LUKE 15 - KHYINGEI PU'TLOU Bible (BSI)

¹ Nungkhatnui ruithou thimi raple heirou mikul chalmak thimirap chungwane Jesuei marnopiya ningrou wakartilkur.

² Lhangai karsa thimi raple heirou Tloulamei upa rapne yaitam yunkril, “Napawa heiri mikul chalmak thimi rapya ungmartilbi heirou Ane yale pulne chamaibi leilei!”

³ Heisi tounarou Jesu'ne yanung anakei yailim tlouya yunbi shunkur:

⁴ “Nai tlakra napung khatne aiyei yao macha khat leinarou, yai tlakrei yao khatcha kanwaiyuranungri, ane kou tourou? Ane yao somkole takoya ramhangra lakurkhoubine, heirou ane kanwaikur yao heichaya mubongyen raphamakrouwa!

⁵ Heitoubi ane yao heichaya rapha mulanungri, ane beimakne nungwaiwurbi, yao heichaya aiyei lhabangra yenchungheikur.

⁶ Heirou aicheemra yenkallengkur. Heitoubi ane aiyei paluirap, heirou aiyei cheemlhun thimi rapya ungmarkumbine heitoubi ane yanung kyun, ‘Keiyei kanwaikur yaoya rapha munarou, keiri beimakne nungwaiyura, heine ka nammane keile kalhonne haraowase!’

⁷ Heinakrimne Keine nanungei tanghakne yunlei, ‘Borh thimi napung khatne ukning hungnarou, tharmu klei thimi somkole takoei ukning hungkurya duine Thangmun ramra nungkngai hoirou.’

Maangkur Tuychui

⁸ “Heitoubi napuiya khatpini aiyei tuypik chiptam khounarou khatchari manganungri heirou ane kousi tourou? Heiyanungri ane shirek meishar manshokbine, heirou ane cheemwai karyoune therphabi, heirou ane tuypik heichaya mubongyen kalthi raphakur.

⁹ Heitoubi ane tuypik heichaya raphamukur heirouri, ane aiyei palui rapya heirou aiyei cheemlhunyei thimi rapya pulne ungkartilbi heirou ane yanung kyun, ‘Keiri keiyei maangkur tuypik achaya rapha muwurnarou beimakne nungwaiyurame. Heini ka nammane keile kalhonne haraowase!’

¹⁰ Heinakrimne, Keine nanung tanghakne yunlei touri ‘borh thimi napung khatne ukning hungeinung Dunpuei Thangring rapbei bomra kounakei nungkngai hoirou.’ ”

Kanwaimaangkur Chanapawa

¹¹ Jesu'ne heisi yenyunthu, “Bongnung chaan khatrou napawa napung khatdei chanapawa napung-khni pukkhou.

¹² Heirou yakhu teinaowei tlakrei naowane yai pawanung atoubi kyun, ‘Pawa, kai cheemrei lalthum nam'rouwei keiyei phabomthuk siruk heiso khaipilaka.’ Heisi tounarouri aiyei pawa heine aiyei dunbi klei cheemrei lalthum namyerwa heiya aiyei chanapawa napung-khninung yerkhaipikur.

¹³ Heihillou tlamakne leibi chanapawa yaimawa heiri aiyei phabomthuk lalthum namyerwa heiya yertlengwa yormathaiwurbi, heirou ane tuyhei urlouheibi, cheem lakkurkhoubi puichakur. Heitoubi ane miramra karwaichabi, aiyei klei tuy namyerwa heiya koukhi biso-bibal naimakne yrengkur.

¹⁴ Heihillouri ram heirou purcham thukkurbi, heirou aiyei tuykhi luilhakurbi, putchei touri koukhatchakhi makkur heirouri,

¹⁵ ane ram heirou klei thimi khatdei cheemra changbi lhou churnung ngaiphakur, heisi tounarouri cheempu heiwane aya yekulra watyillurbi, aiyei hog rapya silyerkur.

¹⁶ Heirou ane hog rapne chabi klei hogchak rapyakhi beimakne madukur, ngamri hukhatnekhi anungei chaanung-mainungei koukhatkhi thulpimakur.

¹⁷ Heihillou ane aitam ukningra ningchabi kyun, ‘Kai pawaei neekbi khou shok rapneyakhi, yane chamaleine rampha yaya thulbangpibi khoupilei, heiya keiri bi arou msulni hirou waiyouni leilei.’

¹⁸ Keine kanthoubi kai pawaei bira kallengbi hungyunrouwa, ‘Pawa, keiri neiyei maibongrakhi heirou Dunpuei maibongrakhi borhyei lhouya touwurla.

¹⁹ Keiri neichawa toubi ungyeroukhi kallonamakura; heine keiyari neiyei neekbi khou shok khatnakne loulhakpilak.’

²⁰ Heisi toubi ane kanthoubi aiyei pawaei bira yenkallengkur. Heirou ane tlatnarei hungeinung aiyei pawane aya loumukur; heisi tounarouri aiyei ukningra beimakne kringpikur, heirou ane louchanrobine, aiyei chawaya lourkolbine machuppikur.

²¹ Heirou aiyei chawane kyun, ‘Pawa, keiri Dunpuei bomrakhi heirou neiyei maibongrakhi shunya ningmakne borhyei lhouya touwurkhoula. Heini keiri neiyei chanapawa toubi ungnungeikhi kallonamakura.’

²² Heirouri pawane aiyei shok rapya ungloubi kyun, ‘Khrangtoubi, duiyei lhangai linglikchul khat yenthutbi keiyei Chanapawa heinung nabangpilak! Aiyei hutmayungra hutshikhi luplhakpilak, heitoubi aiyei hora khorkhangkhi tunglhakpilak.

²³ Heitoubi nane chawurbi halshun marnam khat manbine hatlaka, heitoula toubi ka nammane pulne nungkngaiyei cha'kmai markhullase!

²⁴ Ngamri keicha napawa ari hikurnakne kanwaiwurkhou, heiya angturi ringthutkur'naksiyura, a heiri kanwai'maangurkhou, heiya angturi ari hanui hungthukkura!’ Heirou asitoubi chaak khaangbine haraokur.”

²⁵ Kheen heirouri cha upawa heiri yekulra chakur. Heirou ane yenkallengeinung, cheemra yenkarnakur heirouri cheemra laa shanei houle heirou phung-um daar-umnei houle, nuybi loukleiya ane hungmayekkur.

²⁶ Heitounarouri ane shok napung khatya unglouheibi ngaithikur, ‘Cheemrari kou toukurrawo?’

²⁷ Heirou shok heiwane loushun, ‘Neiyei naowa heiri cheemra yenkallengura, heingammei nai pawane aiyei chawa heiri koukhi shuikngam makne hanui yenkallengthuwa toubi ane halshun marnam khat hatyerbine chaak khanglei.’

²⁸ Heirouri cha upawa heiri malungkhawurbi cheemwaira hungchanglo touri yamakkur, heitounarou aiyei pawane wathukbi aya hungchangalo toubi wamanelkur.

²⁹ Heiya ane aiyei pawanung loumallangkur, ‘Thilak, kum kounak kralni keine neinungei shok khatnakne lhou churpi-pangpibi klei, heirou keine neiyei kyunya kouroukhi kartleikur toumakne chanthungpi. Heiya nangne keinungei kouya toupikur leiyura? Heirou tlangshuncha khatyakhi hatbine keiyei palui raple kalhonne chamaikurkhi makhui!

³⁰ Heiya neiyei chanapawa paryaiwa heine neiyei lalthum namyerwa markumloubi, kyun ningmakei lhoura chawurbi, lalthum namya yrengurkhoubi, heirou ane cheemra yenkallengnarou, nangne anungei manklu hal marnam khatya louhatpilei.’

³¹ Pawane loushun, ‘Keicha upawa, nangri keile karyom leikalhonlei, heirou keiyei klei lalthum namyerwa heikhi neiyeithil.

³² Heiya angturi kane nungkngaine markhulbi leirou da, ngamri neiyei naowa heiri hikurnaksi hoikhou, heiya asinungri a heiri ringkurnakura, a heiri kanwaiwurkhou, heiya asinungri a heiri phawurla.’