LUKE 19 - KHYINGEI PU'TLOU Bible (BSI)

Jesu'le Zacchaeus

¹ Jesu'ne ramdeira chayeinung heirou Ane Jericho'yei khukarthilra yenkraal.

² Heitoubi bi heirou Zacchaeus toubi ung, Ruithou thimi, dun napawa khat louklei.

³ Heirou ane Jesu touri kounaksi thimiyo toubine thi'kni, heiya a heiri khnim thimi hoinei ngamrou, thimi chungna tlakra Jesu'ya muphachangmakur.

⁴ Heisi tounarouri ane thimichungya lhaduiyurbi, heirou khyudheitrung doura loukakabi Jesuei yenkralya louthithungkur.

⁵ Heirou Jesu'ne bi heitamrou wa'tlungkur heirouri, Ane kat'thibi Zacchaeus'ya katshun, “Khrangni yongchumma, Zacchaeus, ngamri angturi Keine neicheemra yarekrouwa.”

⁶ Heirouri Zacchaeusni khnotne yongchumbi, heitoubi ane hakraone Jesu'ya louchanrokur.

⁷ Heirou thimi rapne heiya muthungnarouri yane yunkril, “Hei thimiri borh napawaei cheemra polhakbi tlungrou youleinu!”

⁸ Heirouri Zacchaeusni mayungbi Upawanung kyun, “Thilak, Upawa. Keine keiyei dunbi klei lal arouwei lhang khatri kanring thimi rapnungei yerpiwurlei, heitoubi keine kounaksi thimi khatya minambine louwurlanungri, anungei keine siruk phali bilkhi mallenglhakpirou.”

⁹ Heirou Jesu'ne anung kyun, “Angturi cheem aroukhi ralthutpina tlaini yongura, ngamri cheempu akhi Abrahamei yu-cha khat.

¹⁰ Thimiyei Chanapawa heiri maangkur thimi rapya raphathutbi kalpinanungei yongpi.”

Sina Tuychui Rapbei Ngamrou Yailim

¹¹ Thimi rapne kyun heiya louningeinung, Jesu'ne heisi yenkyun, heitoubi Ane yanung yailimei tlou khat kyun, ngamri A heiri Jerusalem'ra wa'tlungrou youwa, heirou thimi rapne Dunpuei Krungram heiri tallengne yongkanrerou'nakrimne ningchawurnei ngamrou ane yanung heinakkei yailimya yunpikur.

¹² Heirou Ane kyun, “Bongnung bomtang thimi khat leikhou, heirou ane Krungbomya phabine cheemra yenkallengthunung toubi marshikkur.”

¹³ Ane aicheem lakurkhoubi chabongnung, aiyei shokrap napung chipya ungmarkumbi, heirou ya khatsolnung sinayei tuychui khatsol yerpibi yanungei tlou shunkhou, “Keine ramdeira chawurbi yenkallengbongnang nane a'tuy rapya lal kounakchung holthutbi tungyerlei thilak.

¹⁴ Heiya aiyei thimi rapne aya machinpinei ngamrou yane aiyei hilthungne paocha thimi khat heimalhetthungbi, kyun, ‘Thimi heiyari kaiyei Krung hoiyernimak.’

¹⁵ Napawa heine Krungbom phakur hillou ane cheemra yenkalleng. Heirouri ane sinayei tuychuiya yerpiwurkhou shok rapya, ane ramdeira chakur hillou lal kounak chungne holthutbi tungyerlawo toubi thininei ngamrou tallengne aiyei maibongra urthutbi mutnanungei ane chay pikur.

¹⁶ Lamkriyei urthutkur shok heine kyun, ‘Cheempuwa, keine neiyei pikhou tuychui khatcha ane lal holthutbine chiptam khatkhi tungyerla.’

¹⁷ Heirou ane shok heiwaya kyun, ‘Beimakne lhangaiyura, nangri lhangai shok khat hoilei! Nangne put mandicha khatroukhi lhou khoine toupinei ngamrou, keine neiya khukarthil chiptamei doura thikulyerrou.’

¹⁸ Heiyei hillou khintamtlung shok heiwane urthutbine kyun, ‘Upawa, keine neiyei pikhou tuychui achane tuychui phangatam khatkhi lal holthutla.’

¹⁹ Khintamtlung shok heiyakhi ane kyun, ‘Heitoubi neiyakhi khukarthil phangatamei doura thikulyerrouwa.’

²⁰ Heirouri shok khatpane wathukbi kyun, ‘Upawa, Nangne keinungei pikhou tuychuiri arime; keine aya phichunni yumphopbi karbilni yulkhoukur.

²¹ Nangri beimakne klu thimi, heingammei keine neiya chi'kna. Nangri neiyei nimakyakhi loukhei mane thimi, heitoubi nangne tuklhak khoumakyakhi lukloukhei mane thimi.’

²² Heingammei ane shok heiwanung shunkur, ‘Nangri yrathi shok hoileime, neiyei yunthutkur tloulhangrap heine neiya Keine klal dayerrou! Keiri klu thimine toubi nangne muleinu! Keiput nimakyakhi Keine loukhei maneleinu! Heitoubi Keiyei tukkhoumak trunwaiya Keine lukloukheinu?

²³ Heiyanungri lhangaiya, Keiyei tuychui heiya mallongkhouna cheemra koutounei nangne khoulhakmako? Heisi toulanungri Keine yenkallengnung Keiyei tuy heiri khingdui kyaone pharou.’ ”

²⁴ Heirouri Ane bi heirou mayungbi klei thimi rapnung kyun, “Aihutrei tuychui heiya lunglouheibine, tuychui chiptam klei napawa heinungei piwurlaka.

²⁵ Heiya yane loumallang, ‘Upawa, napawa heiwaeiri halleikhi tuychui chiptam leileihui!’

²⁶ Ane kyun, ‘Keine nanung tanghakne yunlei, klei thimi heinungri marthumni pirou; heiya koukhatkhi mak thimi heinungri, aiyei thacha klei hei ramphakhi louthutdurou.’

²⁷ Arouri, Keiya yaidoura Pu hoiyernimaknei ngamrou, Keile karhouril thimi rapri, bi arou Keiyei maibongra urlhakbi yaya hatlaka!”

Jesu'ne Jerusalem'ra Wachang

²⁸ Heirou Jesu'ne tlou heiya yunbine, heirou Ane Jerusalem'ranung yaya tladuiyurbi louchakur.

²⁹ Ane Bethphagele Bethany khukarthil rapbei pongra Olive lhungdoura wa'tlungeinung, heirou Ane ruishik napung-khniya shunmatubi maibongra louhilkur:

³⁰ “Nane nai maibong lhangrei louklei yulthungra wawalo; heirou nane bi heirou wachangeinung, mine tekchakhi tungnamak sapuk-shuncha khat msuikhoubi klei nane wamurou. Heichaya nane ruy sutdurbi ara yentangheilak.

³¹ Heirou hukounak khatne naya koutounanungei sutkurrawo toubi loungaithunglanungri, ‘Upawane Aiyei leinara yentangheilo toubi shunlei’ toubi loumallangpilak.”

³² Heitoubi hilkur thimi rapne wanarou, Ane shunmatuthungkur namyer heinakrimne louklei.

³³ Heirou yane sapuk shuncha rui msuikhounarei sutbine louleiyeinung, cheempu heiwane yanung washun, “Kouya tounanungei nane sapukshun heiya rui sutkurrawo?”

³⁴ “Upawane yentangheilaklo touneime,” toubi yane loumallangkur.

³⁵ Heitoubi yane sapukshun heiya Jesu'nung yentangheikur. Heirou yane heiyei doura yaiyei phi'up rapya hupbaangbine, heitoubi Jesu'ya doura omyerkur.

³⁶ Heitoubi Ane doura ombine heitungeinarou, thimi rapne yaiyei punshel rapya lamtlaira myerbi loulamkur.

³⁷ Heirou Ane Jerusalem pongra, Olive lhungdourei lamsora wa'tlungkurouri, aiyei ruishikrap nammane yai mitne mukur lhoubom namei ngamrou yane houchouni paobine Dunpuya mathangkur:

³⁸ “Puei minra wachangbi klei Krung heiri likarsui hoiyasu! Heitoubi Thangmunra kying hoiyasu heirou Dunpuei thang'al chouni allaksu!”

³⁹ Heirouri thimi rapbei hangrouwei Lhangai karsa thimi thane Jesu'nung kyun, “Marnopipuwa, neiyei ruishikrap heiso mulleiyasu bei heishunlaklo!”

⁴⁰ Jesu'ne loumallangkur, “Keine nanung kyunri, yane mulleiyanungri thlung rapnekhi yaitam kat'ungrao'rouso.” Jesu'ne Jerusalemya Thibi Chapkur

⁴¹ Heirou Ane khukarthil heiya yenkarnaknarou, Ane heiya muwurnarouri thibi heinung'tlim chapkur,

⁴² heirou Ane atoubi kyun, “Angtu tlainirou na nammane kying hoiyernanung kouya touserouwo toubi loumukhoulanungri lhangairou! Heiya asinungri nane heinakya muphamarou!

⁴³ Kouweiyo toulanungri, naiyei karhoukril thimi rapne naya karhilne raalpal kuiphopburbi, thak-dak, inncho-innmai naimakne philwurna kheen hungeirou.

⁴⁴ Heitoubi yane nayakhi heirou naiyei chanao rapkhi heirou rillei klei thimi namyeryakhi tlumni hatwurheirou; heirou yane naihangrei thlungrap khatchatomkhi marthonrilbi lakkhoumakrou, heiyei ngamri, Dunpune naya kalpinanung yongei kheen heiri nane ningmupimak.”

Jesu'ne Pukhrumna Cheemra Wachang

⁴⁵ Heitoubi Jesu'ne Pukhrumna Cheemra wachangurbine, heirou rilwaira putchei yorbi louklei thimi rapya hulthutkur,

⁴⁶ Ane yaya atoubi shunkur, “Khyingei Lailikra atoubi mayekhoulei, touri Dunpune shunkhou, ‘Keiyei Cheem ari khrumchana cheem toubine ungrou.’ Heiya naneri bi aya mucha thimi rapbei rabu hoiyerwurla!”

⁴⁷ Tlainiser Jesu'ne Pukhrumna Cheemwaira shunmatupibi marnopinarou, Suipipu raple, Tloulam marnopi pu raple heirou thimi rapbei ruipi pu rapne Jesu'ya hatkni,

⁴⁸ heiya yane tounaramri koukhatkhi mukhoumak, ngamri thimi rapne Aiyei marnopi heiwaya ningbithil leikur, yane Aiyei kyun tlou rapya khatchakhi karkulmakne ningkni.