LUKE 17 - KHYINGEI PU'TLOU Bible (BSI)

Borhyei Lhou

¹ Jesu'ne Aiyei ruishik rapnungei shun, “Thimi rapya borhra dayernanungei lhourap hungthukeirou, heiya heirapya hungthukyer thimi heinungeiri kounakei thuithi hoirou! yanimak

² Heirou ane douwa raprei mandikur khatya malhimnara dayernung'tlimri, aiyei ngakhungra thlungtum khatya manyarbine yuinalira lu mathukni khinglhakurni lhangairou.

³ Ngam heine naitam mukheine lhou toulak! “Kounakpi neiyei teinaoni borh lhou touwurlanungri, heirou nangne aya shunmatupilak, heirou ane ukning hunganungri, aya kukpilaka.

⁴ Heitoubi kounak ane nungkhat'nuirou neiya karhane borhyei lhouya enibuirek touwurbinekhi, heirou ane neinungei enibuirek wabi, ‘Kei ukning hunglei,’ toubi yunlanungri, heirou nangne aya loukukpirou da.”

Uklum

⁵ Heirou Paocha thimi rapne Upawanung shunchakur, “Kaiyei uklum duiyerpilaklo.”

⁶ Heirou Upawane loumallangkur, “Naiyei uklumya anchep lungchanak tangne leiyanungri, nane khyudhei trung heiwaya ‘neitam yrung kyaone phurbi heirou yuinali rilra neitam pukthuwalo’ toubi yunlanungri, heirou anekhi nai kyun heiya louchanthungrou.”

Shok Khatdei Toubomthuk Rui

⁷ “Naihangra hukounak khatdei shok heiwane phailou huikhoubi nimanung ane yaorulya silbi cheemra yenkallengeinung, heirou aya khrangtoubi ombine chak-an marshikbi chalakalo toubi louyunrirou hu leilei?

⁸ Heinaksiri kouniroukhi loushunmakrou. Heinungchumri, nangne anung atoubi loushunrou, ‘Keinung chak-an marshiknanungei, heitoubi watlhou tounanung kansamlaka, heirou keine chamai luibongyen heimayungaklak; heirou keine cha'kmai luikur hillou nangkhi chamailaka.’

⁹ Heirou shok heine kyunya hilthungne lhou tounei ngamrou cheempu heiwane aya mathangpimakrouko?

¹⁰ Neinungkhi heinakrim-churnungei shunmandokur lhou rapya churchikur hillouri, ‘Kari lhouchur thimi micham; heine kaiyei churbomthuk lhouyatom churbi klei’ toubi nane yunrou; heirouri nayakhi Cheempuni mathangrou.”

Jesu'ne Thimi Napung chipya Kna Damyerpi

¹¹ Jesu'ne Samaria'le Galilee'yei ram khintamei ri-karchunnara yenralbine, Jerusalem'ranung chayeinung,

¹² heirou Ane yulthung khatra polhakeinung bi heirou yai hak'unra raichini patchallurbi beimakne mrimnangei klei napawa napung chipni Aya lourorilkur. Heirou yane tlatrilni mayungbi

¹³ Anung loushunchakur, “upa Jesu! Kaya bei kringpilaklo!”

¹⁴ Heirou Jesu'ne yaya munarou Ane yanungei kyun, “Nane shalbine Suipipu rapya yrothiyerlak.” Heirouri yane shaalyei kallou, lam tlayeinung yai raichi'paat heiri dammura.

¹⁵ Heirou yai hangra napung khatne aiyei kna heiri raiyurame toubi muwurnarou ane heikallengbi, Dunpuya hou chouni paobi mathangkur.

¹⁶ Heirou ane Jesuei ho pongra thleira kanelhakbine, heitoubi Aya mathangkur. Napawa heiri Samaria'rei thimime.

¹⁷ Heitounarou Jesu'ne loushun, “Kna raikuri ya thimi napungchip nimaka? Heiya ya napung takori koulhangranga?

¹⁸ Koutounei miramrei thimi awatom nimakne ya deiri hukhatkhi heikallengbi Dunpuya mathangmaklei?”

¹⁹ Heirou Jesu'ne anung kyun, “Kanthoubi shaallaka; neiyei uklum heine neiya kna damyerla.”

Thangmun Krungram Kyong

²⁰ Lhangai karsa thimirap thane Jesu'nung “Dunpuei Thangmun Krungram heiri koukallou yongrou youleiyo?” toubine kngai. Heirou Ane asitoubi loumallangpikur, “Dunpuei Krungramri tlaipangei mitne loukmunneri yongmarou.

²¹ Heirou thimi hukhatnekhi atoubine, ‘Thilaklo, alhangra yongame,’ nimanung ‘heilhangra yongleime!’ toubine yunmakrou, ngamri Dunpuei Krungramri naitlakra leiyurame.”

²² Heirouri Ane ruishik rapnung kyun, “Nane Thimiyei Chanapawaei tlaini rapya khatcha'tomanungkhi muthunglanango toubi kanrelne laashernei kheen hungthukkeirou, heiya nane kouniroukhi heinakri muphamarou.

²³ Heitoubi bi heirou atoubinekhi thukkeirouhui, touri thimi thane, ‘Thilak, alhangra leilei!’ nimanung ‘heilhangra leilei!’ toubine yunrou. Heiya nane heinakei kyun rapya thi'knine louchanthungpimak.

²⁴ Nungthourei chukni kwaarni khalu-khate wa'tlungne kat'alnakne, Thimiyei Chanapawaei tlainikhi nungkhatnui hungeirouhui.

²⁵ Heiya lamkrini Ane klah-knang beimakne mrimni douheirou, heitoubi angtuei tlaipang thimi rapne aya yanimakne khingurheirou.

²⁶ Noahyei chaanrou thukkurkhou heinakne, Thimiyei Chanapawaei chaanroukhi heinakrimne thukkeirouhui.

²⁷ Noahni mali rilra wachangkur tlaini phane, heirou yuitangne yaya omdumbi hikur tlaini phane, thimi namyerwane chamai-malipbi, mongmalipbi, heirou nulou-chalounei lhouya houklumne kumoi toubine napuiya-napawa pulne nungkngai-langthouni leikhou.

²⁸ Heitoubi Lotyei chaanrou thukkurkhou heinakne thukeirou. Thimi rapne tulpung-chakpung khangbine, heirou loril-yorrilbi, heirou trunwaikhi tlalhakbi, heitoubi cheem-kei lhangai-lhangaine sabaangbni leikhou.

²⁹ Heiya Lotni Sodom khukarthilya lakurkhoubi chakur hillouri, nungthourei shitnruile meitahle rosundabine thimi rapya tlumni kaanghatkur.

³⁰ Heinakrimne Thimiyei Chanapawane yongrou kyou tlainirou hungthukeirou.

³¹ “Heiyei tlainirouri cheembungra louklei thimine cheemwairei aiyei putchei rapya markumrou yongchumri yamakrou: heinakrimne yekulra louklei napawa heinekhi aicheemra yenkallengmakasu.

³² Lotyei nuya ningthutlak!

³³ Huhune aiyei chaanyatom ringyernanung kardonbi marshik thimi heiri karsukmarou; heiya huhune aichaanya kardonmak thimi heiri khring pharou.

³⁴ Keine nanungei tanghakne yunpilei, heineyei masarouri khumdou khatra napung-khni ipmalnabi leirou, napung khatri louheirou heirou khatyari lakurkhourou.

³⁵ Napuiya napung-khnine cha shukaltlakbi louleirou, heirou napung khatyari louheirou, heitoubi khatyari lakurkhourou.

³⁶ Napawa napung-khnine phailoura lhou churmalnabi louleirou, heirou napung khatyari louheirou, heitoubi napung khatyari lakurkhourou.”

³⁷ Heirou ruishik rapne Jesu'nung, “Bi kourou thukrouwo, Upawa?” toubi loukngai. Heirouri Jesu'ne, “Metu hina bira laangteya kar'umrou,” toubi yanung loukyun.