MARK 16 - KHYINGEI PU'TLOU Bible (BSI)

Jesu Ringthutkur

¹ Heirou Mathrilna tlaini ralwurbi, Mary Magdalene'le, James'yei pui Mary heirou Shalome yane Jesuei sharungra teiphangnungei khrim muiknam shirek lokur.

² Heirou haptaei lamkri tlainirou ningshun manma kinni kathukbongnung yane lhanra wayeinung lamra yaitam yunkril.

³ “Lhan'purrei makhupbi khoukur thlung heiwari hune kanungei khanglatpirou?” (Thlung heiri beimakne tang).

⁴ Heirou yane wabi heithinarou thlung heiwari maletthutbi louklei wamukur.

⁵ Heirou yane lhanrilla wachangeinung phi khngou upbi napawa khatne thya lhangra ombi louklei mukur, heirou yane beimakne ngakkur.

⁶ Ane loushun, “Ngakmaklo! Nane heeng karbakra manyarhatkur Jesu'ya raphame touri keine mulei, Ari bi arou makkura, Ari ringthutdura! Thilak, Aya phneikhouna biri awari.

⁷ Asinung nane kallengbi Aiyei ruishik rapnung, heirou Peter'nungkhi hungshunpilak, nanungei shunpiwurkhou heinakne nane Aya bi heirou murilrou.”

⁸ Heitoubi yane chi'knale kngakle kalhonne lhanbi heirouwei chankallengkur. Yane kalthi chiwurbi thimi hukhatnungkhi shunthutmakur.

Jesu'ne Mary Magdalene'nung Mukandangpi

⁹ Jesu'ne katringthutne ningshun manma Ane lhangaimak lhawai enitamya hulthutbi kna raiyerpikur Mary Magdalene'ya rorilbi muyerkur.

¹⁰ Ane yenkallengbi Jesukou pulne leikhou thimi rapnung, kanrelne chapbi klei rapnung hungshunpikur.

¹¹ Heirou ane “Jesu ringthutdura, keine mukhoula” toubi hungshunpibikhi yane aiyei tlouya malungampimakur.

Jesu'ne Ruishik Khintamnung Mukandangpi

¹² Heihillou Jesu'ne Aiyei mairung laine yaihangrei khintamya yaiyei yullanung shaalyeinung muyerpikur.

¹³ Heirou yane kallengbi deinungkhi shunpikur, heitoubikhi yai kyun heiwaya malungampimakur.

Jesu'ne Ruishik Chiple Khatnungei Mukandangpi

¹⁴ Heihillou Jesu'ne chiple khatne chaak chayeinung muyerpikur. Yai ukning mantrangnei heirou yai malungam maknei ngamrou Jesu'ne yaya samkur,

¹⁵ Heirou Ane yanung shun, “Tlaipangpal bi kantang chabine lhangai paolaa heiya thimi kantangnung shunpilak.

¹⁶ Heirou malungambi yuilupkur aya kalpirou heirou malungammak thimi heiyari klal dayerrou.

¹⁷ Malungamkur rapnung kngak lhou tounanungei mantrang pirou: Keiminra yane lhangaimak lhawaiya hulthutrou, yane tlou limlimkhi yunchangrou;

¹⁸ Yane frulya churbikhi, heirou khru mongbikhi tek himakrou; yane kna rapbei doura yaihut khaanglanung kna rairou.”

Jesu'ne Thangmunra Kakur

¹⁹ Asitoubi yale yunrilkur hillou Jesu'ya Thangmunra loubaangkur heirou Dunpuei thya lhangra ombi leikur.

²⁰ Heirou Ruishik rapne bi kantang chawurbi lhangai paolaa shunpikur, heirou Dunpune yakou kalhonne lhou toukur, heirou yai tlou'myer heiri chimleime toubi yaiyei kngak lhou toukur namyerwa heine kandangne muyerkur.