MARK 12 - KHYINGEI PU'TLOU Bible (BSI)

Darkha Yekulyei Mu'kna Yailim Tlou

¹ Heirou Jesu'ne yanung mu'kna yailimei tloune kyun: “kheen khatrou napawa khatne darkha yekul khat trunkhou, heitoubi heiwaya karhilne halpal sakoolkhou, darkha yui shumnanungei khur khatkhi toubi utkur, heiya thikulnanungei turngdaang khatkhi sabaangkur, Heirou yekul heiwaya thimi deinung shaalnungei piwurkhoubi ramkheira chakur.

² Darkhahei heiri lukrou kheen hungtlungnarou ani shalnungei piwurkhou thimi raprouei aiyei siruk markumnanung aiyei shok khatya heimalhetkur.

³ Heirou thikul thimi rapne aiyei shok heiwaya loumanbi um-phit touwurbi koukhatkhi manthunmakne hangwalni louyilmallengkur.

⁴ Heirou yekul pune shok dei khatyakhi hanui heimalhetthu, yekul shaal thimi rapne ayakhi lura lou'umwurbi rikrai pikur.

⁵ Yekul pune hanuikhi shok khatya heimalhetthu, heirou ayari louhatdurpi, yane deideiyakhi anaksine kalthi loumarhotkur, thayari umwurpi, deiyari louhatdurpi.

⁶ Malhetrou kyou maleithung heiwari Aiyei malungshi Chanapawa heitomngeiya. Luiwairouri Aiyei malungshi Chanapawa heiwaya yekul shaal thimi rapnungei heimalhetkur. Ane kyun, ‘yulmakne yane Keicha napawaya rikrai loukhrumpirou’ toubi ningchalei.

⁷ Shaalkur thimi rapne yaitam louyunkril, ‘Ari yekul puei Chanapawalei. Hunga, ayakhi hatdurase, heiyanungri aiyei putcheirap namyerwa heiri kaiyei hoirouwa!’

⁸ Heisitoubi yane aya hatdurbi aiyei sharung heiwari yekul pura khingthutkur.”

⁹ Jesu'ne kngai, “Heirouri yekul pune koutoubi tourou? Ane heinaksi thimi rapya hatdurbine yekul heiri thimi deiya shaalyerrou.

¹⁰ Yulmakne nane Dunpuei Lailikra mularou. Cheemsa thimine karsukmak toubi horthutbi khingthutkur thlung heihakni nam'rouwei hungkarsuina koknarei thlung hoirou.

¹¹ Ari Umpuei touwurkhou lhou, anak heiya kaiyei thinara kounakei kngak lhou!”

¹² Jehudiyei ruichingpi pu rapne muna yailimei tlou a yaya yunkname tou muwurbi Jesu'ya hatnanungei mrimcha. Heitoubikhi kartilbi klei thimi nammaya chiwurbi yane Aya lakurkhoubi kallengkur.

Ruithrai Pinei Ngamrou Kngai

¹³ Heirou lhangai'karsa thimi raple Herodei hutrul thimi kounakya Jesuei bira aya kman yananungei tlou kounak ngaithinanungei heimalhetkur.

¹⁴ Yane Anung washun, “Upawa, Nangri huihilkhi thungmakne chimya kyunme toubi kani mulei, Nangri shakrung thimakne Dunpuei kningya shunpilei, kanungkhi shunpilo, Rome'yei Krungnung kai pibomthuk Rui kanarou kaiyei tloulamra karha kou leilei? Kane rui heiya piserouwo, pimakserou?”

¹⁵ Heirou Jesu'ne yaiyei rouya mubine loumallang, “Koutounei nane Keiya mannanung wairango? Keinungei tuychui khat yenlak, Keine thiyeise.”

¹⁶ Yane tuychui khat Anungei yenpikur, heirou Ane yanung loukngai, “Arouwei kyaori huimin, heirou huwei lha?” Heirouri yane, “Krung Caesaryei” toubine loumallangkur.

¹⁷ Heirou Jesu'ne shun, “Lhangaiya, heiyanungri Krungnung khulrui pibomthuk heiri Krungnung pilak, heirou Dunpu'nung pibomthuk heiri Dunpu'nung pilak.” Heirou yane Jesu'ya beimak ngakkura.

Ringthutnei Ngamrou Kngai

¹⁸ Heirou thimine hiwurnarei ringthutmakme toubi kyun Sadducee rapne Jesu'nung wabine kyun,

¹⁹ “Upawa, Moses'ne kanungei tloulam asitoubi yunkhou: ‘thimi khatne chanao mubongnung hiwurbi aiyei nu lakhoulanung, aiyei naowani trulmeiwi heiya loubi hikur thimi heinungei chanao muyerkna kya.’

²⁰ Heirou bongnung teinao napung-eni leikhou; ya nam'rouwei upani nu loukhoubi chanao pomkhoumakne hiyura,

²¹ heirou aiyei naowani trulmei heiwiya louthungbi akhi chanao tlamakne hiwurthuwa. Heinakrimne khyumtam tlung naowa heinekhi louthungbi heinakne hoiyura,

²² heirou leithung naowarap nammakhi heinakne hoiyura: Ya teinao enitam heine napuiya heiya loukhoubi chanao mumakne hiwurchiya. Namrouwei hiltone napuiya heikhi hiyura.

²³ Asinungri hikur nammane ringthutyeinung, napuiya heiri huinu hoirouwo? Teinao enitam nammane aya loukhou.”

²⁴ Jesu'ne yanung shun, “Heiri nai klal nimako? touri nane Dunpuei lailik heirou aiyei mantrang heiya mumaknei ngammei.

²⁵ Hikur rapne katringthutdeinungri nammane thangmun ramrei Thangringnak hoirou, heirou cheempaalkhi naimakrou.

²⁶ Asinung hikur rapne ringthutneiri: Nane Moses'yei lailikrei heeng nbur mei kaangnei tloubi heiri pamuthimako? Heirou Moses'nung Dunpune yunpikur tlou heiya mayebi leilei, keiri Abrahamei, Isaac'yei heirou Jacobei Dunpu.

²⁷ Ari ringbi klei Dunpu, hikur rapbei nimak. Nari beimak lalwura!”

Tangdui Chaytlou

²⁸ Tloulamya shunpi Upa khatne yeetkril heiwaya ningbine heiklei, heirou Jesu'ne Sadducee rapnung lhangaine mallangpikur heiwaya ane muwurbi Jesuei pongra hungbine kngai: “Chaytlou nam'rouwei kouni dui lung khoiyo?”

²⁹ Jesu'ne loumallang, “Namrouwei lungkhoi Chaytlouri arime louninglo, Israel! Kaiyei Dunpu Umpuri Atomngei.

³⁰ Naiyei Umpu, Dunpuya naiyei solung, nai lhawai, heirou mantrang kyaone malungshilak:

³¹ Khintamrou beimak lungkhoi Chaytlouri: Nangkou cheem kalhonbi klei rapya neimsha-neitamya malungshinakne malungshilak. Chaytlou khintam awaya duiyei lungkhoiri dei mak.”

³² Tloulamei Upani Jesu'nung shun, “Lhangaiya, Upawa! Neiyei kyun'nakne heiri chimlei, Umpu Aitamtomne Dunpu, A nimakne dei puri mak.

³³ Thimi khatne Dunpuya aiyei solung, ukning heirou mantrang namma kyaone malungshirou da; aiyei cheem kalhonbi klei rapyakhi aitamya malungshi'nakne malungshirou da. Makatna birou Dunpu'nungei khrumna anchumya heirou deidei makatnung'tlimri Chaytlou khintam heiwaya kngaak heinedui lung khoi.”

³⁴ Tloulamyei Upa heine mukheiyei tlou mallang heiwaya mubi, Jesu'ne anung shun, “Nangri Dunpuei Krungram heirouri tlamakura.” Heihillouri hukhatnekhi Anung tlou ngaingammakura.

Messiah'yei Ngamrou Kngai

³⁵ Jesu'ne Pukhrumna cheemra shunmatupiyeinung ani tloukhat kngai, “Koutounei tloulamei Upa rapne Christa heiri Davidyei yuchame toubi kyun?”

³⁶ Lhawai khyingni Davidya yunkyer: “Umpu heine keiyei Punung shun, ‘Neiyei karhouril thimi rapya neiyei hopongra khoubongyen Keiyei thya lhangra lou'ommalo.’

³⁷ David'hakni aya ‘Pu’ toubi unglei; heineri Christani koutoubi Davidyei yucha khoiyo?” Beimak chungne kartilbi klei thimi rapne Jesuei shunmatupi heiya hakraone ningbi louklei.

Jesu'ne Tloulamei Upa Rapnung Muyerkna

³⁸ Ane yanung shunmatupi, “Linglik chulya nabine, miya rikrai khrumyerbi, keithil kantangra karwaichabi klei tloulamei Upa rapya mukheine thilak,

³⁹ heirou yane Pukhrumna cheem kantang, thimichung chak-khangna kantangra, omna lhangaiyei chounaratom omkni.

⁴⁰ Yane trulmei rapbei cheemya rampha lunglouheibi mihangra toukarsabi Dunpuya buchayeinungri tlani buchalei. Heirouri nam'rouwei duine yarap heine Dunpuei manchopi pharouso!”

Trulmeiwiyei Tuy Makat

⁴¹ Jesu'ne Pukhrumna cheemrei tuyphu pongra ombine thimi rapbei tui laklhakya thithungbi louklei; heirou dun thimi kounakne tuy beimak chungne laklhaklei;

⁴² heirou kanring-kanwang trulmei khatnekhi hungbi koriyei tuychui mraocha khintam hunglaklhakur.

⁴³ Jesu'ne Aiyei ruishik rapya pulne ungkartilbi shun, “Keine nanungei shunlei, kanring-kanwang trulmeiwi ane deirouwei duine makatlei.

⁴⁴ Heiyei ngamri deiyei makatri yaiyei maleikurya makat, heiya kanring-kanwang napuiyane makatkuri aiyei kleicha namyerwaya makatlei.”