MATTHEW 17 - KHYINGEI PU'TLOU Bible (BSI)

Jesuei Shakrung thang Holkur

¹ Heirou tlaini thrukniyei hillouri Jesu'ne Peterle aiyei teinaorap James heirou John yakhyumya ruilouheibine yaitamtom lhung chounara kakur.

² Heirouri yane heisi thibi leiyeinung, Jesuei shakrung thang holkur, heitoubi Aiyei mairungri kinniyei kwaarnakne alkur, heitoubi Aiyei shambkhi khngoune kar'alkur.

³ Heirouri ruishik napung khyum heini Moses'le Elijah yakhuntane Jesule tlou kallangrilbi klei heiwaya mukur.

⁴ Heisi tounarouri Peter'ne kanthoubi Jesu'nung kyun, “Upawa, kani bi atamrou klei awari beimakne likarsui lhangailei; Nangne yapiyanungri, keine bi atamrou Pucheem khyumtam sabangeise, heitoubi khatne Neinungei, khatne Moses'nung, heirou khatne Elijah'nung hoiyerrase.”

⁵ Heirouri ani heisi yunbi leiyeinung, khngou rameini yaidoura yuk-albine, heirou ramei dourei hou khatne yukpaobi kyun, “Ari Keiyei kringkna Chanapawame, Aidoura Keine beimakne malung khrahwura- Aiyei kyunya nane ninglhakpilak.”

⁶ Heitoubi ruishik rapne hou heiwaya loumayeknarouri, yane beimakne chiwurbi, thleira kanelhakbine leikur.

⁷ Heisi tounarouri Jesu'ne yaipongra hungbine yaya hungthirbi, “Kanthouwalo, koukhi chimaklo,” toubi shunkur.

⁸ Heisi tounarouri yane loukanthoubi thiphanarou bi heitamrou Jesu'yatom nimakne dei hukhatyakhi mumakkur.

⁹ Heirouri yane lhungdou'rouwei yongchumyeinung, Jesu'ne yanung kyun, “Nanungei kar'allei muyerkur heiwari Thimiyei Chanapawane hiwurnarei katringthutbongyen nane thimi dei hu khatnungkhi yunthutpimakno.”

¹⁰ Heitounei ngamrou ruishik rapne Jesu'nung kngai, “Chaylamyei upa rapne ‘Elijah'ne yongrirou’ toubi kyunri koutounei?”

¹¹ Heirou Jesu'ne loumallang, “Moi, heiri chim, Elijah'ne yongrirou, heitoubi ani lhou namyerwaya loumarshikyerrou.

¹² Heiya Keine nanungei chimne yunpilei touri, Elijah'ri lamkrine yongurkhoula, heiya thimi rapne aya loumu'manrepimak, heinung'tlimri yane aya yai kningei hilthungne marhotpikur. Heinakrimne yane Thimiyei Chanapawa heiyakhi heisi thuithini marhotpithurou.”

¹³ Heisi tounarouri ruishik rapne phab dakur touri, Ane yanungei Yuiluppi John'yei ngamya kyun.

Jesu'ne Lhimpop Napawa douwa Khatya Kna Raikyer

¹⁴ Heirou yane thimichung kartilna bira yenkallengei'nung, napawa khatne Jesuei leinara wachangbine Aiyei pongra khuklu kanthrunchabi,

¹⁵ heitoubi ane shunchakur, “Upawa, keiyei chanapawaya bei kringpilo, ngamri, a heiri lhim popburnarou beimak mrimni leiyurame, heirou meiwairakhi, heirou yuirakhi karyomni kanellhakurla.

¹⁶ Keine aya Neiyei ruishik rapbei birakhi urlhakthila, heiya yaneri aya raiyerkur manemaklei.”

¹⁷ Heitounei Jesu'ne loukyun, “Nari uklum mak thimi heirou borh thimirap hoikurako? Keine nale pulne kalhonbi kounak tlani leirilo touneiyo? Napawa douwa heiri Keinung heiruilhaklak.”

¹⁸ Heirouri Jesu'ne napawa douwayei rillei klei lhim heiwaya chay pibi shunkur-heirouri lhim heine douwa heirouwei wathukkur, heirouri tallengne aiyei kna heiwari lhangaikur.

¹⁹ Heisi tounarou ruishik rapne munne wabi Jesu'nung kngai, “Kane heinakei lhim rapya hulthutkur manemak awaya koungammeiyo?”

²⁰ “Heiyei ngamri, naiyei uklum mandineime,” toubi Jesu'ne yanung loumallangkur. “Keine nanung tanghakne yunlei touri, naiyei uklum heini anchep lungnak tangchani leiyanungri, heirou nane thlungtang khatyakhi, ‘Nangne neitam phurwurbi bi arouwei chutduralo!’ toubi yunnaroukhi aitam heisi louchutrou. Heitoubi nane manemakrou lhou rapyakhi toumanerou.

²¹ Lhou awari cha'kmai ngeibi heirou shunchabine hoikyer nimakne, dei kou khatnekhi hoikyer manemakrou!”

Jesu'ne Hanuikhi Aiyei Hirou Younei Ngamrou Yunthutkhou

²² Heirouri ruishikrap namyerwani Galilee'ra hungkartilyeinung Jesu'ne yanung kyun, “Arouri Thimiyei Chanapawari miyei hutra pilhakrou waiyouwura,

²³ heirouri yane Aya hatrou; heitoubi khyumniyei hillou hanui ringthutthurou.” Heisi tounarouri ruishik rapri beimakne lhawai lahkur.

Pukhrumna Cheemra Ruika

²⁴ Jesu'ne Aiyei ruishik raple Caperna-um'ra hungeinung, bi heirou Pukhrumna Cheemmei ruithou thimi rapne Peter'nung wabine kngai, “Naiyei Upawari Pukhrumna Cheemmei rui pilako?”

²⁵ “Moi, pimathaiwurla,” Peter'ne loumallangkur. Heirouri Peter'ne cheemwaira hungchangeinung Jesu'ne loukngai, “Simon, nangri kou yunkni leilei? Hune tlaipangei Krungnung yaiyei khulrui pibom thuklei? Aiyei Krungkullei thimi rapne anungei khulrui pibom thuklei? Nimanungri miram-mithrillei thimi rapne pilei?”

²⁶ “Miram-mithrillei thimini pirou,” Peter'ne loumallangkur. Heirou Jesu'ne kyun, “Heiyanungri aiyei Krungkullei yuwa-chawa rapri khulrui pimakne kukpirou daleiko?

²⁷ Heiyanungri kari heinakne hoiyernimaklei, yayari kani marhotnimaklei. Heini asinung nane Samadrura wabi khuilhang watanglak. Heitoubi khuilhang heirouei louchikri thanga heiya tangthutlak, heitoubine thanga heiyei takara thilanungri tuychui khat louyaorou, tuychui heichani nanungle Keinung khulrui pinanungei rorou. Heini nane tuychui heichaya loubine yanung kaiyei rui pilaka.”