MARK 8 - KHYINGEI PU'TLOU Bible (BSI)

Jesu'ne Thimi Lishing Phaliya Pichakur

¹ Tlamakne lepchaei hilrou hanuikhi thimi beimak chungne kartilkur. Yane chanung-mainung koukhi makyeirou, Jesu'ne Aiyei Ruishik rapya ungloubi shun,

² “Keiri yaya beimakne kringnawura, asinungri yaiyei chamainung koukhatkhi makkurra, ngamri yari Keikou kalhonbi kleiri tlaini khyumni yentlungura,

³ Keine yaya pichamakne cheemra malhetlanungri lamrakra msulrou, ngamri ya thari ram tlanarei thimi.”

⁴ Aiyei Ruishik rapne Anung loukngai, “Ramhang arou thimi anak'chungwaei chamainungri hune rapha manirouwo?”

⁵ Heirou Jesu'ne kngai, “Nanung mumtol kounak chungne yaoleiyo?” Heirou yane, “tolpak enitam'tomcha yaolei” toubi loumallangkur.

⁶ Heirou Ane thimi nammaya thleira ompiyalo toubi shunkur. Heirou Ane tolpak enitam heichaya shinbine Dunpuya mathangkur, heitoubi tolpak rapya threlchaalbi thimirap nammanung yerpinanungei Aiyei ruishik rapnung malanpikur, heirou Ruishik rapne ya nammanungei louyerpikur.

⁷ Yanung thanga mandi thakhi kyao, Jesu'ne heiwaya loubine Dunpunung hanui mathangbi yerpithunanungei Aiyei ruishik rapnung malanpiwurthu.

⁸ Asitoubine thimi nammane uk-thone chamaibi, heiyei maleikur rapri Ruishik rapne luk-shangphai enitam markumthungkur.

⁹ Bi heirou thimi lishing phalinakne kallongkur.

¹⁰ Heirou Jesu'ne thimi rapya malhetbi shalyerkur, heirouri Ruishik rapne tallengne mali tungbi Dalmanutha ramra wakur.

Lhangai Karsa rapne Kngak Lhouya Touyernanungei Rapha

¹¹ Lhangai karsa thimi thane hungbi Jesukou tlou yitrilyoukur. Yane chaang kambi Jesu'ya Dunpuei kya khatme toubi muthrananung kngak lhou khat toulaklo toubine shun.

¹² Heirou Jesu'ne nil shaangni shobi shun, “Asiyei chaanyei thimi rapne kounungei kngakei lhouyathil touyernanungei ngaiphawo? Keine nanungei tanghakne shunlei, Hoimakrou, anak thimi rapnungei Keine kngakei lhouya kouninungkhi mutpimarou.”

¹³ Ane yaya horkhouwurbi mali khatra katungbi Samadruei khatlhangra heiralthutkur.

Jesu'ne Ruishik Rapya Phab Da'kyer

¹⁴ Ruishik rapne mali rilla tolpak khatchatom nimakne dei chanung-mainungei urrou malumkur.

¹⁵ Jesu'ne yanungei kanthramni shun, “Nane mukheine toulak, Lhangai-karsarap heirou Herod'yei lhangaimak phri heiya mulak.”

¹⁶ Yane mumtolrap makkurnei ngamrou khatle-khatle kartongril waiyoukur, touri “Aiyei kyun heiwari kani mumtol tekkhi yaomakurneime.”

¹⁷ Jesu'ne yai yunkrilya mayekbi yanungei shun, “Mumtol yaomakurnarou nane khatle-khat koutounei heinung'tlim kartongrilkurawo? Asinung rampha nane muheimakhuiko? Nai ukningri asilumpha mantrangleihuiko?

¹⁸ Naiyei mitlung leirerikhi almumakko? Nai khna leireri mayekmako?

¹⁹ Keine tolpak phangatamni thimi lishing phanganung picha-pimaikur heiwaya nane ningthutmako? Nane heirouei maleithung heiri luk-shangphai kounakchung markumthung?” Heirou yane lourul, “Shangphai chiple khni maleithung!”

²⁰ Jesu'ne kngai, “Keine thimi lishing phalinung tolpak enitamtom picha-pimaiyeinung heirou maleithungkur heiwari nane shangphai kounakchung markumthungkur?” Heirou yane loumallang, “Shangphai enitam maleithung”.

²¹ Ane yanung kngai, “Nane asinung rampha naiyei phab damakhuiko?”

Bethsaida'ra Jesu'ne Mitdeo Khatya Muyerpi

²² Yane Bethsaida'ra hungeinung thimi thane mitdeo khatya yenbi Jesu'ne thirpinungei buchakur.

²³ Jesu'ne mitdeo heiwaya hutra churloubi yultlai heirouwei ruiloukur. Napawa heiyei mitlungra mtil thukphaangbi heirou heirapbei doura hut khoubi kngai, “Nangne kou mulei?”

²⁴ Thimi heine kathibi shun, “Moi, keine thimi rapbei karwaichaya heimulei, heitoubi yarap heiri heengtrung kanshaicha naksine mulei.”

²⁵ Jesu'ne hanui kallengne Aiyei hutne napawa heiyei mitra thirpikur. Asinungri ane kang thibi haallei kmu'nakrim mumanekur.

²⁶ Jesu'ne aya yultlai heirou polhakmakno toubi kanthramne shunmatubi aiyei cheemra hilkur.

Jesu'ya Christame Toubi Peter'ne Yunthut

²⁷ Heirouwei Jesule Aiyei ruishik raple Caesarea Philippi pongrei klei yultlai kounakra chawurthu. Lamra tlayeinung Ane yanungei kngai, “Thimi rapne Kei ari huwo toubi yunrillei?”

²⁸ Yane loumallang, “Thimi thane ‘Nangri yuiluppi Johnme’ toubine yunlei, thimi thane ‘Nangri Elijahme,’ heirou dei thaneri ‘Nangri thimkhui hangrei khatme’ toubine yunlei”.

²⁹ Heirou Ane yanung kngai, “Naneri Keiya huwo toubi khallei?” Heirou Peter'ne loumallang, “Nangri Christa heirime”.

³⁰ Jesu'ne yanungei Aiyei ngamrou hukhatnungkhi shunthutmaknanung kanthramni shunmatukur.

Jesu'ne Aiyei Klah-Knang Dourou-kyou, Hirou-kyou Ngamrou Shunpi

³¹ Jesu'ne Aiyei ruishik rapnung shunmatuyoukur. “Thimiyei Chanapawane beimak lahrou, heirou upa rapne, thangrei-suipi upa rapne, tloulamya shunmatupi pu rapne Aya yapimakrou. Aya mandaihatrou, heitoubikhi tlaini khyumnirou katringthutthurou.”

³² Jesu'ne tlou a kandangni muyerla. Heirou Peter'ne Aya ungthutloubi shamyoukur.

³³ Heirou Jesu'ne Ruishik rapne kartilbi leinarou thirochabi Peterya shamkur, “Satan, Keipongra heileimak, wathukkura, neiyei kning heiri Dunpurei ningmak, tlaipangei kningso!”

³⁴ Heitoubi Jesu'ne Aiyei ruishik raple thimi nammaya unglhakbi yanungei shun, “Hukhatne Keiyei hil chanthungniyanungri aitamya yachamakasu, heitoubi aiyei ruiya urbine Keihil chanthungasu.

³⁵ Heiyei ngamri hukhatne aiyei chaanya kalnanungei toulanungri maangrou; heiya hukhatne Keinung'tlim heitoubi lhangai tlounung'tlim aichaan maanganungri lhawai kalpirou.

³⁶ Thimi khatne tlaipangpal namma kulchalbinekhi aiyei lhawaiya maanguranung anungei kouya karsukrouwo? Chimneri koukhi karsukmakrou!

³⁷ Heiyei ngamri thimi khatne aiyei lhawaiya koule kartlengrillou?

³⁸ Hukhatne tharmu chimmak heirou lhangaimakur kheen arou Keinung'tlim heirou Keiyei tlounung'tlim rikrai phalanungri, thimiyei Chanapawa heinekhi Aiyei Pawaei heirou Khyingei Thangring rapkou manile mantrangkou yongei kheenrou rikrai pharou.”