MARK 7 - KHYINGEI PU'TLOU Bible (BSI)

Bongei Nutar-Patar rapbei Youkna Ngamrou Jesu'ne Shunmatupi

¹ Lhangai-karsa raple upa rapne Jerusalemrei hungbi Jesuei pongra kartilkur.

² Yane Jesuei Ruishik rapne hut chikmathaimakne chamaikur heiri mardun toubi khalkhou. Heiwari koungameiyo toulanungri ya heine yaiyei hut chikmakne chamaibi loukleiya mulhakur.

³ Lhangai karsa raple Jehudirap nammane bongei yai nutar-patar rapbei youkna hilthungne, yane yaiyei hut lhangaine chikmathaimakne cha'kmairi younamak;

⁴ heiya duine keithilrei klo putchei koukou hoiyanungkhi yane halnung chaamthaimaka'nungri chamaimak. Heiya duine yane yuikep, chakphu-anphu, heirou ipna-neina rapya lhangaidui machamrou toubi bongei youkna hilthungne charilkhou.

⁵ Heitounei Lhangai karsa raple upa rapne Jesu'nung kngai, “Neiyei ruishik rapne kai nutar-patar rapbei youkna shunpikhou heiwaya chanthungmakne koungammei yai hut chikmakne cha'kmaiyo?”

⁶ Heirou Jesu'ne yanung loumallangpi, “Isaiahni kounak chimne nanaksi lhangai karsa rapbei ngamrou yunthutkhou; ani asitoubi mayekhoupi heinakne, ‘Nari lhangai karsa thimime: thimi rapne yaiyei murnitom Keiya mathanglei, heiya yai ukningri Keipongra leimakne tlatni leilei.

⁷ Koukhi karsukmakne yane Keiya khrumlei, touri tlaipang thimiyei tlouya Keiyei tloulam'nakne yane marnopilei!’

⁸ “Ane Dunpuei tloulamya lakurkhoubi tlaipang thimiyei shunmatupiya chetni churphopbi klei.”

⁹ Jesu'ne yunthulei, “Nai shunmatupiya chouyernanung Dunpuei tloulamya lhouhoipimaklei.”

¹⁰ Moses'yei chaylamne yunkhou, “Naiyei pui-paya rikrai ktrumnalak, heirou hukhatne aiyei pui-paya lhangaimak thuithini mintlangbi shamkur thimiri hirou.”

¹¹ Heirou nane atoubi yunlei, “Hukhatne karsukei lhou leiyanungri awari Corban'yei lhou touri Dunpuei pikur hutthul.

¹² Heisi toulanungri nane thimi heiya aiyei pui-panung lhangai touyerpi nimak.

¹³ Asitoubine nane thimi deinung naiyei youkna heiya shunpinei Dunpuei tlouya karsukyermakur. Anaksi kounakya nane toubi leilei.”

Thimi Khatya Mardunkyer Lhou

¹⁴ Jesu'ne kartilbi klei thimi nammaya unglhakbi kallengne yanungei shun, “Na namma phabdani louningpilak.

¹⁵ Thimi khatdei lhangaimak mardun heiwari purei kouninungkhi wachang nimak, heiya thimi heiya mardunkyer heiri aiyei ukning rilrei klei heiwane mardunkyer.”

¹⁶ Ninglhaknanung khna klei thimine mayeklasu!

¹⁷ Jesu'ne thimi nammaya lakkurkhoubi cheemwaira wachangeinung Aiyei Ruishik rapne yunbi klei tlou awari kouwo toubine loukngai.

¹⁸ Jesu'ne yanung loumallang, “Nakhi yanaksine beimak muheimaklei. Nane mumako touri thiminung purei wachangkur heiwane koukhi aya mardunyermaklei.

¹⁹ Heiyei ngamri purei wachang heine aiyei malungra changmak, heirou aiyei ukra yongchangbi mayulra ethutkur heiwariya.” (Asitoubi Jesu'ne cha'kmai put namma marthingurame toubi shunthutpikur).

²⁰ Heirou Ane hanuikhi shunthulei, “Thimi khatdei ukningrei kathuk heiwane aya mardunkyer.

²¹ Heiyei ngamri thimi khatdei rilrei wathuk lhangaimak, hyingmak, mucha'kni, thimi krang,

²² minu-micha daimarek, khramtang, mandalkhei, tlaipang sharungnungtom ningcha, miput maduphakal, tangcha, tlou thuithi kyun, heirou muheimek,

²³ namma heiri thimi khatdei ukrilrei wathukbi aya mardunkyer.”

Napuiya Khatdei Malungam

²⁴ Jesu'ne bi heiya lakurkhoubi Tyre'le Sidonyei ramra chakur. Ane thimi hukhatyakhi muyermakne cheem khatra polhakbi leikur, heisiya hoiyanungkhi Ane louyulchangmakur.

²⁵ Lhangaimak lhawai changbi klei nangaka khatdei puiwini Jesu Hungurame touya mayekbi tallengne wachangbi Aiyei hopongra wakhrumchakur.

²⁶ Napuiya heiri Jehudi nimakne Syria'rei Phoenicia ramrei pukkhou napuiya. Ane aiyei chawiyei rilrei klei lhim hulthutpinanungei Jesu'ya buchakur.

²⁷ Jesu'ne anungei loushun, “Kane douwa rapya pichariyeise, douwa rapbei cha'kmai putya ui rapnung picharikur heiri chimmakrou.”

²⁸ Heirou napuiya heiwine Jesu'nung loumallang, “Moi heiri chimlei, Upawa, ui rapne rampha douwa rapbei chamainarei dakurya khulchalei.”

²⁹ Heirou Jesu'ne anungei shun, “Nangne heitoubi yunnei ngamrou neiyei cheemra kallengalo, touri lhim heiri neiyei chawirei thukkura.”

³⁰ Heirou napuiya heiwine aicheemra kallengeinung aiyei chawi heiri khumdoura ipbine louklei, tanghakpani lhim heiri aiyei chawirei thukkurbi louklei.

Khnasit, Tloukhi Thukmak Napawa Khatya Lhangaikyer

³¹ Jesu'ne Tyre ram'rouwei yenkallengbi Sidon ramthungne yenralbi Galilee'yei Samadrura heirou Decapolis'yei ramra yukur.

³² Heirou thimi thane khnasit thimi, heirou tlou ak'ak thimi khatya ruilhakbi Jesu'ya aidoura hut khoupinanung buchakur.

³³ Heirou Jesu'ne yaihangrei aya urthutloubi Aiyei hutmayungni thimi heiyei khnara thunlhakbi heitoubi Aiyei matil thukbine aiyei maleira teipikur.

³⁴ Heirou Jesu'ne Thangmunra kadthibi nilsopui shobine napawa heinung shun, “Ephphatha” touri “latpilaka!”

³⁵ Heirou tallengne napawa heine khna mayekkur, aiyei malei heiwakhi koukhi loupalmakne tlou yunchangkur.

³⁶ Heirouwei Jesu'ne hunungkhi shunthutmaknanung yaya shunmatukur, heisi toubinekhi yane mihangra duiduine shunthutkur.

³⁷ Heirou lhou heiwaya mayek thimi nammane beimakne ngakurnarou asitoubi kyun, “Kounakchang lhangai lhouya toukurro?” Heirou yane asitoubikhi kyun, “Ane khnasit thimiya rampha mayekyerla, tlou thukmak thimi rapyakhi yun'maneyerla!”