⁶ Heitoubi yenrawaikur heirouri Jesu'ne hou chouni ungraokhoubi. “Eloi, Eloi, Lama Sabach-thani?” touri “Keiyei Dunpu, Keiyei Dunpu, Keiyari koutounei horkhoukurrawo?”

⁴⁷ Bi heirou pongra mayungbi heiklei thimi rapne mayekthungnarouri yane, “Ari Elijahya ungphaleime!” toubi kyun.

⁴⁸ Heirouri thimi napung khatne channurbi, phi'mtum khat loubine, heirou ane phi'mtum heiwaya tulkha lupdokbine, heitoubi shungkrokra yeetbine, heitoubi Aiyei murra katmandobi mongyernanung waiyoukur.

⁴⁹ Heiya napung khatne kyun, “Tourimakhuilo, Elijah'ne yongbi Aya kalpileikoukhi kane thiyase!”

⁵⁰ Heirou Jesu'ne hanuikhi hou choune ungraokhoubi luinei nil sokhoubi Aiyei lhawai tatkur.

⁵¹ Heisi tounarouri Pukhrumna Cheemwairei yarkhalna phi'yeng heiwari dourei waiyoubi holi yongphane tlaitampokra khintam thukne cheetkur. Heitoubi linglangkhi khngaakurbi, thlung rapkhi loulhaangkur,

⁵² heirouri lhan rapkhi laatkur, heirou hikur Dunpuei khying thimi rapkhi chungwane katringthutkur.

⁵³ Yane lhanrei kathukkur heirouri, heirou Jesu'ne ringthutkur hillouri yane lhanya lakurkhoubi khyingei krungkulla polhakbine thimi dei rapnungkhi muyerkur.

⁵⁴ Heirouri raallui phringkile aiyei raallui rapne bi heirou Jesuei hikurya chakngaakbi thithungeinungri yanekhi linglang khngaakurbi bi heitamrou thukkur lhourap nammaya munarouri, yane chiwurbi kanchunni kyun, “Awari tanghakne Dunpuei Chanapawalei!”

⁵⁵ Bi heirou napuiya rapkhi chungwane heiklei, yane Jesu'ya Galilee'rouwei heichanthungbine Anungei watlhou trungpikur, heitoubi yane Aihilla heichanthungbi, Aiyei hikurya thithungkur.

⁵⁶ Yaihangra Mary Magdalene, James'le Josephbei pui Mary, heitoubi Zebedee'yei nukhi kyao.

Jesu'ya Khi'krui

⁵⁷ Heiniyei yenrawaikur heirouri, Arimathea ramrei laldun napawa, aiyei min Joseph toubi ung khatkhi bi heirou wa'tlungkur; heirou akhi Jesuei ruishik khat hoikhou.

⁵⁸ Ane Pilatedei maibongra wachangbine Jesuei hikur sharungya wabuchakur. Heirou Pilate'nekhi Jesuei khi'lhung heiwaya Josephnung piwurnanungei chay pikur.

⁵⁹ Heirouri Joseph'ne khi'lhung heiwaya urlouheibi, phaikhring phi-khngou khatne lhomphopbi,

⁶⁰ heitoubi ani thlungshimra utkur lhanran khatra lhakbine phumkur. Heirouri ani lhanpurra thlungpak khat maletbangurbi pingurkhoubi shaalkur.

⁶¹ Heirou Mary Magdalene heirou Mary khatpile pulne lhan maibongra mairone omngaakbine leikhou.

Lhanbom Kngaak Raalluirap

⁶² Heithangei Mathrilna tlainirou, Suipipu upa raple Lhangai karsa thimi rapne pulne Pilatedei bira wabine murilkur,

⁶³ heirou yane kyun, “Krungwa, mandalkhou thimi heiwane hibongnung Ane kanungei, ‘Keine khyumniyei hillou hanui ringthurou,’ toubi yunkhou heiri kane ningthutlei,

⁶⁴ Heineri kanungei chay pilak, heitoubi khyumni tlungbongyen lhan heiwaya kani lhangaine omngaakrou, heisi toulanungri Aiyei ruishik rapne khi'lhung heiwaya mulouheibi, ‘Hiwurnarei hanui katringurame’ toubine thimi rapnung yuchangmakrou. Heisi nimanungri hillei yunrou kyou mandallei tlou heiwane halleiya duine thuithirou.”

⁶⁵ Heisi tounei ngamrou Pilate'ne yanungei shunkur, “Chakngaaknanung raallui urlaka, heitoubi nane maneyei'mkhei lhandoura hutlha sheembine karbilne khoulaka.”

⁶⁶ Heitounei ngamrou yane raallui urlouheibine lhandoura hutlha lhangaidui sheembi thlungpak maletbaangbine, heiyei doura seman teiphangbi, heirou doura raallui rapya ngaakyerkur.