LUKE 2 - KHYINGEI PU'TLOU Bible (BSI)

Jesu Puknei

¹ Heiyei kumrouri Krung Caesar Augustus'ne Rome Krungkullei klei ram namyerwa heiri thimi mshing shernanungei min mayebaanglaklo toubi chay pikur.

² Anakei lamkri thimi mshing shernei kum arouri, Quirinius'ne Syria'yei Rampu hoibi louklei.

³ Heitounei ngamrou thimi napung kantangne ai'aiyei yultlaira kallengbine thimi mshing shernanungei min mayebaangnara yaokur.

⁴ Heirouri Joseph'khi Galilee ramra klei Nazareth yultlai heirouweine, Judea rammei Krung David'ya pukkhouna bi Bethlehem yulranung shaalkur. Joseph'ne bi heirou shaallurnei ngamri, akhi David'yei yu-cha khoi.

⁵ Heirouri aiyei ngaimankhou Mary'le kalhonne thimi mshing shernara yaiyei minkhi mayebaangna'nungei shaalkur. Kheen heirouri Mary nao urbi klei.

⁶ Heirouri yane Bethlehem'ra wa'tlungeinung Mary'ri nao puknei trum hungtlungura.

⁷ Heirouri ane aiyei chanapawa shamran pukurla, heitoubi yundarni lhomphopbi, halchaak lhakna theengkungra phneibi khouwurla, ngamri bi heirou yane tlungnanungei cheem khatchatomkhi dingmakura.

Yaosil Thimirap Heirou Thangringrap

⁸ Heirouri yulthung heiyei mnak khatra, bi khatrou yaosil thimi rapne ramhangra masanung yaiyei yao rapya chakngakbi louklei.

⁹ Heirouri Thangring khatne yanungei muyerbi, heirou yaidoura Dunpuei thang'alne yuk'alpikur. Heisi tounarouri yari beimakne chikur.

¹⁰ Heirouri thangring heine yanung shun: Nari chimak! Kouweiyo toulanungri, keine nanungei lhangai pao shunpinung leilei, heirou pao heine thimi namyerwaya beimakne haraoyerrou.

¹¹ Ngamri angtuhak David'yei Krungkulla Pu Christa, naiyei Kalpipu khat pukkurla!

¹² Heirouri nanungei asitoubi muyerrou: “Nane naoshun khat yundarni lhombi, halchaak lhakna theengkungra phneibi louklei wamupharou.”

¹³ Heirouri tallengne Thangmunrei Thangring rapne kartilbi Dunpuya mathangnei laaya shabine, atoubi kyun:

¹⁴ “Thangmunra Dunpuei thang chouni alniyasu, heirou tlaipang dourakhi Aiyei malungkhrah thimi rapnungei kying hoiniyasu!”

¹⁵ Heitoubi Thangring rapne yai maibong'rouwei Thangmunra kallengkur, heirouri yaosil thimi rapne yaitam yunkril, “Kane Bethlehem'ra wabine, bi heirou thukkur heiya, heirou Dunpuei kanungei shunpikur heirapya wathiyase!”

¹⁶ Heisi toubi yane khnotni wabine thinarouri, heirou Mary'le Joseph, heitoubi naoshun heikhi halchak lhakna theengkungra phneibi loukhou heiwaya yane wamukur.

¹⁷ Heirouri yaosil thimi rapne aya wamukur heirouri, Thangringne yanungei naoshun heiyei ngamrou shunpikur heiwaya Mary'le Joseph yakhunung wayunpikur.

¹⁸ Heirouri yaosil rapne pao heiya shunpinarouri, heiwaya mayek thimirap nammane ngakkur.

¹⁹ Maryne yai kyun tloubom namyerwaei ngamrou, heitoubi yaiyei ngamroukhi ukningra khyukne ningchabine leikur.

²⁰ Heirouri yaosil rapne yaiyei mayekkur, heirou yanungei muyerkur namyerwa heinung'tlim yane laa shabi Dunpuya mathangbi kallengkur; ngamri Thangringne yanungei yunpikur heinakrim thukkur.

Jesu'ya Min Phukpi

²¹ Heirouri tlaini chotni hungtlungkur heirouri, douwa heiya sermur dinnanungei trum hungurnei ngamrou, aiyei min heiri Jesu toubi phukpiwurla, aiyei min heiri aya urbongei waiyoubi Thangringne shunthutpiwurkhou.

Jesu'ya Pukhrumna Cheemra Makatkur

²² Heirouri Josephle Mary yakhu-shangramni Moses'yei Tloulam hilthungne, yaiyei youkna khoine cheem marthingthutnei trum hungtlungurnei ngamrou, heirou yane nao heiya Dunpunung makatnungei Jerusalem'ra katruiheikur.

²³ Heirou Dunpuei Tloulamra asitoubi mayebi leilei: “Chanapawa samran'mkhei Dunpunung makatrou da.”

²⁴ Heitounei ngamrou yakhu shangramnikhi Dunpuei tloulam hilthungne, ram-mathru pukhatle, nimanung cheem-mathru pukhatya khrumna put khoine makatnungei toubi Jerusalem'ra kat'heibine kakur.

²⁵ Heiyei kheenrouri Jerusalem'ra Simeon toubi ung napawa khatkhi leikhou. A heiri beimakne lhangai, heirou Dunpuya chini chabi klei napawa khat, heirou ari Israel thimi rapya kalpi phayerknine loukngaak napawa khatkhi hoikhou. Heirou Lhawai Khyingne aya kalhonpibi klei thimi khat.

²⁶ Heirouri anungei, ‘Dunpuei kantompikhou Messiah heiwaya aiyei mitne muphabongyen ari himakeirou,’ toubi kandangyerpikur.

²⁷ Heirouri Simeonya Lhawaini ruibi Pukhrumna Cheemwaira wachangkur, heirou Tloulamei youkna hilthungne Puei watlhou tounanungei puile-pale naocha heiya Pukhrumna Cheemwaira heilhaknarou,

²⁸ Simeon'ne naoshun heichaya aihutne loukhaangloubi, heirou Dunpuya mathangkur:

²⁹ “Asinungri, Dunpu, keinungei Neiyei tlou kantompikur heinakne, heirou neiyei shok keiya kyingne shaalyerlakalo.

³⁰ Arouri keiyei mit'hakne heiyei Ralthutpina bom heiwaya muphawurla,

³¹ Nangne thimi namyerrei maibongra marshikpikur heiwaya:

³² Lim deinungkhi Neiyei kningya mutthutnanungei kwaarya, heirou Neiyei thimi Israel rapya mathangei bomra ruilhakpinanungei mantrang pikur heiri namyer muphachila.”

³³ Simeon'ne naoshun heiyei ngamrou kyunya puile-pawane mayeknarouri, beimakne ngakkur.

³⁴ Heitoubi Simeon'ne yakhu-shangramya phor pibi, heirou aiyei pui Mary'nung atoubi shunpikur, “Naoshun ari maangkur Israel rapya fyoukanthounanung, heitoubi ralthutpinanung toubi Dunpune khalthutpikur naoshun khat. Heirou a heiri thimi rapne yanimakne yunmareknungei Dunpurei hutlha khat.

³⁵ Heirouri ane ukningrei muei klei rapkhi mutthutpirou. Heirou yai ukning heikhi shonkhyaangne khrulkurnakne hoirou, heitoubi naiyei ukningkhi ane khrulheirouhui.”

³⁶ Heitoubi kheen heirouri beimak tarkur Anna toubi ung trulmei Thimkhuiwi khatkhi leikhou. A heiri Asher cheemkhurrei Phanu-el'yei chanapuiya.

³⁷ Napuiya heiwiri aiyei shaalle kum-enitom leikalhonkhou, heirou asinungri aiyei kum somshrile-phali tlungura. A heiri Pukhrumna Cheem'rouwei tekchakhi pochutmakne, masa-nunghang naimakne, cha'kmai ngeibine Dunpuya khrumchabi leikhou.

³⁸ Heirouri trum heihakrou anekhi wachangbine, Dunpuya mathangkur, heirou Jerusalem'ya lhukthutyerknine ngaakbi klei thimirap nammanung douwa heiyei ngamrou yunmatupikur.

Nazareth'ra Yenkallengkur

³⁹ Josephle Mary'ne Dunpuei Tloulamei youkna namyerwa heiya luilhakhoubi, yane Galilee'ra klei yaiyei Nazareth yullei cheemra yenkallengkur.

⁴⁰ Heitoubi douwa heiri tangthutbi heirou thangkhi thukkura; heitoubi douwa heiri mukheine thimmura; heirou Dunpuei phor heiri aidoura bilthimne leipikur.

Napawa Douwa Jesu'ne Pukhrumna Cheemra Louklei

⁴¹ Kumserrei Jesuei pui-pane Jerusalem'ra Ralthutpina Kum tlunnara kayaokur.

⁴² Jesu'ne ai'mshaei kum chiple-khni hungtlungkur heirouri yane haalleinakne Ralthutpina tlainiyei markhulnara yaorou kathuwa.

⁴³ Tlaini heiyei markhul heiya luilhakurbi, yane cheemranung yenkallengkur, heiya napawa douwa Jesu heiri Jerusalem'ra heileithungkur. Heileithungkur heiwari aiyei pui-pa rapne mukhoumakur;

⁴⁴ heirou douwa heiri aiyei palui raple kalhonne lamkrini louchawarou toubine ningchakhou, heitounei ngamrou yane tlaini heiyei nunghangfchip lam tlabine, heiyei hillouri yane karnakril thimi rapbei hangrale, aiyei palui-lingthrallei hangrakhi thiphayoukur.

⁴⁵ Heirouri yane aya rapha'mumakura. Heitounei ngamrou yane Jerusalem'ra hanui wa'tlungkur.

⁴⁶ Heirou yane douwa heichaya Pukhrumna cheemwaira, ane Jehudiyei upa raple kalhonne ombine, heirou yai marnopi rapya ningbine, heirou yanungei tlou ngaibine louklei yane wamukur.

⁴⁷ Heirouri aiyei mukheiyei tlou mallangkur heirapya mayek thimirap namyerri beimakne ngakkur.

⁴⁸ Aiyei pui-pa rapne aya wamunarouri yane ngakkurbi, aiyei puiwine anung shunkur, “Keicha-samranwa, kounungei nangne kanung asi toukurawo? Neipa kakhuri neiya raphanarou beimakne lhawai lahwura.”

⁴⁹ Heirouri ane yanung loumallang, “Kounungei nane keiya raphakurawo? Keine Pawaei Cheemra leiroume touri nane mumako?”

⁵⁰ Heiya ane heitoubi loumallangkur heiri yane mumakura.

⁵¹ Heisi toubine Jesu'ne yale kalhonne Nazareth'ra kallengkur, ane bi heirou yai shunya hilthungne leikur. Aiyei puiwine thukkur lhourap namyerwa heiya aiyei ukningra marpeibi khoukur.

⁵² Jesu'ne sharungrale heirou Aiyei thangrakhi khintamrekpa Dunpule heirou thimi rapbei kar'ullei mathangpile kalhonne tangthutkur.