MARK 4 - KHYINGEI PU'TLOU Bible (BSI)

Lungtuknei Yailim Tlou

¹ Jesu'ne hanuikhi Galilee'yei Samadru ruira shunmatupi youthu. Thimi kartilkur beimakne chungurbi Ane mali khatra polhakbi omkur. Maline yuira leibine thimi nammane samadru ruira mayungbine leikur.

² Ane yanungei mu'kna yailim tloune chungne shunpibi yanung kyun,

³ “Louningpilak! Thimi khatne trunwai lung tukrou wathukkur.

⁴ Ane loutlaira lung heiya heisi heitukyeinang, lung thane loukumra dakur, heirouri ramwaa rapne trailhakbi khulchaloukur.

⁵ Heirou lung thane thlung doura thleiphu maknara dakur, heirou thleiphu maknei ngammei lung heiri mun kabi khrangne katpukthutkur,

⁶ Heiya kinni kathukyei kheenrou mun heiri nungshani phounei ngamrou marhuikur; heirou mun heiri yrung khyukne runmaknei taryura.

⁷ Lung thane thruhangra dalhakur, heirou katpukthutbi thruni yamhuwurbi heikhi heimakura.

⁸ Heirou lung thari thleiphu leinara dalhakbi katpukthutkur, heitoubi tangthutbi hei somthum, somruk heirou macha heikur.”

⁹ Heirou Jesu'ne dongwairou shun, “Ningnanungei khna kleirap nammane mayeklaksu!”

Munanung Yailim Tlou Yunnei Ngam

¹⁰ Jesu'ne Aitam leiyeinung Aiyei tlouya mayekkur rapne Ruishik chiple khnikou hungbi mu'kna yailim tlou rapya khminni shunmatupinanung hungkngai.

¹¹ Heirou Jesu'ne yanung loushun, “Nanungeiri Dunpuei Krungramei muei klei yailim tlouya muyerlei,” toubi Ane kyun, “heiya purei klei, thimi dei rapnungri ngamrap namma mu'kna yailim tloune mayekyerlei,

¹² heineri, ‘Yane murerikhi mumaknanungei; yane mayekrerikhi yai mayek heiri kouweiyo touri muchangmakrou. Yane Dunpunung kalleklhaklanungri, Ane yaya kukpirou.’ ”

Jesu'ne Lungtuknei Ngamrou Mu'kna Yailim tlouya Shunthutpi

¹³ Jesu'ne yanung kngai, “Nane mu'kna yailim tlou awaya mulhak maneleiko? Heineri nane mu'kna yailim tlou namma awaya koutoubi mulhakrou?

¹⁴ Lungtuk thimine Dunpuei tlouya tuklhaklei.

¹⁵ Thimi thari lamruirei dalhakur lungnaksi; yane tlou heiwaya mayekle talleng Satan'ne wabi heiwaya louthutkur.

¹⁶ Thimi deine thleiphu makna thlung doura dabaangkur heinaklei. Yane tlou heiwaya mayekkurle hakraone loulhakur.

¹⁷ Heirou yai ukrilla tlou heiwari khyukne changmaknei ngamrou tlani leikhounak. Heitoubi tlou heinung'tlim klah-knang hungei kheenrou tallengne yane tlou heiwaya lakurkhou.

¹⁸ Thimi deine thru hangra dalhakur lungnaklei. Yane tlou heiwaya mayekbi,

¹⁹ heirou tlaipang chaanyei klah, dunya madu, heirou deideiyei lhouya madunei ngamrou tlou heiwaya yamhuwurbi hei heiyermakur.

²⁰ Heirou thimi deineri thleiphu leina bira lung dalhakur heinaklei. Yane tlou heiwaya ningbi loulhakur, heitoubi hei somthum, somruk, heirou macha heilei.”

Shangphai Daakrei Dunkhou Meishar

²¹ Jesu'ne asitoubikhi yunlei, “Hukhatne meisharya manshokbi shangphaine makhubphopbi, nimakanung khumdou daakra dunkhouko? Ane meishar dunna meitharl doura dunkhounungei nimako?

²² Asitoubi yulkhoubi klei namma urthutchirou, makhubphopbi khou namma latthutdurchirou.

²³ Khna klei thimi nammane mayeklaksu!”

²⁴ Jesu'ne yanung shun, “Nai mayekkur heiwaya chetni rumphoplak! Nane minungei holpikur changh heiwaya kanthritmakne nanungkhi Dunpune holpirou, heiya duinekhi holpikur kya.

²⁵ Klei thiminung duine leiyerpirou, heiya mak thiminungeiri aiyei beicha kleikhi louthutdurou.”

Lung Pukthutnei Mu'kna Yailim Tlou

²⁶ Jesu'ne asitoubi yunthulei, “Dunpuei Krungram heiri anaksilei, thimi khatne aiyei loura lung tuklhakhou.

²⁷ Ane masanung ipkur, heirou ningshun nung katwaaryei kheenrou ani kanthouyeinung lung heiri trik katpukthutbine louklei. Heirou loupune heiwari koutoubi thukkuro touri mumak.

²⁸ Thleiphu heine lung heiya katpukthutyerbi hei kat'heikur; lamkrine mun kathukbi, heirou katchoubi umbine hui kathukbi hei kat'heikur.

²⁹ Heitoubi hei minwurbi markumrou kheen hungame toubi ane chamche dayerkur.”

Anchep Lungei Mu'kna Yailim Tlou

³⁰ “Dunpuei Krungram heiri kounakleiyo touri kani koutoubi yunserou?” toubi Jesu'ne kngai, “Awaya munanungei kounaksi yailim tloune yunserou?”

³¹ “Heiri anaklei, touri thimi khatne tlaipang dourei namrouei mandi ancheplung khatcha loubi thleira linglhakurla,

³² heihillou katpukthutbi anna-louna nam'rouwei tangdui trung khat hoikur. Ane ban tang-tang rungbine ramwaa rapnekhi yaiyei rabu hungshulkur.”

³³ Jesu'ne anaksi munanungei yailim tlou kounakne yanungei paolaa shunmatupikur; Ane yai mulhak maninanungei Ane maniyei'mkhei yunpikur.

³⁴ Ane munanungei yailim tlou nimakne yanungei shunpimak, heirou Ane Aiyei ruishik rapkou leiyeinung Ane yanungei namma khminni muyerkur.

Jesu'ne Nung-Martheeya Nimkyer

³⁵ Tlaini heiyei rawainung Jesu'ne Aiyei ruishik rapnung shun, “Kane Samadru heiyei khat lhangra heirallase.”

³⁶ Heirou thimi nammaya lakurkhoubine, Ruishik rapne Jesu'ne haallei tungkhouna malira katungbi yane Aya urlouheila.

³⁷ Lepcharou Lhimnung-martheetang thukbi yuilhaoni mali heiwaya hung'umkarnengbi yuira dumrou waiyoukur.

³⁸ Jesu'ne mali'yei hil'lhangra lukhangbi ipbine leikur. Anung ruishik rapne shun, “Upawa kari hirou kyou awari Nangne lhou hoipimakarouko?”

³⁹ Jesu'ne kanthoubi lhimnung-martheetangya shunkur, “Yingalo! Mulleiyalo!” Heirou Ane yuilhaonung shun, “Yenneemmalo,” heirouri marthee heikhi yentrimmurbi, rie daikur.

⁴⁰ Heirou Jesu'ne Aiyei ruishik rapnung shun, “Nane koutounei chiyo? Nane asilumpha uklummako?”

⁴¹ Heirou yane beimakne chiwurbi yaitam khatle-khatle mune yunrilkur, “A thimi aya huwo? Martheekhi heirou yuilhaoni rampha Aiyei shunya ninglei.”