LUKE 18 - KHYINGEI PU'TLOU Bible (BSI)

Trulmeiwi Khatle Pichar Pu Khatdei Ngamrou Yailim

¹ Heitoubi Jesu'ne Aiyei ruishik rapnung yailim tlou khat yunbine, yaya karyomne shunchabi heirou ukningra kanthritmakne leinanungei toubi shunmatupikur.

² Ane kyun, “Bongnung chaan khatrou khukarthil khatra pichar pu khat leikhou, a heine Dunpuyakhi chimak thimi, heitoubi thimi rapyakhi rikraimak pichar pu.

³ Heirou khukarthil heitamrou napuiya trulmeiwi khatkhi leikhou, heirou trulmei heine napawa heiyei bira wabine, ‘Keile karhouril thimiya khlang lhakpilaklo,’ toubi shunchakur.

⁴ Kheen kounakrou pichar pu heiwane aiyei tlouya loupimak; heiya hillouri aitam ningchakur, ‘Keine Dunpuya chimakya hoiyanungkhi heirou thimi rapbei maiya thibine rikrai mutmakanungkhi,

⁵ trulmeiwi heine keiya karyomne markholbi leikur heinung'tlim, keine trulmeiwi heiyei chim kou'leileikhi thirouwa. Keine heiya toumakanungri, ane keileinara karyom wabine, keiya duine markholrou youlei, nimanung keiya hillou ane klal dayerkurkhi kya!’ ”

⁶ Heirou Jesu'ne heisi yenkyun, “Chimmak pichar puei kyun heiwaya khalthilak.

⁷ Arouri, Dunpune Aiyei thimi rapne Airouwei masa-nunghang naimakne trungpinanungei buchanarou chimya thibi pichar toupimakrouko? Ane yaya trungpimakrouko?

⁸ Keine nanungei tanghakne yunpilei, ane yai kning hilthungne khnotni pichar loutoupirou. Heiya thimiyei Chanapawane yongeinung tlaipangra uklum thimirap pharouko?”

Lhangai Karsa Khatle Heirou Khulruithou Thimi Khatdei Ngamrou Yailim

⁹ Jesu'ne yaitamyei lhangaiya malungambi heirou thimi deiyari koukhi lhou hoipimak thimi rapnung anakei yailim tlouya yunpikur.

¹⁰ “Bongnung chaan khatrou bi khatra napawa napung-khnine Pukhrumna Cheemra shuncharou pulne polhak: napung khatri Lhangai karsa thimi, heirou khatpari khulrui thou thimi.

¹¹ Heirouri Lhangai karsa napawa heine aitam mayungbi Dunpunung shunchakur, ‘Dunpu, keine Neiya mathanglei, keiri thimi deinakne khram tangmak, kyun ningmakhi toumak, nimanung miyei nu-chayakhi lalmak. Heirou keine Neiya mathanglei, touri keiri bi arou klei khulrui thou thiminak nimakme.

¹² Keiri hapta khatrou tlaini khnini chamaimakne kngei, heitoubi keiyei lalkhi machaei chiptamkhi neinung makatlei.’

¹³ Heiya khulrui thou thimi heiwari tlatnara mayungbine, aiyei mitkhi nungthou lhangra mangalthut'ngammakne, heiya aiyei malungpakra umbine shunchakur, ‘Dunpu, borh keiya bei kringpilaklo!’

¹⁴ ‘Keine nanungei kyunri,’ Jesu'ne kyun, ‘Lhangai karsa napawa nimakne, khulrui thou thimi heiwari Dunpuei bomra chim thimi khat khoine mshing sherchokur, heitoubi ane cheemra shaalkur. Ngamri hukhatne aitamya tangyerkni hoiyanungri ukning marnim hoirou da, heirou hukhatne ukning marnim thimi hoiyanungri aya tangyerpirou.’ ”

Jesu'ne Douwa Rapya Phor Pikur

¹⁵ Thimi thane yaiyei douwacha rapya Jesuei leinara heiruiheibi, heirou Aya yaidoura Aiyei hut theryernanung wachangkur. Heirou ruishik rapne yaya loumunarou, yane lousamkur.

¹⁶ Heiya Jesu'ne douwa rapya Aiyei leinara heiunglhakbi Ane kyun, “Douwarap heiri Keinungei wachangasu, heirou yayari lou-mankanpimak, ngamri Dunpuei Krungram heiri yanaknungei.

¹⁷ Atoubi Keiyei kyunya malumpimak! Huhune douwa rapnakne Dunpuei Krungramya loulhakmak thimi heiri kouniroukhi bi heirou changmakrou.”

Dun Napawa Khat

¹⁸ Heirou Jehudiyei ruipipu khatne Jesu'nung kngai, “Lhangai Marnopipu, keine klui naimak chaanya phananungei kou touserouwo?”

¹⁹ Heirou Jesu'ne anung loushun, “Kounungei keiyari ‘lhangaiwa’ toubi ungkurrawo? Dunpu nimakne deiri lhangai hukhatkhi maklei.

²⁰ Nangne Chaylam rapya kmu heiwariya: ‘Minu-michaya thirmak; thimi hatmak; muchamak; thimi huyakhi klal theibaangpimak; neipui-neipaya rikrai khrumnalak.’ ”

²¹ Heirou napawa heine loumallang, “Keine keidouwei waiyoubi Chaylamrap namyerwa heiri ngaakurla.”

²² Jesu'ne heiwaya mayeknarou, Ane napawa heinung kyun, “Heiya neiyei tounungei kwat leileihui. Neiyei dunbi klei lal namtomma yorwurbi, heirou tuy heiri kanring thimi rapnung yerpiwurlaka, heitoulanungri Thangmunra neiyei lal marpeibi leirou; heitoubi Keihilla chanthunga.”

²³ Heiya napawa heine heitoubi kyun heiya mayeknarouri, aiyei lhawai beimakne lahwura, koungameiyo toulanungri a heiri beimakne dun thimi.

²⁴ Heirou Jesu'ne Aiyei lhawai lahkur heiwaya muwurbi heirou Ane kyun, “Dun thimi rapne Dunpuei Krungramra changrouri beimakne luleinu!

²⁵ Heitoubi dun thimi rapne Dunpuei Krungramra changnung tlimri Utni phantrim khnara kalleikurni dui klai.”

²⁶ Heitoubi kyunya mayekthung thimi rapne kngai, “Heiyanungri huhune kalpiya phamanerou youlei?”

²⁷ Heirou Jesu'ne loumallang, “Tlaipang thimiyei touchangmak heiri Dunpuneri toumanelei.”

²⁸ Heirouri Peter'ne kyun, “Thilak, kari kaiyei cheemya horkhouwurbine Neihilla chanthungkurra.”

²⁹ “Moi, heiwari chimlei,” toubi Jesu'ne yanung loushun, “heirou Keine nanung tanghakne yunpilei touri hukhatne Dunpuei Krung ramnung'tlim aiyei cheem, nimanung aiyei nu-charap, nimanung aiyei teinaorap, nimanung aiyei pui-pa rapya lakurkhoubine chanthung thimiri,

³⁰ angtuei tlaipang chaan aroukhi heitoubi hillei hungrou kyou klui naimak chaan heiroukhi marthumni phaheirou.”

Jesu'ne Khyumbui Tlungne Aiyei Hirouyounei Ngamrou Yunthutkhou

³¹ Jesu'ne ruishik chiple-khniya ruimartleiloubi, heirou yanungei shunmatupikur, “Louningpilak, kane Jerusalem'ra kalei heitoubi bi heirou Thimiyei Chanapawaei ngamrou Thimkhui rapne mayethutkhou heirapya hungtlungyerou.

³² Aya thimi dei rapbei hutra pithutdurbi, heirou yane Aya laonabi, rikrai pirou, heitoubi Aya matilkhi mthukphangrou.

³³ Yane Aya shungnikhi umphit touwurbine, heitoubi manyarhatrou; heiya khyumni tlungkur tlainirouri, A heiri ringthutthurou.”

³⁴ Heiya ruishik rapne kyun heiri kouweiyo touri mumakura; heiyei tlouri yanungeiri tloudum hoiyura, heirou yane Jesuei kyun tlou heiri kouwei ngammo toukhi mumakura.

Jesu'ne Bucha-Bu'kmai Mitdeo Napawa Khatya Raikyer

³⁵ Jesu'ne Jericho khukarthil yenkarnakyeinung mitdeo napawa khatne lamruira ombine buphabi louklei.

³⁶ Heirou ane thimi rapbei lamtlaya loumayeknarou, “Kouweiyawo awaya?” toubine loungaithungkur.

³⁷ “Nazarethdei Jesu yenraalleime,” toubi thimi rapne anung louyunpi.

³⁸ Heisi tounarouri ane lou'ungraochakur, “David'yei Chanapawa, Jesu! Keiya bei kringpilaklo!”

³⁹ Heirouri maibongra louklei thimi rapne aya shammurbi, mulleiya toubi shunkur. Heiya ane duidui ungraobi kyun, “David'yei Chanapawa, keiya bei kringpilaklo!”

⁴⁰ Heirouri Jesu'ne mayungurbi heirou mitdeo napawa heiwaya Aiyei leinara heiruilhaknung shunkur. Heirou ane pongra wakarsilkur heirouri Jesu'ne anungei loukngai:

⁴¹ “Keine neinung kouya touyerkniyo?” “Upawa, keiyei mitdeo awaya hanui waaryerpilaklo!” toubi ane loumallang.

⁴² Heirou Jesu'ne anungei kyun, “Heiyanungri, neiyei mitdeo heiri warlakasu! Ngamri neiyei uklum heine lhangaiyerwurla.”

⁴³ Heirouri tallengne aiyei mitdeokur heiso mumanekur, heirouri ane Jesuei hilla chanthungbi Dunpuya mathangkur. Heitoubi thukkur lhou heiya muthungkur thimirap namyerne Dunpuya mathangkur.