LUKE 21 - KHYINGEI PU'TLOU Bible (BSI)

Trulmei Khatpiyei Dunpunung Tuy Makat

¹ Jesu'ne thinarou laldun thimi rapne Pukhrumna Cheemwaira Dunpunung makatput marpeina bomra yaiyei put makat rapya Ane muthungkur.

² Heirou Ane trulmei khatpinikhi tuypik-mrao khintamcha laklhakurkhi muthungkur.

³ Heirouri Ane kyun, “Keine tanghakne nanungei yunpilei touri, kanring trulmeiwine ya deirap nammaei makatkurya duine makatdurla.

⁴ Ngamri ya dei rapbei makatkuri yai dunnarei maleikur rapya makatlei; heiya kanring trulmei heineri aiyei kleicha namyerya Dunpunung makatkur.”

Jesu'ne Pukhrumna Cheem Bairouyounei Ngamrou Yunkhou

⁵ Heirou ruishik rapne Pukhrumna Cheemmei ngamrou, mansambangkur manklu thlungrap, heirou Dunpunung makatkur namyerwa heiya thilanung kounakei lhangai toubi yunrilnarouri, Jesu'ne kyun,

⁶ “Naiyei mitne mubi klei putchei namma, touri- thlungrap heiri dasundawurbi bi khatrou khatchatomkhi karthorilmakne leiwurnei trum hungeirouhui.”

Mrim-knang Heirou Marhotnei Klah-Knang

⁷ “Marnopi pu,” heirou yane kngai, “Heiri kouninung hoirou youleiyo? Heitoubi lhouthuk heinaksiya hungthukrou waiyouwame toulanungri kounaksi hutlhane loumurouwo?”

⁸ Jesu'ne loushun, “Kanthrambi loungaklak, heitoubi naya lam tamungyermak. Keingamrou shunmatupi thimi chungne hungthukeirou, heirou yane yunheirou, ‘Keiri Ahakme,’ toubi, heirou ‘Kheen heikhi hungtlungurame,’ toubine yunrou. Heiya nane yai hilla chanthungpimak.

⁹ Heitoubi nane raalpao heirou kngaal'ok thuknei paoya mayekbine ukningra plangurbi chiwurmaklo; lamkrini heinakei paoni hungthukrirou, heiya heinak heiwane tlaipang aya luilhaknei trum yennakkurame touneikhi nimak.”

¹⁰ Heitoubi ane daakrakhi yenyunthu, “Krungbom khatle-khat kngaal'ok thukbine raalkhi kardourilheirou, Krungbom khatne krungbom khatdei doura raalkhi daheirou.

¹¹ Heirouri beimakne chi'knayei shakrung hoini linglang khngaakhi thukkeirou, chamu-maimumaknei trumkhi heirou bi kantangrou phar-thrai knakhi thukkeirou; heitoubi nungthou lhangrei kngakei hutlhakhi chungne thukkeirou.

¹² Lhouthuk namyer heiya hungthukbongnungri naya manbi, heirou klah-knangkhi piyeirouhui: heitoubi naya Pukhrumna Cheemra urlhakbine tloukhi darheirou, heitoubi kulrilla chalphopnungei pithutdurheirou; heirou krung rapbei heirou raallui pu rapbei maibongra, keiyei minnung'tlim urthutdeirou.

¹³ Kheen heirou nane Lhangaiyei Pao-laa rapya shunthutnanungei tlakcha hoirou.

¹⁴ Nane kousitoubi tlou mallangserouwo toubine ningcha'kna leimaknung asinung waiyoubi nai lhawai lahmakne leiyalo,

¹⁵ ngamri Keine nai yunnungei tlou rapya heitoubi roukhi mukheine leiyerpirou, heirouri naiyei karhoukril thimi rapne naya thuithine marhotkur manemakrou, heitoubi nane tlou mallangnarou klalkhi dayerchangmarou.

¹⁶ Nayari nai pui-pa rapne, teinaowa rapne, nai cheemkhur-rokhur rapne, heirou nai palui rapne pithutdurheirou; heitoubi na thayari hatdurnungkhi pithutdeirou.

¹⁷ Keiyei ngamrou thimi napung kantangne naya machinrou.

¹⁸ Heiyanungkhi nai lurei shampum khatchayakhi trulyerbi maangyermarou.

¹⁹ Kanthrambi mayungalo, heitoulanungri nai chaanrou kalpi pharou.”

Jesu'ne Jerusalem Mangrou Younei Ngamrou Kyun

²⁰ “Heirou Jerusalem Khukarthil heiwaya Raallui rapne kuiphopkurya nane mulanungri, heirou Jerusalem mangnanungei trum heiri hungtlungurame toubi loumulaka.

²¹ Heiyanungri Judeaei ramra klei thimi rapne lhungdoura trukbaanglakasu; heitoubi khukarthil rillei klei thimi rapri trukthutdurlaka, heitoubi purei klei thimi rapri khukarthil rilra wachangmakasu.

²² Ngamri tlainirap heiri ‘Klah-knangei tantiyei tlainime.’ Heitoubi Khyingei Lailikrei mayelhakkurkhou nam heiya chimne tlungyernanungeime.

²³ Heiyei tlaini heirouri, ulleiyo, kouya yunserouwo! Nao urbi klei napuiya rapnungri, heirou naodou pombi klei thimi rapnungri kounakei lah'kna hoirouwo! Tlaipang doura klah-knang hoirouwa heitoubi thimi rapbei doura Dunpuei malungkha yongtlungbi beimakne mrim nangrouwa.

²⁴ Heitoubi thimi thari raalshonra hirouwa, heitoubi thimi deiyari ram deira kul chalphopnanungei manlouheirou; heirou lim deiyei thimi rapne Jerusalem Khukarthil heiwari yaichaan luibongyen tatphopbi leirouwa.”

Thimiyei Chanapawaei Yongrou Kyou

²⁵ “Heirouri kinni'rakhi, tangla'rakhi, heirou sorwa'rakhi kngakei hutlhane mutdeirou. Heitoubi tlaipangei khokul-khobung karyoune klah-knangne thim'rouwa, heirouri Samadru tangei yuilhou heine thimi rapya chi'kna hungthukyerrou.

²⁶ Thimi rapne tlaipang arou thukkur ari kouwo toubi loumunarouri chitekkurbi kanelrouwa, ngamri tlaipang-nungthou khintamei kanchekchanei mantrang heikhi makkurouwa.

²⁷ Heirouri Thimiyei Chanapawa heine ramei doura mantrangle Aiyei thang'alle albine kyong yane loumupharou.

²⁸ Heitoubi anaksi heiya hungthuknung heirou nane loumngalthilak, ngamri naya ralthutpinanungei tlaini heiri yennakkura.”

Khyudhei Trung Khatrei Marno'kna

²⁹ Heirouri Jesu'ne yanung anakei yailim tlou khat yunpikur: “Khyudhei trungle heirou heenglim namyeryakhi yukhalthilak,

³⁰ Yai heengbo heine heimchitrou waiyouwanungri, manthral hungthukame toubi nane loukmu.

³¹ Heinakrimne, heinak namyerwa heiri hungthukheirou, heirouri Dunpuei Krungram heiri yongrou waiyouwame toubi nane loumulaka.

³² Keine nanung yunlei, touri, heinak namyerwa heiri angtuei tlaipang chaanyei thimirap namma hiwurchibongnung hungthukroume touri nane ningmulaka.

³³ Thangwan heirou Tlaipang nammakhi mangeirou, heiya Keiyei tloulhang rapri maangkhoumarou.”

Karngeinungei Bom

³⁴ “Nane kanthrambi loungaklak. Heitoubi naitam khul'lhun thuknara nungrui kaei hakrao, chaa'malip-mai'malipbine heirou tlaipangei lhouyatom kardonbi leiwurmak, nimanungri loumuthungmakne tallengne naya chaangra mankurnakei tlaini khat hungeirou.

³⁵ Kouweiyo toulanungri heinaksi heiri tlaipangpal bi kantangra klei thimirap namyernung hungthukeirou.

³⁶ Nane karyom, mukheine loukarngeilak, heine hungthukrou kyou lhouthuk namrouei nane kartleikur manenanungei nane kheenserou buchalak, heirou Thimiyei Chanapawaei maibongra mayungchangnung marshiklak.”

³⁷ Jesu'ne tlainiser Pukhrumna Cheemra marnopibi leikur, heirou yenrawaikur heirouri Ane Olive lhungdoura kabine masanung yarekkur.

³⁸ Heitoubi ningshunser thimi rapne Pukhrumna cheemra wachangbine Aiyei marnopi rapya ningkur.