MATTHEW 14 - KHYINGEI PU'TLOU Bible (BSI)

Yuiluppi John Hikur

¹ Kheen heirouri Galilee'yei Krung Herod'ne Jesuei ngamrou mayekkur.

² Heisi tounei ngamrou ani aiyei lhou'urpu rapnung kyun, “A heiri yuiluppi John'hakme, ari hiwurnarei ringthutdurnei ngamrou, thimi deine touchangmak lhouya toumaninei mantrangkhi anung klei.”

³ Heirouri Herod'ne lamkrine John'ya mannanungei chay pikur, heitoubi aya manlhakurbi thirruini motphopbi kulrilla khoukur. Ane heisi touwurnei ngamri, ainaowa Philipbei nu Herodiasyei ngammei.

⁴ Ngamri halnung Yuiluppi John'ne Herodya, “Nangne neinaowi Herodiasya neiyei nunungei klouri chimmakrou!” toubi shunwurkhou klei.

⁵ Heisi tounei ngamrou Herod'ne aya hatknini klei, heiyanungkhi ani Jehudia rapya chinei ngamrou hatkuri manikhoumak, ngamri yane John'khi Thimkhui khatme toubine ningcharilkhou.

⁶ Heirouri Herod'ne aya pukna tlainiyei Yama-krung rapbei phalphei marngeina heirou aiyei paluirap namyerya markhulbine, heitoubi ya nammaei maibongrou Herodiasyei chanangaka heiwiya nuiyernarouri, heirou ani Yama-krungrap namyerya pilyerkur,

⁷ heirou ani yai maibongra nangaka heiwinung tlou kantombine kyun, “Keicha nangaka, nangne keinungei kouya bu'kni bulaka, arou keine yulmakne neiyei buchakur heiwaya pirou!”

⁸ Heirouri aiyei puiwini anungei shunmatupikur heiwaya ani bukur. “Keinung-Yuiluppi John'yei luya dinbine leipangra lhakbine asinung malanpilak!”

⁹ Heisi tounarouri Krung heiwari lhawai lahwura, heisiya hoiyanungkhi ani aiyei palui rapbei maibongra tlou kantombine yunlhakkurkhounei ngamrou,

¹⁰ ani chay pibine John'yei luya kulrouwei wadinnanungei watyilkur.

¹¹ Heirouri yane lu heiwaya wadinbine leipangra lhakbine nangaka heiwinung yenpikur, heitoubi ane lu heiwaya aiyei puiwinung loumalanpikur.

¹² Heirou John'yei ruishik rapne wabi aiyei khilhung heiwaya urloukhei, heitoubi yane phumkur; heitoubi yane Jesu'nung pao washunpikur.

Jesu'ne Thimi Lishing Phangaya Pichakur

¹³ Jesu'ne John'yei ngamrou pao loumayekbi, heirou Ane bi heiwaya lakurkhoubine mali tungloubi thimi karkulna bi khatra Aitamtomcha waleikur. Thimi rapne heiwaya mayekkurnarou ai'aiyei cheem lakurkhoubine yane holamra chabine Jesuei hilla heichanthungkur.

¹⁴ Heirou Jesu'ne mali'rouwei wathuknarou, Ane thimi chungya munarouri, Aiyei malungra thimi rapya kringpini thimkur, heirou Ane kna thimi rapyakhi raiyerkur.

¹⁵ Tlaini heiyei rawairouri Aiyei ruishik rapne Anung wabine kngai, “Angturi beimakne yentheengura, heirou ram akhi thimi karkulna bikhi khoi, heineri thimi rapya yultlai-yultlaira yaiyaiyei chanung-mainung lonungei malhetlakalo.”

¹⁶ “Ya rapri shalbom thukmakrou, heini yaiyei chanung-mainungri nane marshikbine bei pichalakalo!” toubi Jesu'ne yanungei loushun.

¹⁷ “Asinungri kanungei kleiri mumtol tum phangale thanga khintamchangeiya!” toubi yane loumallangkur.

¹⁸ “Heiyanungri mumtol'le thangarap heiri ara Keinungei yenpilak,” toubi Jesu'ne shun.

¹⁹ Heirouri Ane thimi rapya tingtou doura touomyerbi, heirou Ane mumtol tum phangale thanga khintam heiya loubi, nungthou lhangra mangalbine, heitoubi Ane Dunpuya mathangkur. Heirouri Ane mumtolle thanga rapya threlchaalbine, Aiyei ruishik rapnung malanpikur, heirou Aiyei ruishik rapne thimi rapnung mumtol'le thanga harya yerpikur.

²⁰ Heirouri thimi napung kantangne ai'aiyei kropilni shailoukur. Heitoubi heihillouri ruishik rapne yai shai'maleirap heiwaya lukshangphai chiple-khni bilbil thimni markumthungkur.

²¹ Napuiya-douwa heirou naohun-naopar sherchokmakne bi'heirou kyaori thimi lishing phangabil tlung.

Jesu'ne Yuidoura Honi Karwaicha

²² Heirou Jesu'ne Aiyei ruishik rapya malirilla wachangyerbi, Samadru khatlhang seralla loumalhetkur, heitoubi Ane thimi rapyakhi hilchutkur.

²³ Heitoubi thimi rapya hilchutkur hillouri, Ane lhungdoura Aitamtom shuncharou kakur. Heirou yenrawaikur heirouri Jesu'ne Aitamtom lhungdoura leikur,

²⁴ heitoubi kheen heirouri mali heiri samadru tlailamra tlatni hullhakloula, heirou mali heiwari yuilhouni katmartlaoyoukur, ngamri marthee heiwari mali'yei maironi loutheekur.

²⁵ Heirouri ningshun manma nung katwaarthrun kheen heirouri Jesu'ne yuidoura Aiyei honi chabi Ruishik rapbei leina lhangra hungkur.

²⁶ Heirouri Jesu'ne yuidoura Aihoni chabi hungkur heiwaya yane loumunarouri, yari chiwurchiya. “Hori thralwang hoileisane” toubi yane chikanchunle kalhonne khatle-khat yunrilkur.

²⁷ Heitounei ngamrou Jesu'ne yanung kyun, “Naiyei malung dammalo, Keime, na koukhi chimaklo.”

²⁸ Heitounei ngamrou Peter'ne loukanthoubi Anung loukyun, “Heiyanungri, Upawa, tanghakne Nang hoiyanungri, keiyakhi yuidoura keihone chabi Neileinara wananungei chay pilaklo.”

²⁹ “Heiyanungri wawalo,” toubi Jesu'ne louyunnarouri, Peter'ne malirei yongchumbine yuidoura aihone chabi Jesuei leinaranung wakur.

³⁰ Heiya ani lhimnung-martheetang heiwaya loumunarouri, chiwurbi yuirilla yendumrou waiyoukur, heirouri “Upawa, keiya bei kalpilaklo” toubi ani ungraokur.

³¹ Heisi tounarouri Jesu'ne Aiyei hutbang heimalamthutbi aya churphopbi kyun, “kounakei uklum mandikur thimiyo nangri; kotounei neiyei malungam heiwaya khalcha'knawo?”

³² Heitoubi yarukhnirekpa mali rilla wachangkur, heirouri lhimnung martheekhi yentrimkur.

³³ Heirou Aiyei ruishik rapne mali rilla Aya loukhrumkur. Heirouri ya nammane, “Tanghakne Nangri Dunpuei Chanapawame,” toubine loukyun.

Jesu'ne Genesaret'ra Napawa Khatya Kna Raiyerpikur

³⁴ Heitoubi yane mali heiri samadru yenhulralbine Genesaretdei ramra hungthukkur,

³⁵ heitoubi bi'heirou thimi rapne Jesu'ya loumumanrekur. Heisi tounarouri yane thimi malhetchekkurbine ram heiyei karhillei klei Khulbung raprei kna thimi rapya Jesuei leinara heiurlhakur.

³⁶ Heitoubi yane Anungei buchabine, kna thimi rapya Aiyei linglik msurra tekcha thiryerkur; heitoubi linglik msur thirkur thimi namyerwari kna raikur.