MALACHI 3 - KHYINGEI PU'TLOU Bible (BSI)

¹ “Thilak, Keine Keiyei paocha thimi yenmalhetrou, heirou ani Keiyei maibongra lamtlun loumarshikrou; heitoubi naiyei rapha Pu Dunpu heiwane Aiyei Pucheemra loumuthungmakni yongchangeirou; heirou naiyei ukningra malungamne ningchabi klei lhangaiyei tlou mardingpi Pu, Paocha thimi heiwakhi yongeiroume,” toubine Thangwan-Shimleiyei Pu Umpune shunlei.

² Heiya hune Aiyei yongrou kyou tlainiya loungaakchangrou? Heirou Ane yongeinung huni Aiyei maibongra loumayungchangrou? Ngamri A heiwari thirsheemna pungshangrei meinaksi, heirou phishu thimiyei sapor naksi hoirou.

³ Heirou Ane thirsheem lhangsha naksi ombine, heitoubi Levi'yei chanao rapya lhangshane thirdee kangsouyerbi kulshan heirou sina khyingya shungthutkur heinaksine marthingyerpirou; heitoubi yani Umpuei bomra tharmu chimmei makat putrap urlhakbine wachangeirou.

⁴ Heiyanungri bongei waiyoubi loutoukhou Puwatlhou naksine, Judah'le Jerusalemei thimi rapni Umpunung makat putya malanbine Aya malung pilkyer hoirou.

⁵ “Heirouri Keine nai maibongra mayungbine naya pichar tourou. Lhangaimak thuiur thimi rapya, napuiya napawa chorit naimak thimi rapya, klalni tlou kantomkur thimi rapya, lhou churyerbi klah-manya nammangpikur thimi rapya, trulmei rapya heirou saracha rapya manthapimakni mareknapi thimi rapya, miram-mithril thimi rapya marhotpi thimi rapya heirou Keiya chi-rikraimak thimirap nammaya Keine tloumayungpi khoine yukthrillou” toubine Thangwan-Shimleiyei Pu Umpune shunlei.

UM rui Kanei lhou

⁶ “Kouweiyo toulanungri, Keiri Umpu, Keiri chutnaimakei Pu. Heingamei Jacobei chanaorap nayari himaangyerkhoumak.

⁷ Naiyei nutar-patar rapbei chaanrouwei waiyoubine nari Keiyei chaylam rapya chanthungmakni, heirap rouwei mai khreithutdurbi chawurkhou. Keinungei yenkallengalo, heiyanungri Keine nanungei kallenglhakrou,” toubi Thangwan-Shimleiyei Pu Umpune shunlei. “Heiya nane, ‘Kane koutoubi Neinungei yenkallengrou?’ toubi nane yunlei.

⁸ Thimine Dunpuya muchakur manerouko? Heisiyanungkhi naneri Keirouwei muchabine leilei. Heiya nane yunthulei, ‘Koutoubi kane Neiya muchakuro? Heiwari nani Keinungei Umrui, heirou malanput makatnara muchalei.’

⁹ Naidoura manchokur leiyura, ngamri nanekhi heirou naiyei limrap nammanikhi Keiya muchabine leiyura.

¹⁰ Nane naiyei pibomthuk Umrui heiwari reelmakni(chiremakne) namma chakeira heimarpeilhaklak; heiyanungri Keiyei cheemra chaanung-mainungei leraone heirou marthumni leirou; heisi toubine nane Keiya chaangh tirithilak,” toubi Thangwan-Shimleiyei Pu Umpune shunlei. “Heirou Keine Thangmunei cheemkhar latbine heitoubi nane loudongnanungei changmak ramphane Keine naidoura phor shungsundabi pimakleikou louthilak.

¹¹ Heitoubi naya marhotkur rapya Keine rakrou, heiyanungri yani naiyei trunwai rapya kontummakarou heitoubi naiyei yekulrei darkha heikhi rongtlungmakni trulkur toukhi makrou,” toubi Thangwan-Shimleiyei Pu Umpune shunlei.

¹² “Heirouri lim kantangne nayari likarsui lhangairap toubine ungrouwa, kouweiyo toulanungri, naiyei ram awari nungkngaine bilthimkur ram hoirouwame,” toubine Thangwan-Shimleiyei Pu Umpune shunlei.

¹³ “Nane Keiyari thuithini yunlei,” toubi Umpune shunlei. “Heiya, ‘Kane koutoubi Neiya thuithini kyunno?’ toubi nane yunlei.

¹⁴ Nane kyun, ‘Dunpuei watlhouya toubine kouya tounarouwo? Heitoubi Aiyei chaytlouya hil-chanthungbi kouya tungcharouwo? Heirou Thangwan-Shimleiyei Pu Umpuei maibongra kaiyei toukur heiri lalwurame toubi kanrelne chapbi shunchanungei bomri kou kleiyo?’

¹⁵ Heirou asinung kaiyei kmuri: ‘Tangcha thimi rapkhi nungkngaine paallei, heirou khril lhangaimakne lhoutou thimi rapkhi heisi katduilhakthil nimakne, yane Dunpuya chaangh thibikhi, yari kartleiwurlei.’ ”

¹⁶ Heirouri Umpuya chi-rikraine cha thimi rapne khatle khat yunkril, ‘Umpune Aya chi-rikraine cha thimirap, heirou Aiyei minya uklum thimi rapbei shuncha-buchakurya ninglhakpilei, heitoubi Aiyei maibongrei klei ningthutnanungei lailikra yaiyei min rapya mayelhakpilei.’

¹⁷ Thangwan-Shimleiyei Pu Umpune shunlei, “Yari Keiyei thimirap, Keiyei lhoutouni tlainirouri yari Keiyei khalthutkur lilkhoi thimirap hoirouwa; heirou aiyei pawaya wattoupi chanapawa heiwaya pawani kringpi heinaksine, Keinekhi yayari kringpibi yaya kalpirou.

¹⁸ Kheen heirouri nani tharmu chim thimile lhangaimak thimi rapbei kartlikril khaithutkur heiwaya mupharou; heitoubi Dunpuya watlhou tou thimile Aya watlhou toumak thimiyei tlakra kartlikrilkhi murouwa.”