MARK 5 - KHYINGEI PU'TLOU Bible (BSI)

Hyingmak Lhawai Changkur Thimi Khatya Jesu'ne Lhangaikyer

¹ Jesule Aiyei ruishik raple Gersa ramrei klei Galilee'yei Samadruei khat lhangra wa'tlungkur.

² Jesu'ne malirei yongchumle tallengne hyingmak lhawai changkur thimi khatkhi lhanyaorei wathukbi Jesu'ya murilkur.

³ Aiyei leinari lhanyao, hunekhi aya thir'ruine phonphopbi khouchangmak;

⁴ heirou aiyei hut-ho kounakchang phonbine khouthila, heisi toubikhi kheen kantangrou ane thir'rui heiwaya phuitatkur. Heitounei ayari hunekhi rakchangmakur.

⁵ Masa-nunghang ane lhung raalbi lhanyaora ungraochabi karwaichakur, heirou aitamne thlungnekhi shutatkur.

⁶ Ane lhanyaorei Jesu'ya loumunarou chanphabine Jesuei maibongra khuklu kanthrunchane kannelhakbi,

⁷ heirou ane hou choune lou'ungraobi kyun, “Choudui Dunpuei Chanapawa Jesu; Nangle keiri kouthukrillo? Dunpuei minra buchalei, keiya lahyerpimaklo!”

⁸ Heirou Jesu'ne napawa heinungei shunkur, “Lhangaimak lhawai, thimi heirouwei wathukkura!”

⁹ Heitoubi Jesu'ne anung kngai, “Neiminri kousi ung!” Heirou napawa heine loumallang, “Keiminri ‘Mob’ toubi ung-touri kari beimakne chung!”

¹⁰ Heirou yaya ram heirouwei hulthutpimaknanung ane Jesu'ya kalthi buchakur.

¹¹ Heirouri beimak chung hog rulkhat lhung mnakra silbine louklei.

¹² Heitoubi hyingmak lhawai rapne Jesu'nung buchakur, “Kane hog rapbei rilla changnanungei kaya bei malhetpilaklo.”

¹³ Heirou Ane yaya malhetkur heirouri lhangaimak lhawai nammane thimi heirouwei thukkurbi hog rapbei rilla changkur. Hog lishing-khniyeimal heiwane lhungrimrei chansundabi Samadrura dahatkur.

¹⁴ Heitoubi hogsil rapne chanwurbi pao heiya yultlaira hungshunpikur. Heirou thimi rapne bi heirou kou thukkurro toubi wathikur.

¹⁵ Heirou yane Jesu'nung hungeinung hyingmak lhawai changkur thimi heine kansambi karbilne lhangaidui mukheine lou'ombi klei heiwaya muwurbi yari beimakne chikur.

¹⁶ Lhangaimak lhawaitung thimi, heirou hog rapnung kounaksi lhou thukkurro toubi kmu thimi rapne thimi deinungkhi shunpikur.

¹⁷ Heitounei yane Jesu'nung yaiyei ramya lakkurkhoubi shalnanungei shunchakur.

¹⁸ Jesu'ne malira kakayeinung lhangaimak lhawai changkhou thimi heine Anungei buchakur, “Keikhi Nangkou chanthungeise.”

¹⁹ Heisiya'nungkhi Jesu'ne yapimakur, heirou Jesu'ne anung shun, “Neicheemra kallengbi neiya Dunpune kounak tang lhou toupi, kounakchang kringpila toubine yanungkhi hungshunpilak.”

²⁰ Heirou ani cheemra kallengurbi yulthung chiptam ralni chabi Jesu'ne anungei kou toupikur tou heiya shunpikur. Heiya mayekkur thimi nammane beimakne ngakkur.

Jairusyei Chawi, Heitoubi Hee Karso Napuiya khat

²¹ Jesu'ne hanuikhi Samadru ralbi wakur. Samadru heirou thimi beimak chungne Aya loukar'umkur.

²² Dunpuya khrumna Synagogue khatrei ruichingpi pu Jairusni Jesu'ya loumubi Aiyei hopongra kanelhakbi,

²³ ani beimak kalni loubuchakur, “Keicha napuiyacha heiri beimak kalni nabi leiyurame, malungshipibi wabine aidoura Neiyei hut wakhoupilaklo, heiyanungri aiyei kna heiri raiwurbi ringroume!”

²⁴ Heirou Jesu'ne akou wakur. Heirouri thimi beimak chungne Jesu'ya kar'umbi chanthungkur

²⁵ Heirou kum chiple khni hee karsoni nabi klei napuiya khat louklei.

²⁶ Thim kounaknekhi aiyei kna heiya thikhoula, ane tuy kounak dingni kna heiya thiyerbinekhi rainung'tlimri duiduiyura.

²⁷ Ane Jesuei lhouya mayekbi, thimi rapbei tlakra Jesuei hilra hungchangbine,

²⁸ aitam ningchakur, “Keine Aiyei phichi tomchara hoiyanungkhi thirthung phalanungri keiyei kna awari rairou.”

²⁹ Ane Jesuei phichira tekcha thirkurle aiyei hee karsobi klei heiwari tallengne kapkur; heirou aiyei kna heiwari raiyurame touri ane ningmuwurla.

³⁰ Heirou Jesu'ne Aiyei mantrang thukkurame touri tallengne muwurbi Ane Aya kar'umbi klei thimi rapnung kngai, “Hune Keiyei phichira heithirkur?”

³¹ Heirou Aiyei ruishik rapne loumallang, “Thimi anak chungwani Neiya kar'umbi kleiri Nangne kmu; koutounei Neiya hune therkurro toubi ngaikurawo?”

³² Heisiya'nungkhi Jesu'ne hui toukurro toubi karhilne thiphakur.

³³ Heirou napuiya heine anungei kouthukkurro toubi ningmubi ane chi-kanchunle kalhonne hungbi Jesuei hopongra khuklu kanthrunchani dunbi Anungei chimtlouya namma shunthutkur.

³⁴ Jesu'ne anung shun, “Keichawi, neiyei malungam heine neiya raiyerla; neiyei muidane kallenglaka, neiyei kna heiwari railakasu.”

³⁵ Jesu'ne asitoubi yunyei kallou, Jairus'yei cheemrei thimi thane wabi anung washun, “Neichawi hiyura, kounungei Upawaya lahyerrouwo?”

³⁶ Jesu'ne yai kyun heiya ninglhakmakne anung shun, “Tekkhi uksamak, malungamnitom leiya.”

³⁷ Heitoubi Ane Peter, James heirou aiyei naowa John'ya nimakne dei hukhatyakhi Aihil chanthungyermakur.

³⁸ Yane Jairusyei cheem wa'tlungeinung, cheem heirou yane bisokhi naimakne chapkarhungbi louklei heiwaya Jesu'ne wamukur.

³⁹ Heirou Ane wachangbi yanung washun, “Koutounei nane asi bisokhi naimakne chapkarhungbi leikurrawo? Douwa ari himakme, ari ipme!”

⁴⁰ Heirou yane Jesu'ya lhouhoimakne laonakur, heitounei Ane ya nammaya hulthutdurbi douwaei pui-pale Aiyei ruishik napung-khyumya ruibine douwa heiyei neina bira wachangkur.

⁴¹ Jesu'ne Aiyei hutbangra churbine douwa heiya shun, “Talitha cumi,” (touri, “Napuiya douwacha, Keine neiya shunlei, kanthouwa!)”

⁴² Napuiya douwacha heine tallengne kanthouwurbi karwaichayoukur. (Ari kum chiple khniyei douwa). Asitoubi thukkur heiwaya mubi ya namma heiri beimakne ngakur.

⁴³ Heirou Jesu'ne yaya hunungkhi yunthutmaknungei karbilne shunmatukur, heirou Jesu'ne shun, “Anungei chamainungei heiloupilak.”