LUKE 23 - KHYINGEI PU'TLOU Bible (BSI)

Jesu'ya Pilate'yei Maibongra Urthutkur

¹ Heirouri thimi nammane kanthoubi Jesu'ya Pilate'yei maibongra heiruilhakkur,

² heitoubi yane Jesuei doura khingbaangbine tlouyunkur: “Napawa awane kai thimi rapya lam tamungyernei ngamrou kane aya mankur, Ane kaya Rome'yei Krung Caesarnung khulrui kabomthuk heiyakhi piyermakne mankanbi leilei, heirou ai'msha aitamya Krung Messiahme toubine yunlei.”

³ Heirou Pilate'ne anung loukngai, “Nangri Jehudia rapbei Krunghako?” Jesu'ne loumallangkur, “Neiyei kyun heiwariya.”

⁴ Heirouri Pilate'ne Suipi punungle, heirou thimi dei rapnung kyun, “Keine napawa aidoura koukhatkhi klal phamaklei.”

⁵ Heiya yane duine mantonbi kalni kyun, “Ane shunmatubi marnopinei ngamrou, Judeaei ramrakhi, Galilee ramrakhi heirou bi arouwei phane, thimi rapbei hangra kying koukhatkhi makne plangura.”

Jesu'ya Herodyei Bira Heihilkur

⁶ Heirou Pilate'ne heitoubi kyunya mayeknarou, ane loukngai, “Napawa ari Galilee'reiko?”

⁷ Heirouri Pilate'ne Jesuri Herod'ne Krung hoibi klei ramrei thimime toubi munarouri, ane Jesu'ya kheen heirou Jerusalem'ra klei Herodyei bira heimalhetkur.

⁸ Heirouri Herod'ne Jesu'ya loumunarouri beimakne haraokur, ngamri kheen kounakei maibongrei Herod'ne Jesuei ngamrou mayekkur, heitounei ngamrou ane Jesu'ya beimakne murilknine louklei. Arouri aiyei mayekkur heinakne anungei kngakei lhou rapya mupharouwa toubi beimakne malungamkur.

⁹ Heitounei ngamrou Herod'ne Jesu'nung tlou chungne loukngai, heiya Jesu'ne aiyei loukngai tlou rapya koukhatkhi mallangpimakur.

¹⁰ Heirou Suipipu raple, Tloulamei upa rapne maibonglhangra polhakbine, heirou yane Jesuei doura theibaangnei tlou rapya beimakne yunkur.

¹¹ Heisi tounarouri Herod'le heirou aiyei raallui rapne Jesu'ya machinknaei tlouya yunbine beimakne laonakur; heirou yane Aya lhangaiyei linglik chulkhat nabangpibi heitoubi Aya Pilate'yei leinara hanui hilmallengkur.

¹² Tlaini heirouwei waiyoubine Herodle Pilate yakhuri beimak karnakril palui hoikur, heiya tirnungri yakhuri beimakne karhourilkhou.

Jesu'ya Hatnanungei Tlou Dakur

¹³ Heirouri Pilate'ne Suipipu raple ruipi purap heirou thimirap deiyakhi ungmartilbi,

¹⁴ kyun, “Napawa ane thimi rapya lam tamungyer thimime toubi yunbine nane keileinara heiruilhaklei, heiya nai kyunnakne keine napawa heiya tloudarbi ngaithinarouri, aidoura klal koukhatkhi phamaklei.

¹⁵ Heitoubi Herod'nekhi aidoura klallei lhouri koukhatkhi phamakme toubine yunlei, heitounei ngamrou ane keileinara hanui heimalhetthulei. Heineri napawa aya hatkur kyaei klal lhoubom koukhatkhi ane toukhoumaklei.

¹⁶ Heine keine aya ummurbine malhetrouwa.”

¹⁷ (Pilateyei youkna hoini Ralthutpinei Kumtlun tlainiserou kulrilla chalphopbi klei thimi rapya napung khatyari malhetthutpikur.)

¹⁸ Heisi tounarouri thimirap nammane heiungraokur, “Napawa heiyari hatnungei pithutlak, heitoubi kanungeiri Barabbas'ya malhetthutpilak!”

¹⁹ (Barabbas toubi ung napawa heiri Jerusalem heirou thimi rapya marhotbi, thimihat thimi, heirou mucha-mu'kmaiyei lhou tounara kyao napawa toubine manbi kulla chalphopbi khoukur thimikhat).

²⁰ Pilate'ne Jesu'ya hatmakne malhetninei ngamrou ane thimi rapnung hanui kallengne buchakur.

²¹ Heiya yane lou'ungraobi kyun, “Aya manyarhatdurlak! Aya manyarhatdurlak!”

²² Pilate'ne khyumbui tlungne yanung buchakur, “Heiya ane kouklal lhouya touwurkhoulawo? Keineri aidoura hikur kyaei lhouri koukhatkhi phamaklei! Keine aya um'phityerbine heitoubi aya malhetrouwa.”

²³ Heiya yane beimakne houchouni ungraochabine, Jesu'yari hatlak toubi kyun, heitounarouri yai hei'ungraokur heiwane manekur.

²⁴ Heitounei ngamrou Pilate'ne yai kning heiya hoiyerpirouwa toubine Jesu'ya hatnungei tlou dakur.

²⁵ Khulbungei thimi rapya plangyer, heirou thimi khatme toubi manbine kulla chalphopbi khoukur napawa heiya yai kning hilthungne aya malhetpikur, heitoubi Jesu'yari yane toukniya toulakalo toubi yaihutra pithutkur.

Jesu'ya Manyarhatkur

²⁶ Heitoubi Rome sipai rapne Jesu'ya ruilouheila, heirou yane heisi chayeinung, Cyrene ramrei Simon toubi ung napawa khatne Jerusalem Khukarthil'ranung wanarou rorillurbi, heirou yane aya churmankur heitoubi aidoura Cross khangbangpiwurbi, heirou Jesuei hilla chungbi chanthungkur.

²⁷ Bi heirou thimi chungne heichanthungkur, heitoubi yaihangra napuiya thane anung'tlim beimak lhawai klahne kanrelne chapbi heichanthungkhi kyao.

²⁸ Jesu'ne yailhangra kallekbi kyun, “Jerusalem'rei napuiyarap, Keinung'tlimri chapmaklo, heiya nanung'tlim heirou naicha-nainaonung'tlimya chaplaklo.

²⁹ Ngamri thimi rapne atoubi yunyei kheen hungeirou touri, ‘Chanao tlamakne, nao pomkhoumak napuiya rapri likarsui-lhangailei!’

³⁰ Heiyei kheen hungeinung lhungdou rapya, ‘Kaidoura nanphopburlaklo,’ heitoubi lhungchou rapnungkhi, ‘Kaya bei loumalepilaklo!’ toubi yunheirou.

³¹ Heengna-rona rapne mar'emyei'nungri yane heitoubi louyulrouwa, heiya heengna-rona rapne taarranungri kousi tourouwo?”

³² Thimihat napawa napung-khnikhi Jesule pulne hatnanungei ruilouheikur.

³³ Heirouri yane ‘Calvary’ toubi ung lhungdoura wa'tlungbi, heitoubi bi heirou yane Jesu'ya hatkur, heirou mucha thimi rapyakhi, napung khatyari Aiyei thya lhangra heitoubi khatyari Aiyei thyoi lhangra manyarhatkur.

³⁴ Heirou Jesu'ne kyun, “Yaya kukpilaklo, Pawa! Yai toukur heiri kouweiyo touri yane mumakme.” Heitoubi yane meirui thirilbi Aiyei shamb heiwaya yerkhairilkur.

³⁵ Thimi rapne mayungbi ngakeinung, heirou Jehudia rapbei ruipipu rapne aya khremknane kyun; “Ane mideiyari kalpi; heitoubi A heiri Dunpuei khalthutkur Messiahme touwanungri, aitamya kalpilaksu, kane thiyase!”

³⁶ Sipai rapnekhi laonabi, heitoubi yane pokarsilbine, Anungei murra beimakne khyur yui katmalleilhakbi kyun:

³⁷ “Nangri Jehudia rapbei Krung hoiyanungri neitamya kalnalakma!”

³⁸ Heitoubi Aiyei luthakra asitoubi mayebi: “Awari Jehudi rapbei Krungme,” toubi myebine yempopbi khoukur.

³⁹ Aiyei pongra manyarhatkur mucha thimi napung khatpane khremknaei tloune kyun, “Nangri Messiah nimakeiko? Neiyakhi heirou kayakhi kalpilakma!”

⁴⁰ Heirouri napung khatne aya sambine kyun, “Nangri Ale pulne hichokkurnei tantiya phakur murerikhi Dunpuya chimako?

⁴¹ Kouwo touri kari kane klalyei lhouya touwurkhounei ngamrou khiyei tantiya phalei, heiya Ari koukhatkhi klallei lhou toukhoumak.”

⁴² Heitoubi ane Jesu'nung kyun, “Upawa, Nangne Neiyei Krungbomra tlungei kheenrouri keiyakhi malumpimakno!”

⁴³ Jesu'ne anung loushun, “Keine neinungei tanghakne shunlei, touri angturou waiyoubine nangri Keile kalhonne Paradise'ra leirouwa.”

Jesu Hikur

⁴⁴ Heirouri nunghangei trum chiple khni dalummei waiyoubine kinni kanchaihillei trum khyum dalumphane tlaipang bi karyoune katmehkur;

⁴⁵ heirou Pukhrumna Cheemmei yarkhaina phi heiwakhi pulkhni thukni cheetdura.

⁴⁶ Heirouri Jesu'ne hou chouni kat'ungraobi yunkhou, “Pawa, Neihutra Keiyei lhawai pilhaklei!” Heirou Ane heisi yunkhoubi hikur.

⁴⁷ Heirouri raallui machaei pu khatne thukkur lhou heiwaya muthungkur heirouri, ane Dunpuya mathangbi kyun, “Tanghakne napawa heiri koukhatkhi klal makne tharmuchim thimileinu!”

⁴⁸ Heitoubi bi heirou leibine thukkur lhou heiwaya muthungkur thimirap namyerwane, yai malungpak umbine lhawai klahni yaiyaiyei cheemra kallengkur.

⁴⁹ Heirou Jesu'ya shak kmu thimi raple heirou Galilee'rei Aihil chanthungkhou napuiya rapnekhi thukkur lhouthuk heiwaya tlatnara mayungbi thithungkur.

Jesu'ya Khi'krui

⁵⁰ Heirouri bi heirou Jehudiyei khukarthil Arimathea'rei Joseph toubi ung napawa khat leikhou. A heiwari lhangai heirou tharmu klei napawa khat,

⁵¹ heitoubi minekhi rikrai khrumna kya napawa khatkhi khoi. A heiri Dunpuei Krungram kyongya loukngak thimi khat. Heitoubi a heikhi Yama krung upa khat hoibinekhi, Jesuei ngamrou touthutkur heirou yai darilkur lhoubomrap heiya yanekhoumak.

⁵² Ane Pilateyei maibongra wachangbi Jesuei hikur sharung heiya wabukur.

⁵³ Heirouri ane Jesuei sharungya loushundabine, phaikhringei punshel khatne lhomphopbi, heitoubi thlungrei utlhakkur, thimi hukhatyakhi phumnamak lhanpur ran khatra phumkur.

⁵⁴ Lhou heiri Mathrilna tlaini hungbongei tuyshorni.

⁵⁵ Galilee ramrei Jesuei hil chanthungkhou napuiya rapne Josephle kalhonne wabi, lhanbomkhi heitoubi Jesu'ya koutoubi phumkurro touri yanekhi wamuthungkur.

⁵⁶ Heitoubi yane cheemra kallengurbine heirou Jesuei sharungra teiphangnungei khrim muiknam shirek hungmarshikkur. Mathrilna tlainirou, Tloulamei shunmatupi hilthungne yane mathrilkur.