MARK 15 - KHYINGEI PU'TLOU Bible (BSI)

Jesu'ya Pilatedei Maibongra Heiruilhak

¹ Ningshun manma Suipi purap, tloulamyei Uparap heirou lhou'urpu Uparap nammaya khnotni murilbi tlou sheemrilkur. Yane Jesu'ya phonbi Pilate'yei leinara urlouheibine pilhakurla.

² Heirou Pilate'ne Anung loukngai, “Nangri Jehudi rapbei Krungko?” Jesu'ne loukrul, “Neikyun heiwariya.”

³ Suipipu rapne Jesu'nung nimak tlou kounakya theibaangpikur,

⁴ heitounei Pilate'ne hanui kallengne ngaithu, “Nangri mallangmakrouko? Yai theibaangkur namma heiya louningthilak!”

⁵ Heisibilroukhi Jesu'ne tekchakhi loumallangmak, heitounei Pilate'ri beimakne ngakkur.

Jesu'ya Hatnungei Darilkur

⁶ Ralthutpinei karngaei tlaini kantangrou youkna hilthungne thimi rapne yaya manbi kulrei klei thimi khatri Pilate'ne malhetpikur mane.

⁷ Kheen heirou khulpamya marhotbi klei napawa khatle kalhonne Barabbas toubi ung napawa khatkhi kulra khoubi louklei.

⁸ Kartilbi klei thimi rapne yai youkna hilthungne toupilaklo toubi Pilate'nung shunchakur.

⁹ Heirou Pilate'ne yanung kngai, “Keine nanung Jehudiyei Krungya malhetpiyernileiko?”

¹⁰ Suipipu rapne karhoutangnei Jesu'ya aihutra katpibaangme touri ane loukmu.

¹¹ Heirou Suipipu rapne Jesu'nung tlim Barabbas'ya malhetyernanungei kartilbi klei thimi rapya khrotlhakur.

¹² Pilate'ne hanuikhi kartilbi klei thimi rapnung shun, “Heiyanungri nane Jehudia rapbei Krungme toubi ung napawa Anungei keine kou touserou?”

¹³ Heirou yane hanuikhi hou chouni lourulbi, “Aya manyarhatlak,” toubi loukyun.

¹⁴ Heirou Pilate'ne yanung heingaithu, “Ane kou klal touwurneiyo?” Heirouri yane duine chouni lou'ungraothubi, “Aya manyarhatlak,” toubi loukyun.

¹⁵ Heirou Pilate'ne kartilbi klei thimi nammaya malung khrahyerou toubi Barabbas'ya yanungei malhetpikur. Asitoubi ani Jesu'ya umwurbi heeng karbakra manyarhatnungei pithutdurla.

Raallui rapne Jesu'ya Laokna

¹⁶ Raallui rapne Jesu'ya khulbungya ngaakbi klei Upawaei yuntlangmaira ruilhakbi raallui deiya ungmartilkur.

¹⁷ Yane Jesu'nung phi'mrao khat upbaangbi Aiyei lura thir-thruyei lukhup khuplakpiwurbi,

¹⁸ yane Jesu'ya ‘Jehudia rapbei Krung, pulchi hoiniyasu’ toubi yunbine khrumkur!

¹⁹ Yane Aiyei lura cheine umkur, matilkhi mthukphangbi khuklu kantrunchabine Aya khrumkarsakur.

²⁰ Yane Aya laonachibi Aiyei phi'mrao hei lhukurbi Aiyei haallei phiya hupbaangurbi heeng karbakra manyarhatnungei ruiloukur.

Jesu'ya Manyarhatkur

²¹ Yuldeirei Krungkul heirounung kwa Simon toubi ung napawa khatya lamra rorilnarou raallui rapne manbi Jesuei heeng-karbak heiya uryernakur. (Simon'ri Cyrene'rei Alexander'le Rufusyei pa).

²² Heirou yane Jesu'ya Golgotha'ra, touri “lu-thru” toubi ung bira ruilouheikur.

²³ Heirou yane myrrhya darkha yuile maryalbi Jesu'nung pimongkur; heiya Jesu'ne loumyukmakur.

²⁴ Heirou yane Jesu'ya manyarhatdurbi Aiyei phi heiwaya threlkhaibi hu-hunungei li-karsuileiyo toubi meirui thirilkur.

²⁵ Yane Aya hatkur heiwari ningshun pung tako daei kaallei.

²⁶ Heirou yane Jesu'ya theibaangpikur tlouya, “Jehudia rapbei Krung” toubi mayebi Aiyei luthakra hempopkur.

²⁷ Heirou yane mucha thimi khintamyakhi khatne Jesuei thya lhangra heirou khatyane thyoi lhangra heeng karbakra manyarhatkur.

²⁸ Asitoubi Khying Pu'tloura mayekhou heiwaya karchune hungthukkura. Ane klal thimi rapbei mrim-knang urpiwurla.

²⁹ Heirou pochabi klei rapne lu khngaakbine Jesu'ya rikrai pikur. “Hih! Nangne Pukhrumna cheemya threwurbi tlaini khyumnirou sabaangthurou!

³⁰ Asinung heeng karbak dourei yongchumthiama, heitoubi Neitamya kallakma!” toubi kyun.

³¹ Heinakne Suipipu raple, tloulamei upa rapne Jesu'ya laonabi yaitam yunkril, “Ane deiyari kalpilei, heiya Aitamya kalchangmaklei!”

³² “Christa heiri Israel rapbei Krungme toubi mubi kani malungamnungei heeng karbakrei yongchumlaksu!” Heirou Jesukou pulni manyarhatkur napung-khni heinekhi Aya khremnabi rikrai pikur.

Jesu Hikur

³³ Heirou nunghang-tlaikalrou khulyao namma pung khyumbil mehkhup katleikur.

³⁴ Pung-khyumrou Jesu'ne hou chouni ungraobi, “Eloi, Eloi, Lama sabach-thane?” touri “Keiyei Dunpu, Keiyei Dunpu, Nangne koutounei Keiya lakurkhouwo?”

³⁵ Heirou mayungbi klei thimi thane heiwaya mayeknarou kyun, “Heiningthilak, Ane Elijahya ungphalei.”

³⁶ Yai hangrei napung khatne nbur khat shinloubi beimak khakur yuira namlupbine cheimsur khatra phonbine Jesuei murra katnamphonbi katkyun, “Tourimakhui, heileiyasu! Elijahni yongchumbi Aya heeng karbak dourei lousundapileiyo kouwei kani thiyase.”

³⁷ Heirou Jesu'ne hou chouni ungraokhoubi hikur.

³⁸ Heirou Pukhrumna cheemrei yarkhaina maikhal phi heiwakhi dourei waiyoubi holibil khintam thukni threlsundakur.

³⁹ Heirou raalluiyei bomtangni heeng karbak heiyei maibongra mayungbi Jesu'ne koutoubi hikuro touri heimuthungkur. Ane kyun, “A thimiri Dunpuei Chanapawame touri tanghakpani chimlei!”

⁴⁰ Napuiya thanekhi tlatnarei thibine heiklei. Yaitlak heirouri Mary Magdalene, Josephle ainao Jamesyei pui Mary, heirou Shalomekhi kyao.

⁴¹ Ya heiri Jesu'ne Galilee'ra leiyeinung Aiyei hil-chanthungbi churtrungpikhou thimirap. Akou Jerusalemrei hungmalkna napuiya kounakhi bi'heirou klei.

Jesu'ya Krui

⁴² Yenrawaiyeinung Arimathea'rei Josephkhi wa'tlungkur. Ari upa rapbei tlakrei rikrai khrumna kya thimi khat, ani hungbi klei Dunpuei Krungramya karngeibi klei.

⁴³ Marshikrou tlaini (heiri Mathrilna tlainiyei maibong), heirou Joseph'ne Pilateyei bira khrangne wabi Jesuei sharung heiwaya pilaklo toubi buchakur.

⁴⁴ Jesu hiyurame tounei paoya mayekbi Pilate'ne beimak ngakkur. Ane raallui upawaya ungbine, Jesu hikur heiwari koulumeiyo toubi ngaithikur.

⁴⁵ Heirou raallui upawa heirouei pao heiya mayeknarou, Pilate'ne khi'lhung heiwaya Josephya ruiyernungei yapiwurla.

⁴⁶ Joseph'ne phaikhring'phi khat lobine, heitoubi Jesuei sharung lousundabi lhombine thlungra utlhakbi sheemkur lhan khatra phumkur.

⁴⁷ Heirou Mary Magdalene, Josephbei puiwi Mary'ne Jesuei sharungri koura khouwo touri muwurla.