MALACHI 2 - KHYINGEI PU'TLOU Bible (BSI)

¹ “Asinungri louningpilak, O Suipi purap, awari nanungei yukshunpikur chaytlou.

² Kounakpi nane heiwaya ninglhakpimakni, heirou naiyei ukningra tlou khoine loulhakbi, Keiminya rikrai khrumnamakanungri, Keine naidoura manchorouwa, heirou naiyei phorkhi Keine manchorouwa,” toubine Thangwan-Shimleiyei Pu Umpune shunlei. “Heirou tanghakneri heirapbei doura Keine lamkrine manchowurla, ngamri nani Keiyei chaytlou rapya ukrei tlou khoine loulhakhoumak.

³ Thilak, Keine naya yu-cha ranyermakrou, heitoubi naiyei mairungra dee teiphangrou; naiyei makatkur ui-waa rapbei deeya teiphangpirou; heirouri nai mairungra dee popni naya mini ruilouheirou.

⁴ Heirouri Keine chaytlou heiri nanungei yenmalhetpikurme touri nane murouwa; heitoubi Keiyei mardingpikur tloukantom heiwakhi Leviyei doura kleime toukhi nane murouwa,” toubine Thangwan-Shimleiyei Pu Umpune shunlei.

⁵ Anungei mardingpikur Keiyei tloukantom heiwari khring chaanle kying heiwari; heirou Keine anungei heiwaya mardingpiwurnei ngamrou, ane Keiya chi-rikraikhou; heirou ane Keiminya chi-rikraine khrumkhou.

⁶ Heirou chimmei ayilya aiyei murne yunthutlei; heirou aiyei yunthutnara klal yaomaklei; heirou ale kasiyei tlakra kyingni heirou ukning yengne khatsi khoine leimalkna; heitoubi thimi deiyakhi lhangaimak lhourouwei lhangainara ukning hol'lhakyerlei.

⁷ Ngamri Suipipuei murne tharmu chimmei roushing tlouya yunthutrou da; heirou thimi rapne aiyei murrouwei chim tharmuei tlouya rapharou; ngamri a heiwari Thangwan-Shimleiyei Pu Umpuei paocha thimi khatme.

⁸ Heiya nari lam lehne chawurchiya; heirou nane thimirap kounakya lam tamungyerwurla; nane Levi'nung mardingpikur tlou kantomya toubaiwurlame toubine Thangwan-Shimleiyei Pu Umpune shunlei.

⁹ Heineri nane Keiyei kyun tlouya chanthungmaknei ngamrou, heirou nani Keiyei chaytlouya shunmatupiyei kheenroukhi khalcha-khalthel naiyernei ngamrou Keine nayari thimi rapbei maibongra yapimakarou.

¹⁰ Ka nammaya pa khatni pukpikhou nimakka? Heirou ka nammaya Dunpu khatdei sheempikur nimakka? Heiyanungri koutounei kaiyei nutar-patar rapbei mardingpikhou tlou kantomya toubaibine, teinaorap khatle khat mantharilmakya koungameiyo?

¹¹ Judah'ya malungamkna makkura; Jerusalemra heirou Israel rapbei hangra machinknayei lhoune thimmura; ngamri Judah'ne Umpuei malungshi'kna Pucheemya marmokyerwurla; heitoubi yani thrailha rapya khrum thimi rapbei chanao rapya nu khoine lourilwurla.

¹² Heinaksi lhouya toukur thimirap heiyari, tang thimirap hoiyasu, mandi thimirap hoiyasu, yayari Jacobei shullamrei thadtatdurou; heitoubi yayari hanui kallengne Israel rapbei Puwatlhoura yaoyermakrou.

¹³ Heirouri nane asitoubikhi touwurthula; Umpuei khrahpalya nani kalletchane-ungraochabi chapnei mityuine thimyerwurla; kouweiyo toulanungri, naiyei makat putrap heiri Ane naya yapibi loulhakpi toukhi makkura.

¹⁴ Heisiya hoiyanungkhi, ‘Koungamei Ane loulhakpimako?’ toubi nane kyun. Ngamri nangne msha douwei kaalnung yarilbine tlou kantomrilbi loulhakhou nu hoiyabikhi, neiyei nule nakhuntayei tlakra malungamknaei mri khourilmakur heiwaya Umpune mulei.

¹⁵ Dunpune naya sharung'rakhi lhawai'rakhi khattom khoine sheempikur nimakka? Heiyanungri Ane nairouwei kouya hoiyerkni? Dunpuya chi-rikrai chanao rapya Ane nairouwei shunyerkni! Ngam heineri nani ai'aiyei msha douwei kallei lourilkur nu rapya malungamkna makne karhayei lhou tourilmakniyasu.

¹⁶ Kouweiyo toulanungri, Israellei Pu Dunpu, Umpune kyun, “Nu karkhainei lhouri Keiri machinkna. Ngamri heinaksi lhouri aiyei rillei lhangaimak lhouya makhubphopbi khounaksi. Heinaksi lhouri Keiri yanimak,” toubine Thangwan-Shimleiyei Pu Umpune shunlei. Heineri nane nainaiyei ukningra malungamkna makkei lhou touya toumakniyasu.

¹⁷ Naiyei yunthutkur tloutlang rapne Umpuya lhawai lahyerwurla. Heiya nane yunthulei, “Koutoubei kane Aya lhawai lahyerkurro?” Naneri atoubi yunthulei, “Lhangaimak lhoutou thimi kantangri Umpuei mit'thrilnara lhangailei, heirou Anekhi yayari malungshilei.” Nimanung naiyei kngairi, “Tharmu chimni pichar toupikur Dunpuri koura leileiyo?”