MATTHEW 21 - KHYINGEI PU'TLOU Bible (BSI)

Jesu'ne Jerusalem'ra Aiyei Mantrangle Ho'trumkhou

¹ Jesu'ne Aiyei ruishik raple pulne Jerusalem'ra wayeinung, yane Olive lhungdourei Bethphage bira wa'tlungkur. Heitoubi bi'heirou Jesu'ne Aiyei ruishik napung-khniya shunmatubi maibongra lamkrine louyilkur.

² “Nane maibongrei louklei yultlaira louchawa, heitoubi gadha khat aiyei shunle kalhoni msuikhoubi louklei nane tallengne wamurou. Heitoubi yai rui msui heiwaya sutbine keileinara yentangheilak.

³ Heirou hukounak khatne loungaithung leiyanungri, anungei asitoubi yunpilaka, ‘Kaiyei Upawane gadha aya Aiyei leinara yentangheilaklo toubi shunlei,’ heirou Ane yaya hanui heimalhetpithurou.”

⁴ Tlou awari Thimkhuiyei shunthutkhouya chimne hungtlungyerlei.

⁵ “Zionyei Krungkulnung shunpilak, Thilaklo, naiyei Krung heiri nanungei hunglei! Ari ukning khnim, heirou gadha doura yentungheilei heitoubi gadhari shun'khui, mandichahui.”

⁶ Heirouri ruishik rapne wabi yanung Jesuei shunmatupikur heinakrim yane chakur,

⁷ heirouri yane gadha heiri shunle kalhonne Anungei yentangheikur, heitoubi gadha doura yaiyei phi'up rapya hupbaangbine, heitoubi heiyei doura Jesu'ne tungbangkur.

⁸ Heirou thimi rapne yayaiyei phi'up rapya lamtlaira loumyerkur, heirou thimi deineri kangoina deekloubine lamtlaira loumyerchekkur.

⁹ Heirouri thimi rapne Jesuei maibongrakhi louchabi, heirou Aiyei hillakhi chanthungbi, yane asitoubi paokur, “David'yei Chanapawaya Hosanna! Dunpuei minra hungbi klei A heiri likarsui lhangai hoiniyasu! Yerrouwei Choudui Dunpuei minra Hosanna!”

¹⁰ Heirouri Jesu'ne Jerusalem'ra wachangeinung, Krungkul heiri karyoune ungraochabi paonei houni thimmura. Heirouri thimi rapne kngai, “Thimi heiwari huwo?”

¹¹ “Napawa ari Galilee ramrei Nazareth yultlairei Thimkhui Jesume,” toubine thimi rapne loumallangkur.

Jesu'ne Pukhrumna Cheem Marthingkur

¹² Jesu'ne Pukhrumna Cheemra wachangbine, bi heirou putchei wa'klo thimi rapyakhi heirou loukyor thimi rapyakhi Ane wahulthutkur. Heirou Ane tuychui kartleng thimi rapbei omna raple heirou mathru yorbi klei thimi rapbei omna rapkhi namyerwa khingmatraikur,

¹³ heirou Ane yanungei kyun, “Dunpuei yunkhou rapya mayekhoubi Khyingei Lailikra asitoubi kyao, ‘Keiyei Pukhrumna Cheem awari Dunpunung shunchana cheem toubi ungrou.’ Heiya nane bi awaya mucha thimi rapbei yulna rabu hoiyerwurla!”

¹⁴ Mitdeo heirou hodeek thimi rapkhi cheem arou wachangbine Dunpunung khrumchabi, heirou yaiyei knakhi damkur hoirou.

¹⁵ Heirouri thimi raple, douwa rapne Pukhrumna Cheemwaira paobi, “David'yei Chanapawaya Hosanna!” toubi ungraochani louklei heiwaya munarouri, Suipipu raple, Chaylamyei upa rapri kalthi malungkhakur.

¹⁶ Heirou yane Jesu'nung kngai, “Yai ungraochabi paokur heiri kouwo, Nangri mayekleiko?” “Moi, keiri mayeklei,” Jesu'ne yanung loumallangkur. “Nane Khyingei Lailikya tekchakhi pathimako? ‘Nane douwa rapya heirou naoshun-naopar rapya lhangaine marnopibi Dunpuya chouni mathangyerla.’ ”

¹⁷ Heirouri Jesu'ne yaya lakurkhoubi, Bethany'ranung wathukkur, heitoubi bi heirou Ane masakhat chakkurkhou.

Jesu'ne Khyudhei Trungkhatya Manchokur

¹⁸ Nithangei ningshunrou Ane Krungkulla hanui yenkallengeinung, lamrakra msulkur.

¹⁹ Heitounei ngamrou Ane lampalla khyudhei trung khat munarou, Ane heiyei pongra yuchangbi thinarouri, heengna nimakne heiri koukhatkhi heimakne louklei. Heisi tounarouri Ane khyudhei-trung heiwaya manchobi kyun, “Nangri kouniroukhi hei heimakneyasu!” Heisitoubi khyudhei trung heiwari yentaarbi hikur.

²⁰ Ruishik rapne thukkur heiwaya munarouri yane ngakurbi, “Kousi tounei khyudhei trung heiwari heinakei khrangne yentaarkurawo?” toubi yane kngai.

²¹ Heirou Jesu'ne loumallangkur, “Keine nanungei chimne yunlei touri nane koukhatkhi khalcha'kna makne uklummanungri, Keine khyudhei trung arou toukur heinakrimne nanekhi touchangrou. Heitoubi athil nimakne, heirou nane lhungdourap heiyakhi ‘naitam phurbi samadru rilwaira khinglhakurlak’ toubi yunlanungkhi, yane heisi louchanthungrou.

²² Heirou nane uklum kleini, Dunpunung shunlanungri, shunchakur'mkhei heisi pharou.”

Jesuei Mane-Mantrang Ngamrou Tlou Kngai

²³ Jesu'ne Pukhrumna Cheemra yenkallengbi; heirou Ane heisi shunmatubi leiyeinung, Suipipu raple heirou lhou'ur upa rapne Jesuei leinara wabine kngai, “Nangne kounaksi toumani thang leinei lhou heiya toukurro? Heitoubi huni Neiya heinak thangya pibi toukurro?”

²⁴ Heirou Jesu'ne yanung loumallangkur, “Keinekhi nanung tlou ngaithueise, nane Keinung loumallangpilak, heiyanungri Keinekhi Keiyei toubi klei namyerwa heiya nanungei yunpirou.

²⁵ John'ne kourei mantrangya loubine yui lupnei lhouya toubi klei, touri aiyei heiwari Dunpurei klouweiyo, nimanung thimi raprei klou?” Heirou yane yaitam khatle-khat tlou rkalcharil waiyoukur, “Kane kousitoubi mallangserou? Aiyei heiwari Dunpurei klou toubi mallanglanungkhi, heirou Ane, ‘heiyanungri nane koutounei John'ya uklumpimak?’ toubi kanung louyunthurou leilei.

²⁶ Heirou kani hanui asitoubi, ‘aiyei heiwari thimi raprei klou’ toulanungkhi, heirou thimi rapne kaidoura kouya yunthuleiyo, kani yayakhi chi'kna, ngamri yane Johnri Thimkhui khatme toubi munalei.”

²⁷ Heisi tounei ngamrou yane loumallang, “Kari mumakura.”

Chanapawa Napung-khniyei Ngamrou Yailim Tlou

²⁸ “Asinung nane koutoubi ningchalei? touri, Bongnung napawa napung khatdei chanapawa napung-khni leikhou. Ane chanapawa upawanung wabi shun. ‘Keicha samranwa, nangne wabine yekulra lhou bei churlak.’

²⁹ Heirou ani loumallang, ‘Pawa, keiri chamakrou,’ heiya hillouri aiyei ukning hollurbi ani yekulra wakur.

³⁰ Heirouri pawane chanapawa khatpanung wabi heinakrimne kyun, ‘Moi pawa, kei charou,’ toubi loumallangkur, heiya ani yekulra chamakne dongkur.

³¹ Arouri yakhunta teinaowei tlakrouei hune yai pawaei kningya toulei?” “Chanapawa upawari,” toubi yane loukyun.

³² Heirouri Jesu'ne yanung kyun, “Keine nanung chimne yunpilei. Dunpuei Krungbomrari khulrui thou thimirap heirou sharung kyor napuiya rapne nai maibongra yane loulamrirou. Ngamri Yuiluppi John'ne nanung chim lamya ruimutpirou kyong, heiya nane aiyei tlou rapya malungampimak; heinung'tlimri ruithou thimi raple chorit naimak napuiya rapne aiyei kyunya malungamne loulhakur. Nane heirapya munaroukhi naiyei ukning holkur toukhi maklei, heirou aiyei kyunya nane malungampikhi maklei.

Darkha Yekul Huithimi Rapbei Ngamrou Yailim Tlou

³³ “Yailim tlou khatkhi louninglak,” toubi Jesu'ne kyun, “Bongnung chaan khatrou darkha yekulrei pu napawa khat leikhou. Ane yekul heiya karhilni halpal kuiphopbine khou, heitoubi darkha heiyui khrei-shumna thleipurkhi utmarshikbi khou, heirou huinanung waadangkhi sabaangbine khou. Heirouri loupu heine thimi rapnung yekul heiwaya bei louhuipilaklo toubi watyilkhoubi, heitoubi ani miramra chakur.

³⁴ Yekullei darkha hei rapya markumnei kheen hungtlungkur heirouri, ane aiyei shok rapya yekul huithimi raprei aiyei sirukya markumnanungei heiyilkur.

³⁵ Heirouri yekul huithimi rapne aiyei shok rapya loumanwurbi, napung khatyari umkur, heirou napung khatyari hatdurpi, heitoubi napung khatyari thlungne nanghatkur.

³⁶ Heirou hanuikhi yekul pu heiwane aiyei shok deikhi heiyilthu, heirou halleiya duine yekul hui thimi rapne yaya loumanwurbi kalthi marhotpikur.

³⁷ Heirouri hilluirou ane ‘Keiyei Chanapawa heiyari yane rikrai-chini loutoupirou’ toubi ningchabi yaileinara heiyilkur.

³⁸ Heiya yekul hui thimi rapne Puwei Chanapawaya loumunarouri, yaitam louyunkril, ‘Ari yekul Puwei Chanapawalei, wa'tlungriyasu, kani Ayakhi hatdurase, heisi toulanungri kani Puei siruk heiwaya phathungrou!’

³⁹ Heitounei ngamrou yane Ayakhi loumanwurbi, yekul kumra taangthutbi, heitoubi umhatkur.”

⁴⁰ “Arouri, yekulpu heini wayeinung heinaksi yekul hui thimi rapya kousi toupiroulei?” toubi Jesu'ne kngai.

⁴¹ “Ane heinakei lhangaimak thimi rapyari shuimakne hatdurou'kleiya, heisi toubine yekul heiwari thimi deinungei piwurbi heirou yane Aiyei siruk heiri kum tlakchani phayerrou,” toubi yane loumallang.

⁴² Jesu'ne yanung kyun, “Khyingei Lailikra asitoubi kyunri nane pathimako? Cheemsa thimini karsukmakme toubi horthutkur thlung heiwane hillouri nam'rouwei karsukdui shutlai hoiyura. Ari Dunpuei tlou; Keiyei mitni thinarou kounakei ngakna tloukhat hoilei!”

⁴³ “Ngam heini Keine kyun,” Jesu'ne yunmaryomthu, “Dunpuei Krungramri anakrim nai hutrouwei louthutdurbi, heiyei trunwaiya lhangaidui trunthutrou thiminung pirou.”

⁴⁴ Hukounak khatne thlung heiyei doura kanelbaanganungri a heiri harhar chaallurou, heirou thlung heiwane hukounak khatdei doura dabaanglanungri, thlung heini aya rahui thukne marchipchaallurou.

⁴⁵ Suipipu raple heirou Lhangai karsa thimi rapne Jesuei kyun yailim tlou heirapya mayeknarouri, yaingamrou kyunme touri yane louningmukur,

⁴⁶ heitounei yane Aya mannanungei wairaangkur. Heiya yane thimi rapyari beimakne chikur, ngamri thimi rapne Jesu'yari Thimkhui khatme toubine ningchakhou.