MATTHEW 18 - KHYINGEI PU'TLOU Bible (BSI)

Huni Duiyei Tang Thimi Hoilei?

¹ Kheen heirou ruishik rapne Jesuei leinara wachangbi kngai, “Thangmunyei Krungramrari huni duiyei tang thimi hoirouwo?”

² Heirou Jesu'ne douwacha khatya ungloubine, yai maibongra mayungyerbi,

³ Ane kyun, “Keine nanungei tanghakne yunlei, nane nai ukning hollurbine, naocha anakrim hoimakanungri, nane kouniroukhi Thangmunyei Krungramra changrouri manemakrou.

⁴ Thangmunyei Krungramrari thimi napung khatne aitamya mandiyerbi, douwayei ukningnak hoiyanungri, a heiri nam'rouwei duine tang thimi hoirou.

⁵ Heitoubi hu khatne thimi napung khatya Keiminra douwachaya ropinakne louropilanungri, a heiri Keiya loulhakpi hoirou.”

Papra Dananung Malhim

⁶ Heitoubi hukounak khatne Keiya uklum thimi khatya, aiyei uklum heiwaya maangyernanungei marhotpilanungri, a heiri aiyei ngakra chakhri-thlungtum tang khatya mankhaibine, yui-yukna samadru rilla chunlhakurne dui lhangai.

⁷ Thimi rapbei ukningya mangnanungei marhotbi klei tlaipang thimi rapnungri kounakei klah hoirou! Heinak lhouri thukkaryomrou- heiya mideiya malhimnara da'kyer thimi heinungeiri kounakei klah-mrim hoiwurlei!

⁸ Heitoubi kounakpi neiyei hutni, nimanung neiyei honi neiya malhimnara dayerbi neiyei uklumya maangyerrou leiyanungri, heirou nangne neihut, nimanung neiho heiwaya dintatdurbi khingurlak. Ngamri neiyei hut-ho pu tlungni trim naimak meikhurra changkurnung'tlimri, neihut, nimanung neiho paangkhat tlungmakne khringei bomra changkurne duine lhangai.

⁹ Heirou neiyei mitlungni neiya malhimnara dayerbi neiyei uklumya maangyerlanungri, heirou neiyei mitlung heiya kholthutdurbi tlatnara khingurlak! Neinungri mitlung paang-tlungne meikhurra khinglhakbi hikurnung'tlimri, neiyei mitlung paang-tlungmakne khringei bomra changkurne dui lhangai.

Mangkur Yao khatdei Ngamyei Yailim Tlou

¹⁰ “Thilak, touri nane anakei mandicha rapya thi'msitpimak. Keine nanungei chimne yunlei, yaiyei Thangring rapne Thangmunra Keiyei Pawaei bomra karyomni yukthibine leilei.

¹¹ Ngamri Thimiyei Chanapawari maangkur thimi rapya kalpinanungei kyong.

¹² Nai kningri, napawa napung khatne aiyei yao macha-khat dunnarou khatchari kanwaiyanungri ane koutoubi leirou? Ane yao dei somkole-takoya ramhangra lakkurkhoubi, heirou ane kanwaikur yaoshun heichaya rapharou chakur.

¹³ Heitoubi ani kanwaikur yaoshun heichaya raphamulanungri, Keine arou nanungei chimne yunlei touri, kanwaimakei klei yao somkole-tako heirapnung'tlimri, maangkur heichaya raphamunarou duine aiyei malung khrahrou.

¹⁴ Heinakrimne naiyei Thangmunrei Pawanekhi heinak mandicha khatyakhi maangyernimaklei.”

Borhyei Lhou Toukur Teinao Khat

¹⁵ Neiyei teinao khatne neiya karhane borhrei lhou toulanungri, nangne anung wabine, heirou aiyei klal heiwaya mutpilak. Heirou ane neiyei kyunya ninglhaklanungri, nangne aya manila.

¹⁶ Heiya ane neiyei kyunya ninglhakmakrou leiyanungri, nangle kalhonne thimi napung-khat, nimanung napung-khni ruila toubine aiyei leinara wachanga, heisi toulanungri ‘tloulhang kantang heiwari thimi napung khni-khyummei khnara myekthungla toubi heirou yane kandangni tlou mayungpirou,’ heisi toulanungri Khying Pu'tlouei kyunnakne hoirou.

¹⁷ Heirou kounakpi ane yai kyunyakhi ninglhakmakanungri, heirou tloulhang namyerwa heiri Khulbungei maibongra yunthutlaka, heirouri ane Khulbungei kyunkhi hanui ninglhakmakanungri, kluirouri aya naihangra kulchalchokmak Gentile nakne, nimanung ruithou thimi nakne hoiyerlaka.

Kya Heirou Yamak

¹⁸ “Keine na nammanung chimne yunlei. Nane tlaipangra yapimak heiwari Thangmunrakhi yapimakrou, heitoubi nane tlaipangra yapikur heiwari Thangmunrakhi yapirou.

¹⁹ Heirou Keine nanung duinekhi yunpilei. Kounak na napung-khnine tlaipangra yarilbi buchalanungri, heinakrimne Thangmunra klei Keiyei Pawanekhi heisibil hoiyerpirou.

²⁰ Ngamri Keiminra napung-khni, nimanung napung khyumcha kartilbi leinabi heirou Keine yale kalhonpirou.”

Miyei Klal Kukpiheimak Shok Khatdei Ngamrou Yailim Tlou

²¹ Heirouri Peter'ne Jesu'nung wabine kngai, “Upawa, kounakpi keiyei teinaone keiya karhane borhyei lhouya toulanungri, heirou keine aya kounakbui kukpiserrou? Enibuirek kukpiserrouko?”

²² Heirou Jesu'ne loumallang, “Keiyei kyunri heinimak, enibuirekcha kukpilak tounei nimak, heiya enibuiyei-eni heiri somret'bilkhi kukpilak,

²³ ngamri Thangmunyei Krungramri anakrimlei. ‘Bongnung ram khatrou Krung khat leikhou. Ane nungkhatnui aiyei shok rapne anungei tuy tulkur heirapya tekthinanungei marshikkur.

²⁴ Heirou ane tuymshing tekyouweinung napawa napung khatne aiyei tuy talent lishingchip duine tulkur napawa khatya heiruilhakur.

²⁵ Heirouri shok heine heinakchungei tulkur tuy heiwaya singnanungei tuyri romakura, heisi tounarouri Krung heiwane aiyei shok heiwaya aiyei klei putchei nammale, aiyei sharungkhi, heitoubi aiyei nu-cha rapkhi kyaone yormathaibi aiyei laltul heiwaya singlaklo toubi thoukur.’

²⁶ Heisi tounarouri shok heiwane Krungei maibongra khuklu kanthrunchabine buchakur, ‘Keiyatomri bei kringpilo, keine neiyei tuy tulkur namyerwa heiya singmthainanungei tourouwa!’

²⁷ Heirouri Krung heiwane shok heiya kringpiwurbi, heirou aiyei tuytul heiwari namyer kukpiwurla, heirou aya cheemra malhetpikur.

²⁸ Heirou napawa heini shallurbi, anungei tuy thacha tulbi klei aiyei palui shok khatya rorilkur, heirouri napawa heiyei khrukra khrakloubine aiyei tuytul heiwaya ‘pilakalo’ toubi thoukur!

²⁹ Heitounei aiyei shokpalui heini hopongra kanelhakbine anung khrumchakur, ‘Keiyatomri bei kringpilo, keine neiyei tuy tulkur heiwaya singpirouwa!’

³⁰ Heiya, kukpinung'tlimri, ane yapimakurbi aiyei tuy tulkur heiwaya singcheibongyen phatopra manlhakbine khoukur.

³¹ Heirou dei shok rapne thukkur lhou rapya mukur heirouri yari kalthi ngakurbi, heirou yane Krungnung wabine paotamkur.

³² Heitounei Krungni shok heiwaya rilwaira unglhakbine kyun, ‘Nangri koukhatkhi karsukmak shok khatme! Keine neiyei buchanei ngamrou, keine kringpiwurbi, nangne keinungei tulkur tuy namyerwa heiyakhi kukpiwurla.

³³ Heinakrimne nangnekhi neiyei shok-palui heiyakhi kringpibom thukmaka!’

³⁴ Heini Krung heiwari kalthi malungkhawurbi, heirou ani shok heiwaya aiyei tulkur tuy namyerwa heiya singchibongyen kulrilra manphopkur.”

³⁵ Heirou Jesu'ne asitoubi yunbi dongkur, “Anakrimne Thangmunrei Keiyei Pawane, thimi napung khatsolya neineiyei malungra neiyei teinao rapya kukpimakanungri, Anekhi heinakrimne marhotpirou.”